Longesa Nawa Nomukanda Kalako Nomwenyo Apeho! Opo Ovalongwa Wove Vanoñgonoke Nawa Siovaa na Sesusi

Opo ovalongwa vetu valinge evi vihambukiswa Huku, tete vena okutavela okuti oko ekahi. (Heb. 11:6) Mahi matulingi ñgeni tutyivile okuvekuatesako vakale omapanga a Huku? Tuna omukanda Kalako Nomwenyo Apeho! Omukanda oo, uhangununa nawa ovipuka. Una ono tesitu omulongwa esukisa okukwata nawa, nomapulo ekahi nawa, nono vidiu, nomalutalatu. Tuna okukuatesako omulongwa akale epanga lya Huku, alingi umwe etyi Huku akevelela kovanthu vae. Ine otyo tulinga pokulongesa, ngotyo tuna nokutunga novipuka viakola, viahapi notupia. — 1 Kol. 3:12-15.

Ovanthu vamwe vasoka okuti katyitavela okulinga epanga lya Huku mokonda kamonwa komaiho. Pahe onthwe otyilinga tyetu, okulongesa nawa ovanthu ovo vanoñgonoke nawa Huku, avemuyumbu onthumbi.

TALA OVIDIU YATI: PAMEKA EKOLELO MU SIOVAA NOMUKANDA “KALAKO NOMWENYO APEHO!” PAHE OKUMBULULA OMAPULO AA:

• Okutyi tutalela okuti omuhikuena tuamona movidiu wafwiika umwe nawa etyi alongesa omulongwa wae?

• Oñgeni etyivila okulongesa umwe nawa nomukanda wa Isaías 41:10, 13?

• Oñgeni omulongwa akala etyi atala ovidiu, netyi anoñgonoka nawa otesitu?

Ovanthu ovanyingi, kavanoñgonoka nawa oñgeni ononkhia mba Sesusi mbupondola okuvekuatesako. (Gal. 2:20) Pahe onthwe tuna okuvelongesa nawa, avanoñgonoka umwe nawa, avayumbu-ko onthumbi yokuti tyili Sesusi wevenkhila umwe.

TALA OVIDIU YATI: PAMEKA EKOLELO MU SESUSI NOMUKANDA “KALAKO NOMWENYO APEHO!” PAHE OKUMBULULA OMAPULO AA:

• Okutyi tutalela okuti omukuendye tuamona movidiu wafwiika umwe nawa etyi alongesa omulongwa wae?

• Oñgeni alongesa nawa nonthele imwe ili apa pokuati “Kuhande Okuovola Vali?”

• Omokonda yatyi omulongwa ena okulikuambelela, no onthwe muene atumuitilako momalikuambelo?