Vakuatate Muna Otyilinga Mewaneno Hetekelei Timotiu

MENIMA liokualamba, ovakuatate ovanyingi mouye auho vakala ovakulu vomawaneno novakuatesiko vavo. Inkha nove wapeua otyilinga otyo, wahambukwa unene mokonda yokuundapela Jeova, novakuatate vove monkhalelo oyo.

Tupu hamwe wasukalala notyilinga otyo. Jason, omukulu wewaneno omukuendye wati: “Etyi napewa otyilinga otyo, andyilitehelela okuti hafuilepo.” Moisesi na Jeremia ankho velitehelele okuti kavafuilepo etyi vapewa otyilinga otyipe na Jeova. (Êxodo 4:10; Jeremias 1:6) Inkha nove ulitehelela ngotyo, oityi upondola okulinga opo ukale nonthumbi iya otualako okukula motyili? Upondola okulilongesila unene kongeleka ya Timotiu.—Atos 16:1-3.

HETEKELA ONGELEKA YA TIMOTIU

Tyafuile Timotiu ankho una omanima 20 etyi ahimbika otyilinga tyokutalelapo omawaneno na apostolu Paulu. Etyi akongwa otyikando tyo tete, hamwe Timotiu welitehelele okuti kafuilepo opo alongese, nokuavela vakuavo onondonga mokonda ankho omukuendye vala. (1 Timóteo 4:11, 12; 2 Timóteo 1:1, 2, 7) Mahi atualako okukula motyili iya etyi palamba omanima ekwi Paulu apopila ovakuatate mo Filipu okuti: “Ame ndyikevelela ku Tatekulu Jesus okumutumikisa Timotiu apa katutu.” Omokonda yatyi Paulu ankho elitehelela ngotyo? Wahangununa okuti: “Ame ndyitupu vali omunthu omukuavo wafuapo ngae.”—Filipenses 2:19, 20.

Omokonda yatyi Timotiu ongeleka ongwa kovakulu vewaneno? Omokonda yomahunga epandu.

1. Ankho usuka unene novakuatate. Paulu wapopila ovakuatate mo Filipu okuti Timotiu ankho “mevetekula nawa.” (Filipenses 2:20) Timotiu ankho uhanda ovakuatate vae vatualeko noupanga omuwa na Jeova, iya ankho wafuapo opo aave omuvo no nonkhono mbae opo evekuateseko.

William, omukulu wewaneno omanima 20, apeho upopila ovakulu vewaneno ovape okuti: “Kalei nohole novakuatate. Talei komasukasuka avo, amuhatale vala kovitumino.” Uhakale ngomutahi wekalela usuka vala nokuhika moola yanakwa pana patalamena ovanthu, mahi ehesuku nokuyeka ovanthu avasa vanyingile mekalela.

2. Ankho upaka ovilinga vya Jeova pomphangu yo tete. Paulu wapopia okuti Timotiu welikalela novanthu ankho “vaovola vala ovipuka viavo muene, ha vya Jesus Kristu.” (Filipenses 2:21) Paulu waimbukile okuti ovakuatate vamwe ankho vesuka vala novipuka viomuenyo wavo. Ovikando vimwe ankho vapaka omasukasuka avo pomphangu yo tete tyipona ovilinga vya Jeova. Mahi Timotiu ankho welikalela! Tyina ankho ena omphitilo yokuundapa vali unene movilinga vya Huku, ankho ulinga ngomuuli Isaia etyi ati: “Ame uno! Nthume!”—Isaías 6:8.

Oñgeni upondola okupola pokati konthele yomasuka-suka ove, nomasuka-suka ewaneno? Tete, landula elondolo lya Paulu liati: “Punga nawa ovipuka viakolela vali.” (Filipenses 1:10) Paka ovilinga vya Jeova pomphangu yo tete. Vali, lityilika ovipuka vikumana omuvo omunyingi no nonkhono. Paulu wapopilile Timotiu okuti: “Tila omapeleyo oukuendye, mahi ovola ouviuki, nekolelo, nohole, nombembwa.”—2 Timóteo 2:22.

