“Viukisa Nawa Apa Uliatela” Opo Ukule

ETYI ova Isilayeli vatunda mo Mbambilonia menima 537 P.K.E., Jeova ankho wesuka unene noungendi wavo wokukondoka ko Jelusalei. Jeova evepopila okuti: “Ikulei ondyila opo ovanthu valambe. Viukisei, viukisei nawa etapalo. Poleimo omamanya.” (Isa. 62:10) Oityi ankho vena okulinga opo vetavele otyitumino otyo? Tyafuile otyikundyi tyimwe tyova Isilayeli vaile komutwe wavakuavo iya avahimbika okuviukisa nawa ondyila. Tyotyili, otyilinga otyo tyakuatesileko vakuavo okulinga nawa oungendi wokukondoka kotyilongo tyavo.

Tupu, nonthue tulandula ondyila putyina tufuisapo ovilinga vielikalaila tupewa na Jeova. Jeova uhanda tufuisepo ovilinga ovio tyehena ovipuka ovinyingi vitutyilika. Ondaka yae itulondola okuti: “Viukisa nawa apa uliatela, iya onondyila mbove ambuho mambuviuku.” (Pro. 4:26) Tyilinge umukuendye ine umukulu, upondola okupola ounongo kelondolo olio lia Huku.

LINGA OMATOKOLO OMAWA

Ombimbiliya yati: “Omunkhima wovakuendye ononkhono mbavo.” (Pro. 20:29) Ovakuendye ovanyingi vena ekongoko ewa, nononkhono, nounongo, iya vahanda okukala nomuenyo omuwa. Ovakulu vehole okutala ounongo wovakuendye, novipuka vevila okulinga iya vakevelela valinge etyi vevila. Ovakuendye mavakala vala nehambu liotyotyili inkha vaundapesa ounongo wavo movilinga via Jeova.

Ovanthu vamwe, tupu vapanda unene ounongo wovakuendye. Mongeleka, Onombangi ovanyingi ovanongo mosikola, vakuluminyua novalongesi, naava valongeswa navo opo vanyingile monosikola ononene. Omukuendye umwe ine omuhikuena omunongo kovinyano upondola okulundwa navakuavo atualeko okutyilinga opo ankhimane. Hamwe ove ine omunthu wii ukahi motyitateka otyo. Oityi matyikuatesako Omukristau okulinga omatokolo omawa?

Onondonga Mbombimbiliya mbupondola okutukuatesako okulandula ondyila ongwa itutuala komuenyo. Mongeleka, Eclesiastes 12:1 yati: “Hinangela Omupakeko wove Omunene tyina nkhele umukuendye.” Oñgeni ove ine omunthu omukuavo wii mupondola okuhinangela ‘Omupakeko wenyi Omunene’?

Tutalei etyi tyaendele nomukuatate umwe omukuendye utiwa o Eric,a ukala Koutakelo wo Afrika. Okusana ombola ankho utyihole unene. Etyi atuula omanima 15, akoywa opo ayumbe motyikundyi tyimwe tyo motyilongo tyae. Tupu apewa omphitilo opo akalongeswe vali nawa ko Europa, opo akale omunongo. Mokueenda kuomuvo oo, Eric wahimbika okulilongesa Ombimbiliya no Nombangi mba Jeova. Oñgeni etyivila “okuhinangela” Jeova? Oityi tupondola okulilongesila kongeleka yae?

Melilongeso liae Liombimbiliya, Eric wanoñgonoka okuti Huku makamanako ovitateka aviho viovanthu. Moluotyo, waimbuka okuti okulinga ehando lia Huku tyakolela vali tyipona okuyumba ombola. Ngotyo, ambatisalwa iya aundapesa omuvo wae, nononkhono mbae movilinga via Huku. Mokueenda kuomuvo, akala omukuatesiko wovakulu vewaneno. Kelilongesile opo akale omunongo kokuyumba ombola, mahi mokonda Omukristau, konyima akongwa opo akalongeswe Mosikola Yombimbiliya Yovakuatate Vahanepele.

