Tualako Nombili Yove Movilinga Viokuivisa

OKUIVISA onondaka onongwa hono, ovilinga viakolela vikahi nokulingwa mouye auho. Elao limwe enene okukalelapo Jeova movilinga ovio viokulongesa. Mahi, pamwe tyipondola okupuiya kovakokoli-ndyila, novaivisi okutualako nombili yavo movilinga viokuivisa. Omokonda yatyi?

Ovaivisi vamwe, vatala okuti tyina vaivisa umbo na umbo kavapopi novanthu ovanyingi mokonda kavavahiwa momaumbo. Iya tyina vekahi peumbo, hamwe kavahande okutehelela onondaka Mbouhamba, alo umwe pamwe vetunumanena. Ovaivisi ovakuavo, vena otelitoliu onene muna ovanthu ovanyingi vetavela, mahi vena otyiho tyokuti kamavetyivili okupopia novanthu aveho. Nkhele vakuavo vekahiale nokuivisa omanima omanyingi, iya vekahi nokusoya mokonda onthyulilo kaikahi nokuya.

Matukala novitateka movilinga viokuivisa vipondola okunyona ombili yetu. Tukahi mouye utuminwa “nondingavivi,” Satanasi Eliapu, ngotyo, tutyii okuti okuivisa onondaka onongwa katyapepukile.—1 João 5:19.

Namphila ukala novitateka movilinga viove viokuivisa, upondola okukala nonthumbi yokuti Jeova mekukuatesako okuvitetulula. Mahi oityi upondola okulinga opo uyawise ombili yove movilinga viokuivisa? Tutalei onondonga mbumwe.

KUATESAKO OVAIVISI OVAPE

Omanima aeho, ovanthu ovanyingi vekahi nokumbatisalwa avakala Onombangi mba Jeova. Inkha wambatisalua pahetyino, upondola okulilongesila kuvana vekahi nokuivisale omanima omanyingi. Inkha ukahiale nokuivisa omanima omanyingi, okuti upondola okukuatesako ovape? Okulinga ngotyo, matyikuetela ehambu enene.

Jesus ankho utyii okuti ovalongwa vae vesukisa ehongolelo opo vakale ovalongesi ovanongo, iya evelongesa oñgeni mavaivisa. (Lucas 8:1) Hono, ovape navo vesukisa okulongeswa opo vakale ovaivisi ovanongo.

Namphila omuivisi omupe wenda movilinga viokuivisa, tuhasokei okuti unale ounongo wokulongesa. Wesukisa omulongesi woluembia opo emulongese. Omuivisi omunongo wesukisa okumulongesa oñgeni (1) mapongiya etyi makapopia nomunthu avasa, (2) matomphola novanthu, (3) maave omikanda, (4) makatalelapo vana valekesa esuko, (5) noñgeni mahimbika okulongesa omunthu Ombimbiliya. Omuivisi omupe makala vala omuivisi omunongo inkha utala nawa, nokuhetekela omuivisi ukahi nokumulongesa. (Lucas 6:40) Iya omuivisi omupe, makala vali nonthumbi tyina amanoñgonoka okuti pena umwe wafuapo pala okumukuatesako. Okupandula, nokuavela onondonga, tupu tyipondola okukuatesako omuivisi omupe.—Eclesiastes 4:9, 10.

TOMPHOLA NA MUKUENYI MOVILINGA VIOKUIVISA

Namphila mulinga ononkhono mbokutomphola novanthu muvasa, mahi otyiwa okutomphola nou mukahi nokuundapa nae putyina muivisa. Hinangela okuti etyi Jesus atumine ovalongwa vae pala okukaivisa wevetumine “vevali-vevali.” (Lucas 10:1) Putyina vaundapela kumwe, ankho vapondola okulipameka nokuliavela ondundo. Tuna onomphitilo onongwa opo “tulipameke” tyina tuundapa novakuatate vetu no nomphange.—Romanos 1:12.

Ovipuka patyi mupondola okutomphola? Okuti umwe puonwe una ongeleka ipameka? Okuti melilongeso liove lioulike ine liombunga welilongesamo otyipuka tyimwe otyiwa? Okuti meliongiyo weivamo tyimwe tyekupameka? Pamwe upondola okuundapa nomuivisi umwe uhei nawa. Upondola okumupula oñgeni anoñgonoka otyili. Oityi tyemukalesa nonthumbi yokuti eli eongano lia Jeova? Onongeleka patyi ine ovilinga patyi akala navio meongano? Hamwe upondola okupopia onongeleka wakala nambo movilinga via Jeova. Tyilinge ovanthu vetavela ine kavetavela, tyina tuundapa na mukuetu movilinga viokuivisa, tuna omphitilo ongwa yokutualako “nokulipameka.”—1 Tessalonicenses 5:11.

TALA VALI NAWA ONKHALELO ULINGA ELILONGESO LIOVE LIOULIKE

Opo tutualeko nombili yetu movilinga viokuivisa, tuesukisa okutala nawa onkhalelo tulinga elilongeso lietu lioulike. “Omupika wekolelo nokualunguka,” utuavela omikanda vina ononthele ononyingi mbelikalaila tupondola okulilongesa. (Mateus 24:45) Tutalei onthele imwe ongwa tupondola okulilongesa: Omokonda yatyi ovilinga viokuivisa viakolela unene? Okakasa kati, “Omokonda Yatyi Utuailako Nombili Yove Movilinga Viokuivisa?” ketuavela omahunga amwe.

