Omokonda Yatyi “Tutuailako Okuava Ovinyango Ovinyingi?”

1, 2. (a) Oityi Jesus apopilile ovalongwa vae motyinthiki tyahulililako etyi ehenenkhie? (Tala olutalatu pefo pahimbikila onthele.) (b) Omokonda yatyi tyakolela okuhinangela omahunga tuna okuivisa? (c) Oityi matulilongesa?

MOTYINTHIKI tyahulilila etyi Jesus ehenenkhie, watompholele unene novalongwa vae. Wevepopilile okuti uvehole unene. Tupu wevepopile onthengele-popia yomuvinyu, tuapopia monthele yokualamba. Jesus ankho uhanda okupameka ovalongwa vae opo “vatualeko okuava ovinyango ovinyingi,” tyilekesa okukoleleya movilinga viokuivisa Ouhamba wa Huku.—João 15:8.

² Mahi, Jesus kapopilile vala ovalongwa vae etyi ankho vesukisa okulinga, tupu wevepopilile omokonda yatyi ankho vesukisa okutyilinga. Weveavela omahunga alekesa omokonda yatyi ankho vesukisila okutualako okuivisa. Tyakolela nonthue tuhinangele omokonda yatyi tuesukisila okutualako okuivisa. Okusoka komahunga oo, matyituavela ondundo yokukoleleya tyina tuava “oumbangi movilongo aviho.” (Mateus 24:13, 14) Monthele ei, matulilongesa omahunga ekuana Ombimbiliya ituavela, opo tutualeko okuivisa. Tupu, matulilongesa ovipuka vikuana Jeova etuavela vitukuatesako okutualako okuava ovinyango.

TUHILIVIKA JEOVA

3. (a) Ngetyi tyipopia João 15:8, ehunga patyi liakolela vali tuna opo tuivise? (b) Monthengele-popia ya Jesus, omukuni ulekesa-tyi iya omokonda yatyi tupopila ngotyo?

³ Ehunga liakolela vali tuna litulunda okuivisa, omokonda tuhanda okunkhimaneka Jeova, nokusukukisa enyina liae. (Tanga João 15:1, 8.) Etyi Jesus apopia onthengele-popia yomuvinyu, waeleka Jeova nomukuni. Jesus welieleka nomuvinyu iya ovalongwa vae eveeleka nonompha. (João 15:5) Ngotyo, monthengele-popia oyo, onouva mbulekesa ovinyango ovalongwa va Jesus vaava, ine ovilinga viokuivisa. Jesus wapopilile ono apostolu mbae okuti: “Tyina onwe mutualako okuava ovinyango ovinyingi, otyo tyinkhimaneka Tate yange.” Tyina omuvinyu waava onouva mbukahi nawa, otyo tyinkhimaneka omukuni. Tupu, tyina tulinga atyiho tuvila movilinga viokuivisa Ouhamba, onthue tunkhimaneka Jeova.—Mateus 25:20-23.

4. (a) Oñgeni onthue tusukukisa enyina lya Huku? (b) Oñgeni ulitehelela konthele yelao una liokusukukisa enyina lya Huku?

⁴ Enyina lya Huku liasukuka-le. Petupu natyike tupondola okulinga opo lisukuke vali. Ngotyo, oñgeni tusukukisa enyina lya Huku tyina tuivisa? Tala etyi tyapopia omuuli Isaia, etyi ati: “Jeova wonongombo mbovita, Oe watokala okuihanwa okuti omusukuki.” (Isaías 8:13) Tusukukisa enyina lya Huku, Jeova, tyina tulitala ngatyina liavilapo vali komanyina aeho, natyina tukuatesako vakuetu okunoñgonoka okuti enyina olio esukuki. (Mateus 6:9; okatoi) Mongeleka, tyina tuivisa kovanthu otyili konthele yovituwa vihuvisa vya Jeova, netyi ahandela ovanthu, tukuatesako vakuetu okuimbuka okuti ovipuka aviho ovivi Satanasi apopia konthele ya Jeova omatutu. (Gênesis 3:1-5) Tupu, tusukukisa enyina lya Huku tyina tukuatesako ovanthu okunoñgonoka okuti Jeova oe watokala “okupewa omunkhima, nehumbilo noutumini.” (Apocalipse 4:11) Rune, omukokoli-ndyila omanima 16, wati: “Okunoñgonoka okuti napewa omphitilo yokukala ombangi Yomutungi wovipuka aviho, tyinthyambukiswa. Otyo tyimpha ondundo yokutualako okuivisa.”

TUHOLE JEOVA, NOMONA WAE

5. (a) Ehunga patyi liokuivisa livasiwa mu João 15:9, 10? (b) Oñgeni Jesus akuatesileko ovalongwa vae okunoñgonoka okuti ankho mavesukisa okukoleleya?

