Ombuto Ina Okutapelelwa opo Ikule
1. Oityi tyina okutapelelwa opo tyikule?
1 Ombuto yakunwa motyitaka ina okutapelelwa opo ikule. Tupu nombuto yotyili ikunwa momitima viovanthu motelitoliu yetu, ina okutapelelwa. (1 Cor. 3:6) Onthue tuna okukondoka okuvetalelapo opo tutapelele ombuto oyo no Ndaka ya Huku, inkha tuhanda imene, aikulu, aiyaave ovinyango.
2. Oñgeni matukuatesako omunthu okukala nesuko liokutaleluapo vali?
2 Linga Epulo: Tyina upongiya etyi mokapopia, oityi uhapongiyila epulo lietesa olumbwe, mokakumbulula onthiki ukondoka ko? Pokumanuhula etompho liotete linga epulo, iya oovola omuvo wokukondoka ko. Ovanyingi vaimbuka okuti otyiwa okuholovona epulo momukanda Ombimbiliya Ilongesa, opo vahimbikileko elilongeso lio Mbimbiliya.
3. Oityi wesukisa okuhoneka tyina wamavasi omunthu wesuka?
3 Honeka: Tyina wamamane okupopia nomunthu otyikando tyotete, ovola omuvo wokuhoneka etyi muapopia. Honeka enyina liae naapa akala. Tupu, otyiwa okuhoneka onthiki noola wapopia nae, netyi wapopia nae, nomukanda wemuavela, inkha wemupa. Okuti oe wati unale ongeleya yae? Una omukai novana? Okuti wapopia etyi asuka natyo netyi tyimulingisa otyiho? Okuhoneka atyiho otyo, matyikukuatesako okusoka etyi mopopi pokumutalelapo vali. Tupu, honeka onthiki mokondokako nepulo mokakumbulula.
4. Oityi tuesukisila okutualako okukatalelapo ovanthu vokuesuka?
4 Pwa Elundu: Satanasi malingi apeho ononkhono ‘mbokupola ondaka’ yakunwa momutima wovanthu. (Mar. 4:14, 15) Moluotyo, uhayekepo okutalelapo ovanthu pomaumbo avo, namphila tyepuiya okuvasa vana vesuka. Okuti upondola okutumikisa omukanda ine okusa omukanda pombuelo yepito? Omukokoli-ndyila umwe, wahimbika okulilongesa nomukai umwe pombundi, mahi kemuvasailepo vali. Moluotyo, emutumikisa omukanda. Onthiki omphange emuvasa vali peumbo, omukai oo ahambukwa unene, mokonda omphange walekesa okuti wasuka nae. Putyina tutapelela ombuto yotyili, tukala nehambu liokutala etyi imena, netyi ikula, iya “aiyaave ovinyango, omakwi etatu, nomakwi epandu, nomakwi ekwi alamba.”—Mar. 4:20.