Ovilinga Viokukonga Ovanthu pala Ehinangelo lia Tatekulu Mavihimbika mu 17 ya Tyitalale
1. Ovilinga patyi mavihimbika mu 17 ya Tyitalale?
1 Kese enima Ehinangelo lia Tatekulu, lituhinangelesa ononkhia mba Jesus. (1 Cor. 11:26) Ngotyo, tuhanda vakuetu veye okuliongiya nonthue nokutehelela ofeto yeyovo Jeova aava noluembia. (João 3:16) Enima lino ovilinga vietu viokukonga ovanthu opo veye Pehinangelo lia Tatekulu, mavihimbika mo Tyasapalo 17 ya Tyitalale. Okuti ove ukahi nokulipongiya opo uundape unene movilinga ovio?
2. Oityi matupopi pokuava okamukanda oko?
2 Oityi Onthue Tupondola Okupopia: Otyiwa okuhapopi unene. Tupondola okuti: “Okamene. Onthue tuekuetela okamukanda kakonga ove nombunga yove pala otyipito tyakolela matyilingwa ouye auho monthiki 5 ya Tyikukutu. Makulingua elongomona malihangununa oityi ononkhia mba Jesus mbutulingila, netyi ekahi nokulinga pahetyino. Okamukanda aka kalekesa oola, nomphangu mapalingilwa eliongiyo olio potyilongo tyetu.” Tyina tulinga ovilinga ovio konthyulilo yosimano, tupu tupondola okuava omikanda inkha tyaviuka.
3. Oñgeni matukongo ovanthu ovanyingi?
3 Konga Ovanthu Ovanyingi: Ehando lietu okukonga ovanthu ovanyingi. Tupu, konga aveho Ulilongesa navo Ombimbiliya, na vana utalailapo, nombunga, na vana uundapa navo kukaputu, ine mulongeswa navo kosikola, no vomunthele yove, na vakuavo wii. Ovakulu vewaneno mavaave ehongolelo lio ñgeni otelitoliu yenyi mayundapwa aiho. Ovilinga vietu viokukonga ovanthu pala Ehinangelo lia Tatekulu, vihole okukuatesako ovanthu ovanyingi. Puetyi omukai umwe ankho aya no keliongiyo enima liokualamba, omunthu omukuavo emupopila okuti memukuatesako okuvasa omuivisi wemukonga. Mahi, omukai oo ati nawike eimo, mokonda wakongua komuhuka monthiki oyo, nomunthu ankho ukahi nokuivisa umbo-na-umbo.
4. Omahunga patyi tuna okuundapa nombili movilinga viokukonga ovanthu?
4 Pamwe omunthu umwe, meya Pehinangelo lia Tatekulu, mokonda ove wemukonga. Tyilinge ovanthu mavetavela ine kamavetavela, mahi no ngotyo, ononkhono molingi mambuave oumbangi. Okamukanda oko moave, makalekesa okuti Jesus pahe Ohamba yokuna epondolo. Ombili yove movilinga ovio, mailekesa kuaveho motelitoliu, no kovaivisi vakuenyi, haunene vali ku Jeova, okuti ove wapandula unene ofeto yeyovo.—Col. 3:15.