⁵ Tanga João 15:9, 10. Ehunga lya vali litulunda okuivisa onondaka onongwa Mbouhamba wa Huku, omokonda tuhole Jeova na Jesus. (Marcos 12:30; João 14:15) Jesus wapopilile ovalongwa vae okuti vena ‘okutualako mohole yae.’ Omokonda yatyi Jesus apopia onondaka ombo? Omokonda Jesus ankho utyii okuti ovalongwa vae mavesukisa okukoleleya opo vakale Ovakristau votyotyili. Mu João 15:4-10, Jesus wapopia unene ondaka “okutualako” opo akuateseko ovalongwa vae okunoñgonoka okuti ankho mavesukisa okukoleleya.

6. Oñgeni tulekesa okuti tuhanda okutualako okukala mohole ya Kristu?

⁶ Oñgeni tulekesa okuti tuhanda okutualako okukala mohole ya Kristu, nokupandwa nae? Oputyina tumutavela. Jesus ukahi vala nokutuita tulinge etyi nae alingile. Wati: “Ndyitualako okukala mohole ya Tate, mokonda ndyiendela movitumino viae.” Jesus wetuhila ongeleka.—João 13:15.

7. Oñgeni okutavela tyelikuata nohole?

⁷ Jesus walekesa nawa okuti okutavela tyelikuata nohole, etyi ati: “Una utavela ovitumino viange iya aendelamo una ohole naame.” (João 14:21) Ovitumino vya Jesus viatunda ku Tate yae, ngotyo tyina tutavela otyitumino tya Jesus tyokuivisa, tupu tukahi nokulekesa ohole ku Jeova. (Mateus 17:5; João 8:28) Iya tyina tulekesa ku Jeova na Jesus okuti tuvehole, tutualako okukala mohole yavo.

TULONDOLA OVANTHU

8, 9. (a) Ehunga patyi ekuavo litulunda okuivisa? (b) Oñgeni onondaka mba Jeova mbuvasiwa mu Ezequiel 3:18, 19 no 18:23, mbutulunda okutualako okuivisa?

⁸ Ehunga liatatu litulunda okuivisa, omokonda tuhanda okulondola ovanthu konthele yonthiki ya Jeova ikahi nokuya. Ombimbiliya ipopia okuti Noe ankho “omuivisi.” (Tanga 2 Pedro 2:5.) Etyi Ombila Onene iheneye, monondaka Noe apopilile ovanthu, ankho muakutikinya elondolo konthele yehanyauno likahi nokuya. Omokonda yatyi tupopila ngotyo? Omokonda Jesus wati: “Ovanthu vali kononthiki mbatyo ombo, etyi Ombila Onene iheneye, ankho valia, vanwa, ovalume vanepa, ovakai vanepwa, alo onthiki Noe anyingila mowato. Ankho kavasukile, alo ombila onene yeya iya aivekomboko aveho. Ongotyo matyikakala tyina Omona womulume ameya.” (Mateus 24:38, 39) Namphila ovanthu ovanyingi ankho kavesukile nonondaka mba Noe, mahi watuaileko okulondola ovanthu, ngetyi Jeova emutuma.

⁹ Hono, tuivisa onondaka onongwa Mbouhamba opo tuavele ovanthu omphitilo yokulilongesa etyi Huku makalingila ovanthu komutwe wandyila. Nga Jeova, onthue tuhanda unene ovanthu vatehelele onondaka tuvepopila opo “vatualeko okukala nomuenyo.” (Ezequiel 18:23) Tyina tuivisa umbo na umbo, naapa pena ovanthu ovanyingi, tuvelondola okuti Ouhamba wa Huku mauya okuhanyako ouye uno wovivi.—Ezequiel 3:18, 19; Daniel 2:44; Apocalipse 14:6, 7.

TUHOLE OVANTHU

10. (a) Ehunga patyi tuna liokuivisa liapopiwa mu Mateus 22:39? (b) Oñgeni Paulu na Sila vakuatesileko omuyungi wokaleya mepunda-umbo lyo Filipu?

¹⁰ Ehunga liakuana litulunda okutualako okuivisa, omokonda tuhole ovanthu. (Mateus 22:39) Ohole oyo itulunda okutualako okuivisa mokonda tutyii okuti ovanthu vapondola okupiluluka tyina onkhalelo yomuenyo wavo ipiluluka. Mongeleka, ovanthu vamwe vomepunda-umbo lyo Filipu, vapakele Paulu na Sila mokaleya. Mahi, mokati kovinthiki, kuaendele otyinimawe tyimwe, iya omapito okaleya aaikuka. Omuyungi wokaleya asoko okuti ononkhuatwa mbahena, ahande okuliipaa. Mahi Paulu emutyilika iya emulaveleya okuti: “Uheliipae!” Omuyungi wokaleya evepulu okuti: “Oityi ndyina okulinga opo ndyihupe?” Paulu na Sila avemupopila okuti: “Kala nekolelo mu Tatekulu Jesus, iya mokayovoka.”—Atos 16:25-34.

