Pameka Oupanga Wove na Siovaa

OMANIMA aeho onongi ononyingi mba Siovaa mbuli nokukondoka mewaneno. Pahe soka ‘kehambu enene likala keulu’ tyina omunthu umwe amakondoka mewaneno! (Luka 15:7, 10) Inkha ove wakondoka mewaneno, kala tyityii okuti Sesusi no noandyu na Siovaa vahambukwa unene. Mahi tyina ukahi nokulikuatehila opo ukale vali noupanga wapama na Siovaa upondola okukala novitateka. Ovipi? Oñgeni motyivili okulambela movitateka ovio?

OVIPI OVITATEKA UPONDOLA OKUKALA NAVIO?

Ovanthu ovanyingi tyina vakondoka mewaneno vasoka vala ovipuka ovinyingi. Inkha no ove otyo uhole okusoka ngotyo, opo naina muelifwa umwe nohamba Daviti, nae otyo alingaile. Namphila ankho aevelua-le mahi nkhele apopi vali okuti: “Oviponyo viange viandemena unene.” (Sal. 40:12; 65:3) Tyina omunthu umwe amakondoka ku Siovaa upondola okukalaila vala tyokulivela onombei, akala natyo omanima omanyingi. Omphange Isabelle,a wakalele omanima 20 tyapolwa mewaneno, wati: “Ame ankho hitavela okuti Siovaa wandyeevela umwe.” Ngwe okusoya unene omunthu ketyivili okupameka oupanga wae na Siovaa. (Pro. 24:10) Ove wahayeke omalusoko ngoo ekunyone.

Ovakuavo vasoka okuti kavetyivili vali okupameka oupanga wavo na Siovaa. Omukulu utiwa o Antoine etyi pahe akondoka mewaneno apopi okuti: “Ame nalimbuako ovipuka ovinyingi nelilongesile puetyi Ndyimbangi.” Ovanthu vamwe mokonda yokusoka ngotyo, kavetyivilile okuundapa nawa movilinga vya Siovaa.

Mongeleka, tyina omunthu ahanda okupindula-po ondyuo yae yawa, utyii okuti mesukisa okulinga ononkhono, tupu mamanena-po omuvo omunyingi. Tyelifwa notyo, inkha wanyona oupanga wove na Siovaa mokonda yonkhali imwe walinga, ove upondola okusoka okuti mapakala ehimbwe, apa wakapamekela vali oupanga wove na Siovaa. Mahi pena ovipuka vipondola okukukuatesako.

Siovaa wetupopila okuti: “Endyuei tutomphole iya ame mandyimukuatesako atuviukisa oupanga wetu.” (Isa. 1:18) Ove welikuatehila-le opo ‘uviukise oupanga’ wove na Siovaa. Siovaa ukuhole unene mokonda uli nokulinga ononkhono. Soka kuetyi: Etyi walinga tyihambukiswa Siovaa, tyilekesa okuti Satanasi onkhembi! — Pro. 27:11.

Mokonda wakondoka mewaneno ove wafuena ku Siovaa nae mafuene kuove. (Tia. 4:8) Mahi vakuenyi okukunoñgonoka okuti pahe wakondoka mewaneno katyituuka. Ove wesukisa okulinga ononkhono, mbokulekesa okuti uhole umwe Siovaa, Oe epanga liove, o Tate yove. Oñgeni upondola okutyilinga?

TYINA UPAMEKA OUPANGA WOVE NA SIOVAA PANGA OKULINGA OVIPUKA UVILA

Panga ovipuka molingi. Tyipondola hamwe uhinangela, ovipuka welilongesa, ankho wii nawa Siovaa, wii nawa omphangu Yombembwa. Mahi pahe wesukisa okutualako okulinga ovipuka vipameka oupanga wove na Siovaa, okuivisa onondaka onongwa, nokuenda apeho komaliongiyo nokukala nokuna na vakuenyi mewaneno. Tala vimwe upondola okupanga okulinga.

Likuambela apeho ku Siovaa. Siovaa utyii okuti okulivela onombei matyikulingisa ohelikuambela kwe. (Loma 8:26) Namphila molivele onombei, mahi linga ononkhono ‘mbokulikuambela’ ku Siovaa omupopila okuti uhanda okulinga epanga liae. (Loma 12:12) Omukulu umwe utiwa o Andrej wati: “Ame ankho tyinkhundisa okulikuambela. Mahi ankho apeho tyina namelikuambela tyinkhalesa nawa. Ndyitula omutima.” Inkha utala onondaka mopopi pokulikuambela utupu, tanga vala elikuambelo lya Daviti, elikuambela alingile etyi elivela livasiwa mo Salmo 51 neli lili mo 65.

Lilongesa apeho Ombimbiliya. Inkha ulinga ngotyo, ove mopameka oupanga wove na Siovaa omuhumbu vali unene. (Sal. 19:7-11) Omukulu umwe utiwa o Felipe wapopia okuti: “Mokonda ankho hipameka-le oupanga wange na Siovaa, andyitende umwe, andyiyekepo Siovaa. Pahe etyi nakondoka ku Siovaa, andyihimbika okulinga elilongeso liange lioulike ndyiliyakulile.” No ove otyo ulinge. Inkha kueete etyi upondola okulilongesa melilongeso liove lioulike, ita ku mukuenyi epanga liove una oupanga wapama na Siovaa ekukuateseko.

