Okuyawisa Ounongo Wetu Wokuivisa​—Mokuhoneka Vana Vesuka

“Litala nawa ove muene, nondongeso yove.”(1 Tim. 4:16) Elondolo olio lia Huku apostolu Paulu avelele Timóteo lilekesa okuti, tyilinge tuvepa ine tuandapale kohale, tuesukisa okulinga ononkhono mbokuyawisa ounongo wetu. Etyi matyitukuatesako, onthele omphe ina osapi yati: “Okuyawisa Ounongo Wove Wokuivisa,” maiya-ya Movilinga Vietu Viouhamba. Kese nthele maipopi esilivilo liounongo nonondonga tuesukisa okulandula. Mokueenda kuohanyi, atuho matupewa ondundo pala okutala nawa ounongo oo. Tyina ohanyi yamapu, Eliongiyo Liovilinga, mamukala onthele maituavela omphitilo yokupopia konthele younongo oo. Ohanyi oyo, matupewa ondundo opo tutyivile okukoneka nawa vana vesuka notyili.

Omokonda Yatyi Tyesukisila: Opo tufuisepo nawa ovilinga vietu, tuna okulinga vali tyipona okuivisa vala. Tuna okutalelapo vana vesuka notyili nokuvelongesa, nokuyaveka ombuto yotyili tuakuna. (Mat. 28:19, 20; 1 Cor. 3:6-9) Otyo tyesukisa okuvasa vali ovanthu tuapopile navo, nokutomphola konthele yetyi tuapopile nokupameka etompho tuali navo. Mahi, tyina tuamavasi omunthu wesuka, otyiwa tuhoneke enyina liae naapa akala.