Inkha wakalele omunongo kokuyumba ombola, Eric ñgeno wankhimana, nokukala omuhona. Mahi waimbukile okuti Ombimbiliya ipopia otyili etyi yati: “Omalumono omuhona epundaumbo liae liapama, molusoke lwae ongatyina otyimato tyimuyakulila.” (Pro. 18:11) Omalumono apondola okuyondya omunthu. Omalumono kaavela ovanthu epamo liotyotyili, mahi vana vaovola okukala ovahona ovikando ovinyingi “velivanga avaihamenua unene.”—1 Tim. 6:9, 10.

Ovakuendye ovanyingi novahikuena vakala nehambu, nokuapama movilinga viomuvo auho. Eric wati: “Ame ndyikahi ‘motyikundyi’ tyimwe otyinene tyomuvo auho wovaumbili va Jeova. Etyi otyikundyi otyiwa omu ndyipondola okukala, iya ndyipandula Jeova wandekesa ondyila yehambu liotyotyili nomuenyo omuwa.”

Iya ove? Okuti upondola okulandula ondyila maikukuatesako okukala no nomphitilo ononyingi movilinga via Jeova tyipona okuovola omalumono ouye uno? Okuti upondola okulinga ononkhono opo ukale omukokoli-ndyila?—Tala okakasa kati “Okukala Nouwa Uhamonwa Monosikola Ononene.”

POLA MONDYILA ETYI TYIPONDOLA OKUKUTYILIKA

Etyi ovalinepi vamwe vakapila Ombetele yoko Estados Unidos, vamuene okuti vokuundapamo ankho vahambukwa unene. Konyima, omphange ahoneka okuti: “Ankho tulitehela okuti tukahi nawa novipuka tulinga.” Ngotyo, ovalinepi avatokola okuundapesa nawa omuvo wavo nononkhono movilinga via Jeova.

Ankho katyapepukile kovalinepi ovo okulinga omapiluluko esukisa. Mahi onthiki imwe, ovalinepi ovo vasoka nawa konondaka mba Jesus mbukahi mu João 8:31, mbati: “Tyotyili muvalongwa vange, inkha mutualako okukala mondaka yange.” Avaimbuka okuti ankho vena okulinga ononkhono opo vakale ovalongwa votyotyili va Jesus. Ovo vasoka okuti: “Kese etyi tulinga opo tulitepulule ovipuka vimwe momuenyo, tyesukisa okulinga ononkhono.” Avalandesa ondyuo yavo onene, nokulipola ovipuka ovikuavo iya availukila kewaneno limwe ankho liesukisa vali ovaivisi. Pahe ovakokoli-ndyila, mahi tupu vakuatesako okutunga Onondyuo Mbomaliongiyo, nokuliava pala okukaundapa movionge viononthiki ononthatu. Oñgeni velitehela konthele yomapiluluko valinga? “Onthue tuhuva unene tyina tusoka kehambu tuna mokonda yokuelitepulula ovipuka vimwe ankho tuna, atulingi vala etyi eongano lia Jeova litupameka okulinga.”

UHATUNDE MONDYILA

Salomau wahoneka okuti: “Omaiho ove ena okutala vala komutwe, enga, omaiho ove ena okuviukilila vala komutwe.” (Pro. 4:25) Otyo tyilekesa tyi? Tuna okutala kondyila maitukuatesako okukala no nomphitilo ononyingi movilinga via Jeova. Tuesukisa okulityilika ovipuka vitutalula opo tuhavase ovilinga tuhanda okuvasa meongano lia Jeova.