11, 12. (a) Oityi ehipululo lyo muyungi wokaleya litulongesa konthele yovilinga viokuivisa? (b) Omokonda yatyi tuhandela okutualako okuivisa?

¹¹ Oityi ehipululo liomuyungi wokaleya litulongesa konthele yovilinga viokuivisa? Tala okuti o konyima yotyinimawe vala omuyungi apiluluka onkhalelo yae iya aiti opo akuatesweko. Tupu, ovanthu vamwe vahahande okutehelela onondaka onongwa mbuvasiwa mo Mbimbiliya, vapondola okupilulula onkhalelo yavo iya avaovola ekuateso, tyina pamamoneka otyipuka tyimwe otyivi. Mongeleka, hamwe vamwe velitehelela omapita mokonda vapolwa movilinga ine veliyekapo nou ankho velinepa nae. Ovakuavo, hamwe vasoya unene mokonda vaimbuka okuti vena ouvela ine hamwe omokonda umwe vehole wankhia. Tyina ovipuka ovio vimonekapo, ovanthu vapondola okuhimbika okulipula ovipuka konthele yomuenyo. Vapondola okulipula okuti: ‘Oityi ndyina okulinga opo ndyihupe?’ Konyima vapondola okukala nehando liokutehelela onondaka onongwa tuvepopila.

¹² Ngotyo, inkha tutualako okuivisa, matukala tyafuapo opo tuveungumanese. (Isaías 61:1) Charlotte, omukokoli-ndyila omanima 38, wati: “Ovanthu vavomba. Vesukisa omphitilo yokutehelela onondaka onongwa.” Ejvor, omukokoli-ndyila omanima 34, wati: “Hono, ovanthu ovanyingi velitehelela vali omapita tyipona kohale. Ame nahanda okuvekuatesako. Otyo tyimpha ondundo yokuivisa.” Tyayandyuluka nawa okuti, ohole tuna novanthu ehunga liakolela unene litulunda okutualako okuivisa!

OVIPUKA VITUKUATESAKO OKUKOLELEYA

13, 14. (a) Otyiawa patyi tyapopiwa mu João 15:11? (b) Oñgeni onthue tupondola okukala nehambu Jesus ankho ena? (c) Oñgeni ehambu litukuatesako movilinga viokuivisa?

¹³ Motyinthiki tyahulilila etyi Jesus ehenenkhie, tupu wapopile ovipuka ankho vipondola okukuatesako ono apostolu okutualako okuava ovinyango. Ovipuka ovio ovipi iya oñgeni vipondola okutukuatesako hono?

¹⁴ Ehambu. Okuti kuonthue, okuivisa otyilinga tyalema? Au. Konyima yetyi Jesus apopia onthengele-popia yomuvinyu, walekesa okuti tyina tuivisa matukala nehambu ngeli oe ankho ena. (Tanga João 15:11.) Ñgeni ngotyo? Hinangela okuti monthengele-popia yae, Jesus welieleka nomuvinyu iya ovalongwa vae eveeleka nonompha. Inkha mbaima momuti, onompha kambukukuta. Tupu, nonthue tupondola vala okukala nehambu Jesus ankho ena, inkha tutualako okuliwaneka nae, nokulandula onomphai mbae. Inkha tulinga ngotyo, matukala nehambu Jesus ankho ena, ehambu lituka kokulinga ehando lya Huku. (João 4:34; 17:13; 1 Pedro 2:21) Hanne, omukokoli-ndyila omanima 40, wati: “Ehambu ndyikala nalio tyina ndyenda movilinga viokuivisa, limpha ondundo yokutualako okulinga ovilinga vya Jeova.” Ehambu malituavela ononkhono tuesukisa opo tutualeko okuivisa, alo umwe tyina ovanthu vehetutehelela.—Mateus 5:10-12.

15. (a) Otyiawa patyi tyapopiwa mu João 14:27? (b) Oñgeni ombembwa itukuatesako okutualako okuava ovinyango?