3. Ankho uundapa unene movilinga vya Jeova. Paulu wapopia konthele ya Timotiu okuti: “Waundapa ngomupika kumwe naame okuivisa onondaka onongwa, ngomona uundapa na tate yae.” (Filipenses 2:22) Timotiu ankho kanangele. Mahi waundapele unene na Paulu iya otyo tyapamekele oupanga wavo.

Hono, eongano lya Jeova lina ovilinga ovinyingi. Ovilinga ovio vitukalesa nawa iya mavikukuatesako okufuena vali ko vakuatate vove no nomphange. Ngotyo, kala nonthumbi yokuti apeho “uundapa unene movilinga vya Tatekulu.”—1 Coríntios 15:58.

4. Ankho wendela mu etyi elilongesa. Paulu wahonekela Timotiu okuti: “Ove walandula nawa ononkhalelo mbange mbokulongesa, nonkhalelo yomuenyo wange, nehando liange, nekolelo liange, noumphua-lundo wange, noluembia, nekoleleyo liange.” (2 Timóteo 3:10) Mokonda Timotiu ankho wendela muetyi elilongesa, wapelue vali ovilinga ovinyingi.—1 Coríntios 4:17.

Ove upondola okuovola omukulu wewaneno walongoka nawa opo umuhetekele. Tom, omukulu wewaneno omanima omanyingi, uhinangela etyi omukulu wewaneno ankho walongoka nawa emulekesa okuti wesuka nae iya emulongesa ovipuka ovinyingi. Wati: “Apeho ankho ndyimuita onondonga iya ankho ndyiendela muetyi amphopila. Otyo tyankhuatesako okuliyumba onthumbi.”

5. Watuaileko okulilongesa. Paulu walondola Timotiu okuti: “Lilongesa nehando liokukala nonthilo na Huku.” (1 Timóteo 4:7) Namphila omunthu wokusana ombola ena-le omulongesi, no ngotyo wesukisa okulilongesa oe muene. Paulu wapopila Timotiu okuti: “Tualako nokutangela mounyingi, nokuviyula nokulongesa. . . . Sokolola nawa kovipuka ovio, lipaka muvio, opo ovanthu aveho vetyimone okuti ukahi nokukula.”—1 Timóteo 4:13-15.

Nove wesukisa okuyawisa kounongo wove. Lilongesa nawa Ombimbiliya iya noñgonoka omahongolelo omape eongano liava. Uheliyumbe unene onthumbi. Otyiponga okusoka okuti mokonda wii ovipuka ovinyingi, upondola vala okutetulula kese tyitateka tyihesukisile vali okulinga omaovololo. Nga Timotiu, “tualako okulitala nawa ove muene, netyi ulongesa.”—1 Timóteo 4:16.

6. Wayumbile onthumbi mononkhono mba Jeova. Etyi Paulu apopia konthele yovilinga vya Timotiu viokuivisa, emuhinangelesa okuti: “Otyipuka otyo otyiwa wapewa, tyipaka nawa menyina liospilitu sandu ikahi mu onthue.” (2 Timóteo 1:14) Timotiu ankho wesukisa okuyumba onthumbi mononkhono mba Huku.

Donald, omukulu wewaneno omanima omanyingi wati: “Ovalume vena ovilinga mewaneno, vena okusuka unene noupanga wavo na Huku. Vana valinga ngotyo, ‘mavapame vali.’ Inkha velikuambela okuita ospilitu ya Huku iya avakala novituwa viotyinyango tyospilitu sandu, mavakala otyiawa tyakolela unene ko vakuatate vavo.”—Salmo 84:7; 1 Pedro 4:11.

PANDA OTYILINGA TYOVE

Tyipameka unene okutala ovakulu vewaneno ovape novakuatesiko vavo vatualako okukala ovanongo movilinga vya Jeova. Jason, wapopiwa konthyimbi, wati: “Mokueenda kuomuvo ou nakala omukulu wewaneno, nelilongesa ovipuka ovinyingi, iya onthumbi yange itualako okuliyawisa. Pahe ndyihole unene otyilinga tyange iya ku ame elao limwe enene!”

Okuti nove motualako okukula motyili? Inkha uhetekela Timotiu, mokala otyiawa tyakolela unene ko vakuatate vove no nomphange.