Okulilongesa ononthele mbukahi mokakasa oko, matyituavela ondundo yokutualako okuivisa nombili. Melilongeso liove, kutikinyamo Ovihonekwa ovikuavo vikukuatesako okuivisa nombili. Iya osokolola Kovihonekwa ovio. Okulinga ngotyo, ombili yove movilinga viokuivisa mailiyawisa.

OVOLA OKULINGA OTYIPUKA TYIMWE OTYIPE

Eongano lia Jeova apeho lituavela onondonga mbutukuatesako okuivisa vali nawa. Mongeleka, katuivisa vala umbo na umbo, mahi tupu tupondola okuhoneka omikanda, nokuava oumbangi notelefone, nokuivisa momatapalo, ine oponomphangu ononkhuavo palamba ovanthu ovanyingi, nokuava oumbangi tyina tuhekahi movilinga viokuivisa ine oponomphangu apa ovanthu vaundapa. Hamwe tupondola okupanga okukaivisa konomphangu kuna Onombangi mbehehi ine kuhena Onombangi.

Okuti wovola okulinga otyipuka tyimwe otyipe? Ovanthu ovanyingi vaovola okulandula onondonga ombo, vapolako ouwa. Tala onongeleka ononthatu.

Omphange umwe utiwa April, watokolele okulandula onondonga mbumwe mbukahi Movilinga Vietu Viouhamba konthele yokuhimbika okulongesa ovanthu Ombimbiliya. Wahimbika okulongesa Ombimbiliya ovanthu vetatu aundapa navo. April ahambukwa unene etyi vetavela okulilongesa, tupu avahimbika okuenda komaliongiyo.

Tupu tyitupameka okuvasa ovanthu vahanda okutanga omikanda vietu. Omutalelipo umwe womauaneno ko Estados Unidos, watokolele okuava o Despertai! kovahona vo novenda mbokulandesa omalola mepundaumbo limwe. Tupu, omutalelipo oo, nomukai wae vaavele o Despertai! ina onthele yati, “Ovitateka Viokukala Ondotolo” mo noseketa mbo nondotolo mbulamba po 100. Omutalelipo oo, wapopia okuti okuenda ponomphangu ombo tyakuatesako ovanthu okunoñgonoka nawa omikanda vietu, novilinga vietu viokuivisa. Etyi vanoñgonoka nawa ovanthu potyilongo, omutalelipo womauaneno nomukai wae pahe avetyivili okutalelapo ovanthu valekesa esuko.

Omphange umwe utiwa Judy wahonekelele kombala yo Nombangi mba Jeova opo apandule ondundo apewa yokuava oumbangi notelefone. Wapopia okuti me yae ankho una omanima 86, iya ankho una ovitateka ovinyingi viekongoko, ankho wivisa apeho notelefone. Ehimbika okulongesa Ombimbiliya omukulukai umwe una omanima 92!

Onondonga mbukahi momikanda vietu tyotyili mbukuatesako. Ovola okumbulandula! Mambukukuatesako okutualako nehambu liove, nombili movilinga viokuivisa.

OVOLA OKULINGA OVIPUKA UVILA

Oityi tyitukalesa nehambu movilinga viokuivisa? Ehambu kaliya vala mokonda tuaava omikanda ominyingi, ine tualongesa Ombimbiliya ovanthu ovanyingi, ine tuakuatesako ovanthu ovanyingi okukala Onombangi mba Jeova. Soka ku Noe. Tyihavalula ombunga yae, ovanthu veñgapi Noe akuatesileko opo vakale ovafendi va Jeova? Mahi tyotyili wakalele nehambu movilinga viokuivisa. Tyakolela vali, okuumbila Jeova nekolelo.—1 Coríntios 4:2.

Ovaivisi ovanyingi vaimbuka okuti opo vakale nehambu movilinga viokuivisa, vesukisa okusoka nawa oityi mavalingi. Ovipuka patyi vahanda okulinga? Tala mokakasa kati, “Ovola Okulinga Ovipuka Uvila.”

Ita ku Jeova opo ekukuateseko okuivisa nehambu. Tyina wamavasi ovilinga uhanda mewaneno, mohambukwa okunoñgonoka okuti ukahi nokulinga atyiho uvila opo wivise onondaka onongwa.

Tyotyili, okuivisa onondaka onongwa katyapepukile. Mahi pena ovipuka upondola okulinga opo wivise nombili. Tyina mukahi movilinga viokuivisa tompholei ovipuka vipameka, linga apeho elilongeso liove lioulike monkhalelo ihambukiswa, landula onondonga mbomupika wekolelo nokualunguka, iya ovola okulinga ovipuka uvila. Tyakolela vali, hinangela okuti mokonda Umbangi ya Jeova Huku, waavelua elao limwe enene liokuivisa onondaka onongwa. (Isaías 43:10) Tyotyili, mokala nehambu enene putyina utualako nombili yove movilinga viokuivisa!