¹⁵ Ombembwa. (Tanga João 14:27.) Motyinthiki tyahulilila etyi Jesus ehenenkhie, Jesus wapopila ono apostolu mbae okuti: “Ame ndyimuavela ombembwa yange.” Oñgeni ombembwa ya Jesus itukuatesako okutualako okuivisa? Tyina tutualako okuivisa, tukala nombembwa mokonda tutyii okuti tukahi nokuhambukiswa Jeova, na Jesus. (Salmo 149:4; Romanos 5:3, 4; Colossenses 3:15) Ulf, omukokoli-ndyila omanima 45, wati: “Tyina ndyenda movilinga viokuivisa ndyiponwa, mahi ovilinga ovio vinkhalesa nehambu enene, nomuenyo ukahi nawa.” Onthue tupandula mokonda tuavasa ombembwa ihapu!

16. (a) Otyiawa patyi tyapopiwa mu João 15:15? (b) Oñgeni ono apostolu ankho vapondola okutualako okukala omapanga a Jesus?

¹⁶ Oupanga. Konyima yetyi Jesus apopila ono apostolu okuti ankho uhanda vakale nehambu, wahangununa omokonda yatyi ankho tyakolela valekese ohole yotyotyili. (João 15:11-13) Wati: “Ame ndyimuihana okuti mumapanga ange.” Okukala epanga lya Jesus, otyiawa tyimwe otyiwa! Mahi, oñgeni ono apostolu ankho vapondola okutualako okukala omapanga a Jesus? Jesus wati: “Endei iya tualeiko okuava ovinyango.” (Tanga João 15:14-16.) Onondaka ombo mbuhangununa okuti tuna okutualako okuivisa. Tyafuile ankho palamba-le omanima evali tunde etyi Jesus apopilile ono apostolu mbae okuti: “Tyina muenda, ivisei okuti: ‘Ouhamba wo keulu ukahi popepi.’” (Mateus 10:7) Otyo Jesus motyinthiki tyahulilila etyi ehenenkhie aavelele ondundo ovalongwa vae opo vakoleleye movilinga viokuivisa. (Mateus 24:13; Marcos 3:14) Jesus ankho utyii nawa okuti katyapepukile. Mahi, ovalongwa ankho vena okutyilinga opo vatualeko okukala omapanga ae. Oñgeni ankho mavetyilingi? O nekuateso liotyiawa otyikuavo.

17, 18. (a) Otyiawa patyi tyapopiwa mu João 15:7? (b) Oñgeni otyiawa otyo tyakuatesileko ovalongwa va Jesus? (c) Oviawa patyi vitukuatesako hono?

¹⁷ Omakumbululo omalikuambelo etu. Jesus wati: “Itei kese tyipuka muhanda iya mamutyipewa.” (João 15:7, 16) Omulao oo wa Jesus, tyotyili wapamekele ono apostolu mbae!a (Tala onondaka pokatoi.) Ono apostolu ankho kavetyii nawa okuti omuvo wa Jesus wokunkhia wehikapo. Mahi, ononkhia mbae ankho kambulekesa okuti mavakala tyihena ekuateso. Jeova ankho wafuapo opo akumbulule omalikuambelo ono apostolu, nokuvekuatesako movilinga viokuivisa. Otyo umwe Jeova alingile. Konyima yononkhia mba Jesus, ono apostolu vaitile ku Jeova opo eveavele omutima wakola, iya Jeova akumbulula omalikuambelo avo.—Atos 4:29, 31.

¹⁸ No hono Jeova utualako okutyilinga. Tyina tukoleleya movilinga viokuivisa, onthue tutualako okukala omapanga a Jesus. Iya tupondola okukala nonthumbi yokuti inkha tyitupuiya okuivisa, Jeova wafuapo opo etukumbulule tyina tumuita ekuateso. (Filipenses 4:13) Onthue tupandula unene mokonda Jeova ukumbulula omalikuambelo etu iya tumapanga a Jesus. Oviawa ovio Jeova etuavela, vitukuatesako okutualako okuava ovinyango.—Tiago 1:17.

19. (a) Omokonda yatyi tutuailako okuivisa? (b) Oityi tyitukuatesako okumanuhula otyilinga Huku etuavela?

¹⁹ Monthele ei, tuelilongesa omahunga ekuana etulunda okutualako okuivisa: opo tunkhimaneke Jeova, nokusukukisa enyina liae, opo tulekese okuti tuhole Jeova na Jesus, opo tulondole ovanthu, nokuvelekesa okuti tuvehole. Tupu, tuelilongesa oviawa vikuana: ehambu, ombembwa, oupanga iya nomakumbululo omalikuambelo etu. Oviawa ovio, vituavela ondundo opo tumanuhule ovilinga Jeova etutuma. Jeova uhambukwa unene tyina atala okuti tukahi nokulinga ononkhono opo “tutualeko okuava ovinyango ovinyingi!”