Yakulila Ombungo Yove

1. Oipi osapi yotyonge tyonthiki ike tyenima liovilinga lio 2013, iya oityi tyapongiyilwa?

¹ Kese nthiki, tukahi pokati kovipuka vipondola okutuhindila okuanya ombungo yetu yalongwa. Otyo otyonge tyonthiki ike tyenima liovilinga vio 2013 matyihimbika 1 ya Tungonkhe yo 2012, tyakalela nosapi yati: “Yakulila Ombungo Yove.” (1 Tim. 1:19) Otyonge otyo tyapongiyua ine tyafuiikwa opo tyikuateseko kese umwe puonthue, okutala vali nawa oñgeni tukahi nokuundapesa otyiavelwa otyo tyavilapo tuapewa Nomupakeko wetu.

2. Omapulo patyi avilapo maakumbululwa mokueenda kuotyonge?

² Tala nawa Ononthele Ombu: Otyonge matyikumbulula omapulo epanduvali avilapo konthele yombungo:

• Ovipuka patyi vipondola okupaka ombungo yetu motyiponga?

• Oñgeni matulongo ombungo yetu?

• Oñgeni tupondola okukala tyasukuka ohonde yovanthu aveho?

• Okusoka nokulinga ovipuka monkhalelo yelikuata nonondonga mbo Mbimbiliya, tyilekesa tyi konthele yetu?

• Oñgeni matulityilika okuihamesa omutima wa vakuetu tyina tulinga omatokolo etu muene?

• Vakuendye novafikuena, oñgeni mamutualako okukoleleya tyina muhongiliyua okulinga ovivi?

• Ouwa patyi ukala na vana valandula omutima wavo uhongolelwa na Huku?

3. Oñgeni otyonge matyitukuatesako?

³ Nombatelo ya Jeova, tupondola okuliyakulila kovipuka Satanasi alinga opo anyone omutima wetu. Mondaka ya Huku neongano liae Tate yetu keulu ukahi nokutupopila, okuti: “Ondyila Oyei. Endeleimo.” (Isa. 30:21) Otyonge etyi onkhalelo imwe ya Jeova yokuavela ehongolelo. Moluotyo, lipongiya ine lifuiika nawa opo ukalepo onthiki aiho yotyonge. Tehelela nawa, nokutala oñgeni moendesila omuenyo wove monondonga ombo. Tompholei konthele yotyonge otyo mombunga. Okuendela monondonga tupewa, matyitupameka opo tutualeko ‘okukala nomutima omuwa.’ Tupu matyitukuatesako okuanya okuyondyua nouye wa Satanasi okulinga ovipuka vipondola okunyona oupanga wetu na Jeova.—1 Ped. 3:16.