1. Onombangi mba Jeova vekahi nokuovola okuvasa ovilinga meongano lia Jeova tyina nkhele ovakuendye; 2. Ondyila ihena otyipuka natyike

Ovilinga patyi uhanda okuvasa? Hamwe uhanda okunyingila movilinga viomuvo auho. Ine uhanda okuilukila kewaneno lina otelitoliu onene iya ovaivisi kavehi. Ine hamwe mewaneno muna ovaivisi vena ongeleka ongwa, mahi mutupu ovakulu vewaneno vatuuka, novakuatesiko vovakulu vewaneno. Upondola okupopia nomutalelipo womauaneno opo atale ewaneno patyi potyilongo tyove liesukisa okukakuatesuako. Inkha uhanda okukaundapa kokule, upondola okuita vekupopile omawaneno patyi akala kokule esukisa okukuatesuako.b

Tusokei vali kuetyi tyahonekwa mu Isaías 62:10. Ova Judeu ankho vesukisa okuhika ko Jelusalei, ngotyo vamwe puvo ankho vena okuundapa unene opo vapongiye ondyila. Hono, nove wesukisa okutualako okulinga ononkhono opo uvase ovilinga uhanda meongano lia Jeova. Uhaponwe, nombatelo ya Huku, upondola okuvasa ovilinga ovio. Tualako okuita ounongo ku Jeova putyina wovola okupola mondyila ovipuka vipondola okukutyilika. Tyina omuvo watyo wamehikipo, motale oñgeni Huku apondola okukukuatesako “okuviukisa nawa apa uliatela.”—Pro. 4:26.

a Enyina liapilululwa.

b Tala omukanda Organizados Para Fazer a Vontade de Jeová, pomafo 111-112.

Okukala Nouwa Uhamonwa Monosikola Ononene

ETYI ankho Flavia omukainthu, ina kulu, ankho Ombangi ya Jeova, wemupopilile konthele Yombimbiliya. Mahi mokonda tate yae ankho omulongesi, wemulundile opo elilongese konthele yovipuka viatungwa nokunyingila mosikola onene. Ovanthu ovakuavo avemupopila okuti: “Onwe mupondola okuyovola ouye.” Nombatelo ya tate yae, Flavia wanyingila mosikola onene yankhimana. Mosikola omo, ahimbika okuovolola ononkhalelo mbokulinga ongasolina yahasilisa omphepo.

Kapakalele ehimbwe, Flavia aimbuka okuti ovanyingi ankho alongeswa navo, tyotyili kavesukile ‘nokuyovola ouye.’ Tupu, ono programa mbumwe mosikola onene ankho mbesukisa okufetelwa opo valinge omaovololo avo. Moluotyo, vokulinga omaovololo ankho vapondola okulinga ovipuka vikuatesako vana ankho vevefetela. Otyo atyinumanesa Flavia. Etyi Onombangi mba Jeova veya peumbo liae, esuku vali netyi Ombimbiliya ipopia konthele ya Huku, netyi matyikamoneka komutwe.

Flavia etavela otyili Tyombimbiliya iya ambatisalwa. Mahi ankho utupu omuvo omunyingi wokuivisa onondaka onongwa, mokonda ankho ulongeswa mosikola onene. Onthiki imwe, eivi etyi omutalelipo umwe womauaneno ahangununa Tiago 4:17: “Inkha umwe utyivila okulinga etyi tyaviuka mahi nongotyo ehetyilingi, onkhali pala ae.” Otyo tyalundile Flavia okusoka konkhalelo yae. Apopi okuti: “Putyina ankho ndyikevelela okuyambwa na Jeova, tupu ankho ndyihanda okukala nehambu movilinga viange. Ankho ndyina okuholovona etyi ndyihanda.”

Flavia aholovona okuyekapo okulongeswa mosikola onene. Okuti welivelele? Flavia wati:

“Movilinga via Jeova, namona ouwa wahavasiwa mosikola onene. Jeova apeho unthekula nawa. Ukahi nokundongesa okukala noluembia, nokankhenda, nokukuatesako vakuetu okukala noupanga omuwa nae. Ndyina otyinepo tyimwe otyiwa iya komutwe makampha vali ovipuka ovinyingi tyipona evi ñgeno namona mosikola onene. O Jeova vala upondola okuyovola ouye. Himayekepo vali okumuumbila.” Flavia nomulume wae vekahi nokuundapa mombala Yonombangi mba Jeova mouye auho ko Nova York.