Hetekelei Ongeleka Yovauli—Amosi
1. Omokonda yatyi ongeleka ya Amosi itupameka?
1 Okuti pamwe ulitehela okuti kuafuilepo pala okuivisa onondaka onongwa mokonda kualongesilwe unene mosikola? Inkha ongotyo usoka, pameka omutima okuhetekela Amosi. Amosi wekula vala nokulisa onongi nokulima, etyi nkhele eheneholovonwe opo akaivise onondaka mba Jeova. (Amós 1:1; 7:14, 15) Na hono Jeova uundapesa ovanthu vahankhimanene nokueliola omutima. (1 Cor. 1:27-29) Oityi movilinga vietu viokuivisa tupondola okulilongesila komuuli Amosi?
2. Omokonda yatyi tupondola okutualako tyapama tyina tuluiswa movilinga viokuivisa?
2 Kala Tyapama Tyina Uyalwa: Etyi Amasia omunene-nakwa omufendi wotyilolo tyonthane ankho ukala kokulio kuomihoko ekwi vio Isilayeli, eiva omaulo a Amosi, emupopila okuti: ‘Enda keumbo liove! Tuyeke! Onthwe tuna ongeleya yetu!’ (Amós 7:12, 13) Amasia apililika onondaka mbomuuli, opo aite Kohamba Jeroboau iilike ovilinga via Amosi. (Amós 7:7-11) Mahi Amosi katilile owoma. Hono ononkhalamutwe mbonongeleya vapopia novatumini opo vetyivile okulwisa ovanthu va Jeova. Mahi, Jeova utupameka okuti kutupu outa nawike wovola okutulwisa mautyivili.—Isa. 54:17.
3. Ovipuka patyi vivali tuivisa hono?
3 Okuivisa Ekoyeso lia Huku Nouwa Mauya Komutwe: Namphila Amosi aula ekoyeso liouhamba womihoko ekwi vio Isilayeli, wahoneka omukanda Wombimbiliya wihanua nenyina liae, muna omilao via Jeova viokupilulula ovipuka nokueta oviwa ovinyingi. (Amós 9:13-15) Onthwe tuivisa ‘onthiki ya Huku yekoyeso’ ikahi popepi, mahi hatyo vala tuivisa “monondaka onongwa mbouhamba”. (2 Ped. 3:7; Mat. 24:14) Tyina Jeova amahanyaunako onondingavivi mo Armagedom otyo matyiikula ondyila yomphangu yombembwa pano pohi.—Sal. 37:34.
4. Onthumbi patyi tuna yokuti Jeova metukuatesako opo tulinge ehando liae?
4 Okuivisa onondaka Mbouhamba mouye weyula onondyale tyotyili tyilola etokolo lietu liokulinga etyi tyelikuata nelipakulo lietu nokulinga ehando lia Jeova. (João 15:19) Anthi, tuna onthumbi yokuti Jeova metuavela atyiho tusukisa opo tulinge ehando liae, ngetyi alingile Amosi.—2 Cor. 3:5.