Upiliya vali oupanga wove na vakuenyi mewaneno. Vamwe tyina vakondoka mewaneno valinga otyiho, vati hamwe mewaneno mavevetale omapita. Umwe utiwa o Larissa wapopia okuti: “Ame ankho nakunda, ankho ndyisoka okuti vakuetu mewaneno neveenda konyima. Otyipuka otyo netyisoka ehimbwe.” Mahi ovakulu vewaneno na vakwenyi mufenda navo, mavekukuatesako, okala vali noupanga wapama na Siovaa. (Tala okakasa kati “Etyi Ovakulu Vewaneno Vapondola Okulinga.”) Ovakuatate ovo vahambukwa unene etyi wakondoka, vahanda no ove uhambukwe! — Pro. 17:17.

Oityi upondola okulinga ukale vali nomapanga mewaneno? Linga ovipuka ngwe valinga, okueenda komaliongiyo aeho nokuenda movilinga viokuivisa. Oñgeni ovipuka ovio mavikukuatesako? Umwe utiwa o Felix wati: “Vakuetu mewaneno vahambukilwe unene etyi nakondoka. Otyo atyinkhalesa nawa, andyityimono okuti naina ndyisilivila. Aveho mewaneno vankhuatesako, andyinoñgonoka okuti Siovaa wandyevela.” — Tala okakasa kati “Ovipuka Upondola Okulinga.”

UHAYEKE-KO TUALAKO!

Satanasi matualako okuovola okukulola tyina ove ulinga ononkhono mbokupameka oupanga wove na Siovaa. (Luka 4:13) Likuatehila upameke oupanga wove na Siovaa pehepano.

Siovaa onongi mbae wembuti: “Yokuavomba, mandyikeyovola, yokuayapuka po nonkhuavo mandyikeikondola-po, yokuateka mandyiikutu, yokuavela mandyiipameka.” (Eze. 34:16) Siovaa wakuatesako-ale ovanthu ovanyingi vemuyekele-po. No ove mekukuatesako.

Etyi Ovakulu Vewaneno Vapondola Okulinga

Ovakulu vewaneno vena otyilinga tyokukuatesako vana vakondoka mewaneno vakale noupanga wapama na Siovaa. Tala ovipuka vapondola okulinga.

Okuvepameka. Omu Apositolu Paulu wapopile okuti omunthu walinga onkhali elivele upondola ‘okusoya mokonda yokuanumana unene.’ (2 Kol. 2:7) Tupu okukondoka mewaneno tyipondola okumukundisa okuti hatyo etyimusoyesa. Paulu wapopilile ovakulu vewaneno okuti: ‘Mulingei okankhenda, amumuevela, amumupameka.’ Vokuapolwa mewaneno vena okuhinangela okuti, tyati umwe Siovaa uvehole ava vakuavo navo vevehole. Inkha ovakulu vewaneno vevepandula matyivekuatesako avahasoyo.

Okuvelingila elikuambelo. “Elikuambelo liomuviuki lina ononkhono ononene.” (Tia. 5:16) Larissa, tuapopia-le wati: “Ankho ndyipopila ovakulu vewaneno ovipuka vinthilisa owoma. Ngwe avandingila-ko omalikuambelo. Andyityimono okuti naina kavaniangele. Etyi ankho vahanda okunkhuatesako ndyikale vali noupanga wapama na Siovaa.” Umwe utiwa o Theo wati: “Omalikuambelo ovakulu vewaneno ankhuatesako, andyityimono okuti Siovaa tyili unthyole umwe, utala ovipuka oviwa mu ame.”

Okulinga oupanga navo. Vana vakondoka mewaneno vesukisa okukala nomapanga. Omukulu umwe wewaneno utiwa o Justin wapopia okuti: “Otyiwa okuenda movilinga viokuivisa navana vakondoka mewaneno, tupu otyiwa okuenda pomaumbo avo. Tyesukisa unene okukala omapanga avo!” Omukulu omukuavo wewaneno utiwa o Henry wapopia okuti: “Ine ovanthu mewaneno vamona okuti ovakulu vewaneno valinga oupanga na ava vakondoka mewaneno, navo otyo mavalingi.”

Okuvekuatesako okulilongesa. Epanga liapama motyili lipondola okukuatesako mukuavo wakondoka mewaneno alingi ovipuka vipameka oupanga wae na Huku. Omukulu umwe wewaneno utiwa o Darko wapopia okuti: “Ame ndyihambukwa unene okupopila vakuetu ovipuka nelilongesa andyivipopi nehambu. Tupu pamwe ndyiovola omuvo atulilongesa navo otyipuka tyimwe.” Omukulu omukuavo wewaneno utiwa o Clayton wati: “Ame ndyivepopila vakaovole omahipululo Ombimbiliya ovanthu vali novitateka ngo viavo.”

Okuventhita. Vokuakondoka mewaneno vamuene okuti ovakulu vewaneno ovakoyesi vonomphela, mahi pahe vena okuvemona okuti ovanthita. (Jer. 23:4) Inkha ove umukulu wewaneno, naina vetehelela nawa tyina vapopia, vepandula, popia navo apeho. Tala etyi omukulu umwe ehole okulinga, omukulu wewaneno utiwa o Marcus uhole okunthita ovanthu ngo ovo wati: “Tumupameka no tesitu imwe yo Mbimbiliya, atupandula ononkhono ekahi nokulinga, atumupopila okuti onthue tuahambukwa unene iya na Siovaa wahambukwa unene etyi wakondoka mewaneno. Tyina tuamamane okutomphola nae, atulilae onthiki matuya okutomphola vali.”

a Monthele ei, omanyina apilululwa.