Kala Omutaveli Nokukola Omutima Nga Kristu

“Kalei nomutima wakola! Ame nafinda ouye.”—JOÃO 16:33.

1. Jesus watuaileko okutavela ku Huku alo pi?

JESUS KRISTU ankho apeho ulinga ehando lia Huku. Naluike asokele okuhetavela ku Tate yae keulu. (João 4:34; Hebreus 7:26) Mahi, ankho katyapepukile okutavela, mokonda yovitateka amuene pano pohi. Tunde ponthyimbi yovilinga viae viokuivisa, onondyale mba Jesus, okukutikinyamo Satanasi, vaovolele okumuyondya, nokumukuluminya, ine okumukemba opo ayekepo okukala nekolelo. (Mateus 4:1-11; Lucas 20:20-25) Onondyale ombo mbaetelele Jesus omuihamo komutima no molutu. Okuhulililako avemuipaa okumupapela momuti wemone. (Mateus 26:37, 38; Lucas 22:44; João 19:1, 17, 18) Namphila amoneswa ononkhumbi ononene, Jesus watualako “okutavela alo kononkhia.”—Tanga Filipenses 2:8.

2, 3. Oityi tulilongesila ku Jesus watualako okutavela namphila amonesilwe emone?

² Okukala kua Jesus pano pohi, tyemulongesa ovipuka ovipe konthele yokutavela. (Hebreus 5:8) Mokutala Jesus ankho kesukisa vali okulilongesa konthele yokuumbila Jeova. Mokonda wakala na Jeova, omanima omanyingi unene eheiwe. Waundapa na Huku “ngomesene yovilinga,” pokuetako ovipuka aviho. (Provérbios 8:30) Anthi, pano pohi watuaileko nekolelo liae momuenyo wae auho, namphila amoneswa emone. Jesus Omona wa Huku, wekula mopamphepo. Oityi tulilongesila kongeleka yae?

³ Namphila Jesus ankho ehena nkhali, kaovolele okutualako okutavela kuetyi ahanda. Ankho ulikuambela ku Huku emukuateseko, opo atualeko okutavela. (Tanga Hebreus 5:7.) Nonthue opo tutualeko okutavela, tuesukisa okuliola omutima, atulikuambela apeho okuita ombatelo. Moluotyo, apostolu Paulu wapopila Ovakristau okuti: “Kalei nomutima nga una Jesus Kristu ankho ali nao.” Una “weliola omutima oe muene akala omutaveli alo pononkhia.” (Filipenses 2:5-8) Onkhalelo ya Jesus ilekesa okuti ovanthu vapondola okutavela, namphila vekahi mouye wovivi. Anthi, Jesus ankho utupu onkhali, iya onthue vakuankhali?

Tupondola Okutavela Namphila Tuvakuankhali

4. Okuatungwa nepondolo liokuholovona tyilekesa tyi kuonthue?

⁴ Huku watungile Andau na Eva nonondunge nepondolo liokuholovona etyi vahanda. Tupu, nonthue vana vavo, tuna epondolo liokuholovona. Otyo, tyilekesa tyi? Tyilekesa okuti tupondola okutokola okulinga oviwa ine ovivi. Tupu, tyilekesa okuti Huku wetuavela epondolo liokuholovona okutavela kwe ine okuhetavela. Mahi, eholovono olio omutengi tuakutilwa matukapulwa. Ngotyo, omatokolo etu maetutuala komuenyo ine okononkhia. Tupu, omatokolo etu maavatela vakuetu ine okuvenyona.

5. Ovilwa patyi onthue atuho tuna? Oñgeni matutyivili okuliyakulila?

⁵ Mokonda tuapiñgana onkhali, okutavela katyiya vala atyike. Hapeho okutavela ovitumino via Huku tyapepuka. Paulu wali novilwa ovio. Oe wahoneka okuti: “Ndyiivite molutu luange otyitumino otyikuavo tyikahi nokulwa notyitumino tyomutima wange, nokunthuala ngonkhuatwa kotyitumino tyonkhali tyikahi molutu luange.” (Romanos 7:23) Tyotyili, tyina tyehesukisile okulinga ononkhono, nomuihamo, ine otyimue tyitutyilika, okutavela tyapepuka. Mahi, tulinga ñgeni tyina ehando lietu liokutavela liluiswa “nepeleyo liolutu, nepeleyo liomaiho”? Tukala nomahando oo omavi mokonda youkuankhali nokuhongiliyua nononkhono mbo mouye mbuna epondolo enene. (1 João 2:16; 1 Coríntios 2:12) Opo tutyivile okufinda, tuna ‘okupongiya omutima wetu,’ tyina nkhele tuhenevasiwe novitateka ine omahongiliyo. Tuna okutokola okuti matutavela ku Jeova, muatyiho tyituvasa. (Salmo 78:8) Tuna onongeleka ononyingi Mbombiliya mba vana vetyivila okuliyakulila, mokonda ankho vapongiya omutima wavo.—Esdras 7:10; Daniel 1:8.

