Sesusi ‘Walongokela-ko Okutavela.’

Sesusi apeho ankho utavela ku Siovaa. (Swau 8:29) Oityi Ombimbiliya yatila Sesusi “walongokela okutavela movipuka akondya-kondya navio?” — Hemb. 5:8.

Pweetyi Sesusi eli pano pohi, wakondyele novipuka ovinyingi viemwiihamene unene, ankho ehenekondye-ale navio keulu. Wamonesilwe ononkhumbi nononkhalamutwe mbonongeleya, walingilwe onya novatumini. (Mat. 26:59; Malu. 15:15) Namphila ovohe ankho vehole Siovaa, mahi ankho ovakwankhali. (Luka 2:51) Tupu ‘welipakele umwe koututu, etavela okunkhia,’ ononkhia mbumwe onombi mbemwiihamene unene. — Fili. 2:8.

Kovipuka Sesusi akondyaile navio walongokelele-ko otyipuka tyimwe otyinene ankho ñgeno ehelilongele-ale ine keile pano pohi, walongokelele-ko okutavela. Naina Sesusi Ohamba iviukisa, Omunene-Nakwa ukahi nawa, utweetehila-mo onkhenda. (Hemb. 4:15; 5:9) Sesusi wapandwa vali unene na Siovaa, pweetyi elilonga okutavela movipuka akondya-kondya navio. Noonthwe ine tulilonga okutavela ku Siovaa namphila tuna vimwe tuli nokukondya navio, Siovaa metupande vali unene, etwaavela ovilinga meongano liae. — Tia. 1:4.