Omapulo Akumbululwa

◼ Oityi aveho vapondola okulinga opo omaliongiyo omewaneno aendeswe monkhalelo ikuatesako aveho? (Deut. 31:12)

Nonthilo onene tuna na Jeova nomaliongiyo etuavela, aveho vekahi nokuavelwa ondundo vehike liwa komaliongiyo opo vakale tyafuapo pala okulongeswa nae. Otyiwa okupumphama kovipundi vio komutwe mondyuo yomaliongiyo, okuyeka ovipundi vio konyima pala vana vena ovana ovatutu ine vehika mondyila. Tyina eliongiyo nkhele lihenehimbike, ono telefone mbuna okuikwa ine okupaka monkhalelo yahanyuele opo mbuhatalule ovateheleli. Inkha ovanthu aveho vakala nonthilo tyina vekahi momaliongiyo, mavelityilika okulinga kese tyimwe tyitalula.—Ecl. 5:1; Fil. 2:4.

Tyina ovanthu ovape vahimbika okuenda komaliongiyo, omunthu umwe mewaneno uvei nawa, upondola okupumphama navo. Otyo matyivekuatesako haunene inkha ovo vena ovana ovatutu vesukisa okuyungwa. Hamwe otyo otyikando tyotete vaya keliongiyo. Inkha ongotyo, ovo mavapandula unene inkha vapumphama konyima opo vahatalule vakuavo tyina vatala okuti vesukisa okukatuka opo vaye pondye tyina ovana valila. (Pro. 22:6, 15) Onombunga mbuna ovana ovatutu otyiwa vapumphame kotyipundi tyike mokonda ovana vapondola okuviela. Ovikando ovinyingi, tyikahi vali nawa tyina ovohe vaviyula ovana vavo nokuvetuala pondye, iya tyina vamamane avakondoka mokati.

Vana vokulekesa ovanthu povipundi vena otyilinga tyokuendesa ovipuka monkhalelo yaviuka pala ondyuo yefendelo. Ovo vakuateseko onombunga novanthu ovakuavo vehika konyima okuvasa ovipundi. Vokulekesa ovanthu povipundi vena okukala novituwa oviwa nokulunguka tyina vakuatesako vakuavo okuvasa omphangu pala okupumphama avahatalula vana vepumphi. Ovo vaviyula nonondunge onongwa tyina pamoneka umwe ukahi nokuviela. Tyina ovana valinga ovipuka vitalula vakuavo, ovo vapondola okuvevatela.

Aveho veya komaliongiyo pala okufenda, vapondola okulekesa ovituwa oviwa opo aveho velilongese konthele ya Jeova nehando liae liokueta ombembwa, nouviuki mouye omupe.—Heb. 10:24, 25.