6, 7. Lekesa oñgeni elilongeso lioulike lipondola okutuvatela okulinga omaholovono aviuka.

⁶ Onkhalelo imue yokupongiya omutima wetu, okulilongesa nombili Ovihonekwa, nomikanda vipolwa Mombimbiliya. Soka ñgeno ove uvasiwa motyitateka etyi. Ñgeno otyinthiki tyove tyokulinga elilongeso liove lioulike. Welikuambela okuita ononkhono mba Jeova mbukuvatele okuendela muetyi ulilongesa Mondaka yae. Mahi, wasoka okukatala osinema imue mo TV, muhuka kounthiki. Pahe weiya okuti ovanthu vekahi nokupanda osinema oyo, iya ove utyii okuti mamukamoneka omaundalelapo noungangala.

⁷ Pahe osoko konondonga mba Paulu mu Efésios 5:3 mbati: “Oundalelapo, novipuka aviho viasila, ine elungavi, vihapopiwe pokati kenyi, ngetyi tyaviuka pala ovanthu ovasukuki.” Tupu uhinangela elondolo lia Paulu mu Filipenses 4:8 (Tanga.) Tyina usokolola nawa onondonga ombo mba Huku, ove ulipula okuti, ‘Inkha ndyikatala osinema oyo, okuti ndyikahi umue nokuhetekela Jesus okutavela ku Huku muaviho?’ Oityi ove molingi? Okuti nkhele no ngotyo moende okukatala osinema oyo?

8. Omokonda yatyi tuna okutualako okuendela movitumino viavilapo via Huku?

⁸ Okutomba etokolo lietu liokuendela movitumino via Jeova, owova. Pamue tusoka okuti ame napama unene ndyityivila okufinda oupanga omuvi, namphila muakutikinya oungangala novitalukiso viomaundalelapo. Anthi, tuna okuliyakulila onthue muene novana vetu, komahongiliyo a Satanasi. Ngetyi ovanthu valinga ononkhono opo velityilike omauvela elitambuliswa, nonthue tuesukisa okulunguka opo tulityilike komaliva a Satanasi. Okuti onthue tupondola okutepuluka kokukala tyalunguka okuliyakulila “komatutu Eliapu”?—Efésios 6:11, okatoi.

9. Kese nthiki tuna okutokola okutavela ku Jeova mokonda yatyi?

⁹ Kese nthiki, kuna ovipuka tuesukisa okuholovona okulinga etyi Jeova ahanda ine okuhalingi. Opo tukamone eyovo, tuna okutavela ku Huku, nokuendela movitumino viae viaviuka. Okulandula ongeleka ya Kristu yokutavela alo umue “pononkhia,” matulekesa okuti tuna ekolelo liotyotyili. Jeova meketuavela ondyambi, mokonda yekolelo lietu. Jesus walaa okuti: “Una wakoleleya alo konthyulilo, oe makayovolwa.” (Mateus 24:13) Otyo, tyihanda tukale nomutima wakola tyotyili, nga una Jesus ali nao.—Salmo 31:24.

Jesus Ongeleka Yavilapo Yokukola Omutima

10. Omahongiliyo patyi tupondola okuvasa, iya oñgeni matueyepe?

¹⁰ Pokati kouye uno, tuesukisa okukola omutima, opo tuliyakulile kovituwa viao viasila. Ovakristau vena okulwa nehongiliyo liovituwa, no lionombongo, no lionongeleya, viovola okuveyapula mondyila yaviuka ya Jeova. Ovanyingi valwa noundyale wombunga. Movilongo vimue okulongesa okuti ovanthu vatuka kovinyama tyikahi nokuliyawisa monosikola. Tupu, ovanyingi kavetavela okuti kuna Huku. Katupondola okutomba omahongiliyo oo aeho, atuhalingi natyike. Tuna okulinga ononkhono mbokuliyakulila opo tuliamene. Ongeleka ya Jesus itulekesa oñgeni matuliyakulila.

