Ovilinga Viokuava Okamukanda Kokukonga Ovanthu Veye Kehinangelo Vihimbika mu 2 ya Tyikukutu
1. Onalupi matuave okamukanda kokukonga opo ovanthu veye Kehinangelo enima lino, iya omokonda yatyi tyakolela okuundapa movilinga ovio?
1 Okupolelela mu 2 ya Tyikukutu alo 17 ya Tyikukutu, matuave okamukanda kokukonga ovanthu veye keliongiyo liakolela lienima—Ehinangelo Liononkhia mba Kristu. Enima liokualamba, ovanthu ovanyingi vetavelele aveya Kehinangelo. Mongeleka, monthiki Yehinangelo, omukai umwe watelefonalela ko Filiyale apopi okuti: “Ame nehika meumbo, navasa okamukanda kokukonga mombuelo yepito. Ame nahanda okuenda, mahi hityii oola patyi malilingwa.” Omukuatate emupopila okuti oola nomphangu viahonekwa mokamukanda oko. Omukai apopi okuti, “Mandyiya keliongiyo lienyi!”
2. Oityi tupondola okupopia tyina tuava okamukanda kokukonga?
2 Oñgeni Matukongo Ovanthu: Mokonda omuvo kauhi pala okuundapa motelitoliu aiho, otyiwa okuhapopi unene. Tupondola okupopia okuti: “Okamene. Onthue tueya okukonga ove nombunga yove pala otyipito tyimwe tyakolela matyilingwa ouye auho Motyalumingu 17 ya Tyikukutu. [Muavela okamukanda.] Onthiki oyo matuhinangela ononkhia mba Jesus. Makulingua elongomona malihangununa oñgeni tupondola okupola ouwa kofeto yeyovo lia Kristu. Okamukanda aka kalekesa oola nomphangu apa eliongiyo olio malilingwa potyilongo tyetu.”
3. Oñgeni tupondola okukonga ovanthu ovanyingi?
3 Inkha ewaneno lina otelitoliu onene, ovakulu vewaneno mavemutolela opo musepo omikanda ovio pomaumbo ana muhavasile ovanthu. Mahi, vipakei apa vapondola okuvimona. Ovola okukonga vana uhole okukatalelapo, ombunga, vana ulilongesa navo kosikola, na vana uundapa navo, ovomunthele, novakuavo vali. Inkha tyitavela, tyina uundapa Motyasapalo no Tyalumingu, ovola okuava okamukanda kokukonga kumue Nomutala Womulavi no Despertai! Okuti upondola okuundapa ngomukokoli-ndyila wapola pokati mohanyi ya Tyikukutu opo uundape unene movilinga ovio?
4. Omokonda yatyi tuhandela ovanthu veye Kehinangelo?
4 Vana maveya Pehinangelo, mavapewa oumbangi! Ovo mavatehelela ohole onene ya Jeova mokuaava ofeto yeyovo. (João 3:16) Ovo mavelilongesa oñgeni Ouhamba wa Huku maukaetela ouwa ovanthu aveho. (Isa. 65:21-23) Tupu, mavapewa ondundo opo vapopie navana vokulekesa ovanthu povipundi, avaiti opo valongeswe Ombimbiliya. Tukahi nokulikuambela opo ovanthu ovanyingi vomutima waviuka veye okuliongiya nonthue Mehinangelo!