Hetekela Ekolelo Liavo
1. Omukanda patyi matulilongesa Melilongeso Liombimbiliya Mewaneno mu 19 ya Kulindi yo 2015?
1 Mokueenda kuosimano 19 ya Kulindi yo 2015, Melilongeso Liombimbiliya Mewaneno, matuhimbika okulilongesa omukanda, Hetekela Ekolelo Liavo. Omukanda oo upopia ovalume novakai 14 vali nekolelo, vapopiwa Mombimbiliya. Omukanda oo walingwa monkhalelo itukuatesako okusoka kovanthu ovo vali nekolelo ngatyina nkhele vena omuenyo. Utukuateseko okuvesoka ngatyina nkhele ovanthu ovo vena omuenyo, iya atunoñgonoka nawa ovitateka vali navio momuvo ankho vaumbila Jeova. Tupu utulongesa oñgeni ovipuka ovanthu ovo valingile vipondola okutukuatesako opo tutyivile okuendelamo hono.—Heb 6:12.
2. Hangununa oñgeni omukanda Hetekela Ekolelo Liavo walingwa.
2 Oñgeni Walingwa: Omukanda oo una omapa ilekesa omuvo ovanthu ovo valiko iya novilongo oku ankho vakala. Tyihe-otyo vala, kese kapitulu kena onondaka mbokumanuhula mbati, “Soka Kuetyi . . . . ,” mambutukuatesako okusokolola kovanthu ovo iya atuendela muetyi onongeleka mbavo mbutulongesa. Tupu waundaiswa nawa, una ovipuka ovikuavo vitulongesa, iya nomalutalatu aovololwa nawa, maetukuatesako okunoñgonoka omahipululo oo.
3. Oityi tuna okulinga opo tupolepo ouwa pokulilongesa omukanda oo?
3 Oñgeni Ove Upondola Okupolako Ouwa: Omukanda oo una onondaka mbahonekwa Nononkhalamutwe mbo Nombangi mba Jeova, mbutupameka nonondaka mbati: “Tyina utanga soka kuetyi utanga, linga ngatyina ankho opo ukahi. Ovola okulitehela ngetyi ovanthu ovo ankho velitehela, tala etyi vamwene. Soka etyi ovanthu ovo valingile etyi vakala notyitateka tyimwe otyeeleka netyi ove ñgeno walinga ankho ove.” Mahi okusoka oko kuapopiwa, hakufwanyekako, mahi okusoka kuetyi tupondola okulilongesila komunthu oo wapopiwa iya osokolola kovanthu valipo. Okulinga ngotyo tyesukisa omuvo iya nokusokolola. (Nee. 8:8) Ankho onthele maililongeswa ihimbikila pokati kokapitulu, omuendesi wesukisa okupopia katutu etyi tyelilongeswa monthele yokualamba monosengudu mbehehi 30 ine 60. Tupu upondola okulinga epulo like ine evali pala okupitulula putyina onthele muelilongesa ihena okasapi kati “Soka Kuetyi . . . ”
4. Omokonda yatyi tuesukisila okulilongesa omukanda Hetekela Ekolelo Liavo?
4 Tukahi mouye umwe muna ovanthu apeho vaovola okunyona ekolelo lietu, mononkhalelo mbelikalaila. Tyilinge omukanda oo, tyilinge ononthele mbao mbukahi Momutala Womulavi, omu omukanda oo wapolua—otyali tuapewa na Jeova pala okupameka ekolelo lietu. (Tia. 1:17) Tuovolei okupola ouwa kelilongeso liomukanda oo, mokueenda apeho komaliongiyo nokuava omakumbululo Melilongeso Liombimbiliya Mewaneno!