11. Oñgeni okusokolola nawa ongeleka ya Kristu tyitulongesa okukola omutima?

¹¹ Jesus wapopilile ovalongwa vae okuti: “Mouye mamumono ononkhumbi, mahi kalei nomutima wakola! Ame nafinda ouye.” (João 16:33) Jesus ketavelele okuyondyua nouye. Kayekele ouye umutyilike okufuisapo ovilinga viae viokuivisa. Kayekele ouye umuhindile okutomba ovitumino viefendelo liotyotyili novituwa viaviuka. Nonthue tuna okulinga ngotyo. Melikuambelo, Jesus wapopia konthele yovalongwa vae okuti: “Kavalingi onthele youye, ngetyi ame nahalingi onthele youye.” (João 17:16) Okulilongesa nawa omutima wakola Kristu ankho ena, nokusokolola kouwa tupolako, matyitupameka unene opo tutualeko tyeliyapuka nouye.

Lilongesila Ku Jesus Okukola omutima

12-14. Popia onongeleka mbulekesa okuti Jesus ankho utupu owoma.

¹² Jesus wakalele nomutima wakola unene movilinga viae viokuivisa. Tyihena owoma, Omona wa Huku “wanyingila mondyuo ya Huku ataatela pondye aveho ankho valanda nokulandesila mondyuo ya Huku. Ayendaula onomesa mbovatolokali vonombongo, novipundi via vana valandesa onopomba.” (Mateus 21:12) Etyi omatolopa eya okukuata Jesus otyinthiki tyae tyahulililako pano pohi, tyihena owoma, wapita komutwe pala okuamena ovalongwa vae ati: “Inkha . . . ame mukahi nokuovola, ava veyekei vaye.” (João 18:8) Etyi palamba okamuvo kehehi, oe apopila Petulu akondole omutunga wae motyilalo. Otyo, tyalekesa okuti Jesus ankho wayumba onthumbi mu Jeova, hamomauta ovanthu pano pohi.—João 18:11.

¹³ Tyihena owoma Jesus waholololele ovalongesi vehena ohole vomatutu kononthiki mbae, nomalongeso avo ounkhembi. Jesus wevepopile okuti: “Tatiei onwe vanongo vovihonekwa no va faliseu, vemphinia! Mokonda mukahi nokuyeililako ovanthu kombundi youhamba wo keulu.” Tupu ati, “Onwe muatomba ovipuka viakolela vali vio Vitumino, ngouviuki, nokankhenda, nekolelo. . . . Onwe musukula kondye okopo nelonga, mahi mokati mueyula esilo novivi.” (Mateus 23:13, 23, 25) Ovalongwa va Jesus ankho vesukisa okukola omutima ngotyo. Mokonda ononkhalamutwe mbonongeleya mbomatutu, tupu ankho mambuveyale nokuipaa po vamue puvo.—Mateus 23:34; 24:9.

¹⁴ Jesus ankho utupu owoma alo umue wovilulu. Onthiki imue elivasi nomulume watulwa novilulu. Ankho una ononkhono ononene nawike upondola okumukuta, nelienge ulitipaula. Tyihena owoma Jesus watundisamo ovilulu ovio ovinyingi ankho vimonesa omulume oo ononkhumbi. (Marcos 5:1-13) Hono, Huku kaavelele Ovakristau epondolo liokulinga omahuviso atyo oo. Nkhele movilinga vietu viokuivisa nokulongesa, nonthue tuna ovilwa na Satanasi, na vana ‘atuikisa omitima via vana vehetavela.’ (2 Coríntios 4:4) Nga Jesus, nonthue omauta etu, “haopahituko, mahi ena ononkhono ononene mu Huku, pala okuhanya ovipuka viatuituilwa nononkhono,” viokuna omii viaya unene kohi, mahi omalusoke ounkhembi onongeleya. (2 Coríntios 10:4) Okuundapesa omauta oo tuavelwa na Huku, matunoñgonoka vali nawa ongeleka ya Jesus.

15. Omokonda yatyi ankho Jesus ali nomutima wakola?

¹⁵ Jesus ankho wakola omutima, mokonda yekolelo, ha kononkhono mbae. Tupu, nonthue omo tuna okupamena. (Marcos 4:40) Oñgeni matukala nekolelo liotyotyili? Tupu, ongeleka ya Jesus itulekesa etyi tuna okulinga. Jesus ankho wanoñgonoka nawa Ovihonekwa, nokuna onthumbi aiho muvio. Jesus, kaundapesile omutunga wovanthu, anthi waundapesa omutunga wopamphepo, Ondaka ya Huku. Ovikando ovinyingi oe walekesa okuti etyi alongesa tyikahi mo Vihonekwa. Oe ankho pamue uhimbika okuti: “Tyahonekwa” okuti, Mondaka ya Huku.a

