OITYI MATYITUKUATESAKO OPO TUAHAYALE VAKUETU?

3 | Lipola Oundyale momutima Wove

Ombimbiliya Ipopia Okuti:

“Pilululei omalusoke enyi aakala omape opo munoñgonoke ehando ewa lya Huku, liafuapo, nokuapandwa.” — OVA LOMA 12:2.

Otyo Tyihangununa-tyi?

Ovipuka tusoka viesukisa unene ku Huku. (Jeremias 17:10) Onthwe tuhanda okulityilika okupopia oo okulinga ovipuka vimunumanesa. Okuyala vakuetu tyituka komutima. Ngotyo, tuna okulinga atyiho tuvila opo tuahasokelemo omapita vakuetu. Opo vala matutyivili ‘okupiluluka’ atuyekepo oundyale.

Oityi Ove Upondola Okulinga?

Tala umwe nawa oñgeni ulitehelela konthele yavakuenyi, haunene ovanthu votyivala otyikuavo, vakala kovilongo ovikuavo. Lipula okuti: ‘Oñgeni ndyivetala? Onkhalelo ndyivetala okuti ihongiliyua neetyi ame ndyii konthele yavo? Ine omokonda yokapungulula?’ Wahatale ovipuka mo Internet vipondola okukulingisa okuyala vakuenyi.

Ondaka ya Huku itukuatesako okulipola oundyale

Katyapepukile okunoñgonoka umwe nawa oñgeni tutala vakuetu. Mahi Ondaka ya Huku “ityivila okupunga omalusoke neetyi tyili momutima.” (Ova Hebeleu 4:12) Ovola okunoñgonoka etyi Ombimbiliya ipopia. Tala inkha etyi Ombimbiliya ipopia tyelikuata neetyi usoka iya olingi ononkhono mbokuendela muetyi ipopia. Ondaka ya Huku itukuatesako okulipola oundyale ukahi ngatyina “ovipuka viakola unene” vivasiwa momutima wetu. — 2 Ova Kolindu 10:4, 5.

Etyi Tyaendele na Umwe—STEPHEN

Wapilululile Onkhalelo Yae Yokusoka

Stephen nombunga yae ankho veyelwe unene novindele. Mokonda yotyo, anyingila motyikundyi tyimwe tyatyitukila-po ovatumini. Etyi pakala vali, akala ongangala. Stephen wapopia okuti: “Nthiki imwe, ame nomapanga ange, tuatalele osinema imwe ilekesa onya ovapika vatunda ko Afrika ankho valingwa no vo mo Estados Unidos. Atunumana unene mokonda yonya oyo, atuvete ovakuendye aveho ovindele ankho tutala navo osinema. Etyi tuatunda opo, atukaovola ovomunthele yetu ankho ovindele, opo tuvevete.”

Stephen apiluluka katutu-katutu etyi ahimbika okulilongesa Ombimbiliya no Nombangi mba Siovaa. Wapopia okuti: “Namphila ankho ndyina okapungulula, mahi pokati ko Nombangi namuene ovipuka ovinyingi vianthyuvisile. Mongeleka, etyi Ombangi imwe otyindele atunda-po, ovana vae evesila ombunga yovanthikovei. Tupu, ombunga imwe ovindele, avatekula omona umwe omunthikovei ankho uhena apa akala.” Stephen akala nonthumbi yokuti Onombangi mba Siovaa, vakuama onondaka mba Sesusi mbupopia okuti Ovakilisitau votyotyili, ovanthu velihole. — Suau 13:35.

Oityi tyakuatesako Stephen okuyekapo ovituwa ovivi? Otyetyi tyapopia Ova Loma 12:2. Stephen wati: “Andyihimbika okuimbuka okuti nesukisa okupilulula onkhalelo yange yokusoka. Ankho ndyina okupilulula omalusoke ange opo ndyikale omuna-mbembwa, nokuimbuka okuti, ei onkhalelo ongwa yomuenyo.” Apa Stephen ayekapo okukala nonyengo navakuavo, palambale omanima alamba po 40.