Omapulo Alingwa Novatangi
Okuti tyaviuka Ovakristau okuyoka ovivimbi?
Ovihonekwa kaviilika ovanthu okulinga ngotyo.
Pena omahipululo Ombimbiliya apopia konthele yokuyoka omunthu tyina amankhi ine omankhipa ae. (Jos. 7:25; 2 Crô. 34:4, 5) Otyo hamwe ankho tyilekesa okuti ovanthu ovo ankho kavatokalele okupakwa monkhalelo yaviuka. Mahi, okuyoka ovivimbi haapeho tyilekesa okuti kavatokalele okupakwa monkhalelo yaviuka.
Otyo tupondola okutyimona mehipululo liononkhia mbo Hamba Saulu, novana vae vetatu. Umwe pu vekuana, wankhila movilwa nova Filisteu. Umwe povana ovo, o Jonatã, epanga enene lia David wemukuatesileko noukuatyili. Etyi ova Isilayeli ankho vakala ko Jabes-Gileade veiva etyi tyaendapo, vakapola ovivimbi viatyo vikuana, aveviyoko, iya omankhipa atyo aveehihila. Konyima, David apandula ova Isilayeli ovo mokonda yetyi valinga.—1 Sam. 31:2, 8-13; 2 Sam. 2:4-6.
Ovihonekwa vipopia okuti wokuankhia makatutiliswa, Huku makatutilisa omunthu wokuankhia. Tyilinge omunthu wokuankhia uyokwa ine kayokwa, Jeova una epondolo liokututilisa omunthu oo nolutu lumwe olupe. Ovakuendye vana vetatu ova Hebreu Ohamba Nambukondonosole atumine vayumbwe motupia, ankho kavesukisile okukala nowoma wokuti inkha vankhila motupia Huku kametyivili okuvetutilisa. (Dan. 3:16-18) Ovaumbili va Jeova vekolelo vankhila movikaleya vio Nazista iya avayokwa, tupu ankho kavakalele nowoma. Ovaumbili ovanyingi va Huku vekolelo vankhila motupia ine vankhia avahamonwa vali apa vankhila. Mahi, nongotyo mavakatutiliswa.—Rev. 20:13.
Jeova kamaongiya olutu luomunthu wokuankhia opo emututilise. Otyo tyitalelwa konkhalelo Huku atutilisa Ovakristau ovalembulwa pala omuenyo keulu. Ngetyi Jesus “atutiliswa nomuenyo wo keulu,” Ovakristau ovalembulwa vatutiliswa nomalusoke novituwa viavo, mahi nolutu luopaspilitu. Kavaende keulu nolutu lwavo luopahitu.—1 Ped. 3:18; 1 Cor. 15:42-53; 1 João 3:2.
Onthue tutavela okuti omunthu upondola okututiliswa, ha mokonda olutu lwae luayokwa ine kaluayokelwe, mahi omokonda tuna ekolelo liokuti Huku una epondolo nehando liokufuisapo omilao viae. (Atos 24:15) Mahi, hamwe katutyii nawa oñgeni Huku alingile ehuviso liokututilisa ovanthu kohale ine oñgeni meketyilinga komutwe. Nongotyo, tuna onthumbi mu Jeova. ‘Wetyilekesa’ etyi atutilisa Jesus.—Atos 17:31; Luc. 24:2, 3.
Otyiwa Ovakristau okutala nawa kuetyi ovanthu vasoka, netyi tyilingwa potyilongo, netyi ovatumini vaita konthele yetyi tyilingwa ovivimbi. (2 Cor. 6:3, 4) Ngotyo, inkha olutu luomunthu wokuankhia luyokwa ine kaluyokwa, tyitei kuetyi omunthu watyo muene aita puetyi nkhele ehenenkhie no ketokolo liombunga.