16. Oñgeni tupondola okukala nekolelo liapama?

¹⁶ Opo tukale nekolelo lipondola okufinda oundyale nomahongiliyo omakuavo, nonthue tuna okutanga Ombimbiliya kese nthiki. Tuna okuenda apeho komaliongiyo Ovakristau, nokupaka momitima vietu otyili tyipameka ekolelo. (Romanos 10:17) Tupu, tuna okusokolola nawa—okulipula nawa mombungo—evi tulilongesa, okuyeka vihike komutima wetu. Ekolelo liokuna omuenyo, olio vala lipondola okutukalesa nomutima wakola. (Tiago 2:17) Tupu, tuna okulikuambela okuita ospilitu ya Huku, mokonda ekolelo onthele yotyinyango tyayo.—Gálatas 5:22.

17, 18. Oñgeni omphange umwe alekesa omutima wakola etyi ekahi kosikola?

¹⁷ Omphange umwe omufikuena utiwa o Kitty, wetyimona oñgeni ekolelo liotyotyili likolesa omutima. Etyi nkhele omukainthu, wanoñgonoka okuti kapondola okukala “nohonyi yonondaka onongwa” kosikola. Iya oe ankho uhanda okuavela oumbangi omuwa vana alongeswa navo. (Romanos 1:16) Kese nima, ankho watokola okupopila vakuavo onondaka onongwa, mahi ulikondola mokonda yowoma. Etyi ekula, akalongeswa kosikola onkhuavo. Oe wati, “Otyikando etyi, mandyovola onomphitilo, ndyipingiye pomuvo napesela.” Kitty, welikuambela okuita omutima wakola ngo wa Kristu, nokukala tyipahi, nokuovola omphitilo yaviuka.

¹⁸ Onthiki yotete kosikola, ovalongwa vakuavo, vahimbika okukukunya nokulipula omanyina. Tupu, vapopia onongeleya omu vekulila, avayawisako okuti mahi kavaende apeho okukafenda. Kitty, aimbuka okuti oyo omphitilo aita melikuambelo. Etyi otyikando tyae tyehikapo, tyihena owoma ati! “Ame, ame Mbangi ya Jeova. Konthele yokufenda no yovituwa, ndyihongolelwa no Mbimbiliya.” Puetyi atualako nokupopia, vamue avahimbika okulipanena momaiho. Mahi, vakuavo avemutehelela nawa, konyima evemupulu. Omulongesi wavo apeho upopia ongeleka ongwa ya Kitty, konthele yokuamena ekolelo liae. Kitty, wahambukua unene mokonda welilongesila ku Jesus okukala tyihena owoma.

Kala Nekolelo Nomutima Wakola Nga Kristu

19. (a) Okukala nekolelo liotyotyili tyihanda tyi? (b) Oñgeni tupondola okuhambukiswa Jeova?

¹⁹ Ono apostolu navo vaimbukile okuti opo vakale nomutima wakola vena okukala nekolelo. Moluotyo, vaitile Jesus okuti: “Tuavele vali ekolelo.” (Tanga Lucas 17:5, 6.) Okukala nekolelo liotyotyili, hakutavela vala okuti Huku okuekahi. Tyihanda okukala noupanga omunene na Jeova nonthumbi mwe. Haupanga vala, nga una womona omututu na he wokankhenda noluembia. Kononkhono mba Huku, Salomau wahoneka okuti: “Mona wange, inkha omutima wove ukala nonondunge, nomutima wange tyotyili mauhambukwa. Iya onoso mbange mambuhambukwa, tyina omulungu wove upopia etyi tyaviuka.” (Provérbios 23:15, 16) Tupu, nonthue inkha tutualako okutavela ovitumino viaviuka, matyietela Jeova ehambu, mokonda tyitukalesa nomutima wakola unene. Moluotyo, tuhetekelei apeho Jesus, okukala tyihena owoma wokuamena ouviuki!

[Onondaka Poutoi]

[Olutalatu pefo 16]

Okuti ove ukahi nokupongiya omutima wove opo ufinde omakengelelo?

[Olutalatu pefo 18]

Tupondola okukala nomutima wakola nga Jesus, inkha tukala nekolelo

Okuti Ove Upondola Okuhangununa?

• Oityi matyituvatela okutualako okutavela namphila tuvakuankhali?

• Ekolelo liotyotyili lituka pi, iya oñgeni lipondola okuvatela okukola omutima?

• Okutavela nokukala nomutima wakola nga Kristu matyituetela tyi?