Ovinyama Viohika Vili Nokwomba-ko, Momanima 50 kwaomba 73% — Oityi Ombimbiliya Ipopia?

Monthiki 9 ya Kulindi yo 2024, Vokuyunga Omwenyo Wovinyama Viohika Mouye, (Fundo Mundial para a Vida Selvagem) valinga o lelatoliu imwe ilingisa otyiho, ipopia etyi ovanthu vena nokulinga tyityopola omwenyo wovinyama mohika. Mo lelatoliu oyo vati: “Momanima 50 (1970-2020), komambamba ovinyama viohika, kwatepuluka 73%.” Mo lelatoliu oyo valondola okuti: “Etyi tuli nokupopia ha tyomahuku, momanima aa etano tuna-o, okwahalingi natyike omwenyo kombanda yeheke kamauviuku.”

Ovanthu ovanyingi etyi vatanga o lelatoliu oyo, tyevetilisa owoma. Onthwe tuhole ohi yetu ei ongwa, katuhande okutala ovinyama viohika vilingwa onya. Katuhande tupu, omokonda mwene nkhele tya pondyimbi, Huku uhanda ovinyama tuvitekule nawa. — Ehimbikilo 1:27, 28; Omihe 12:10.

Hamwe molipulu okuti: ‘Okuti matutyivili umwe okuhupisa ovinyama viohika? Oityi Ombimbiliya ipopia?’

Komutwe oku ovipuka maviviuku

Ngatututaumba vala, omwenyo kombanda yoohi hanthwe-ko matuuviukisa, o Huku vala meuviukisa. Ombimbiliya yetyipopi-ale m’Eholololo 11:18, Huku “mahanye-ko ava vokuhanya ohi.” Ovelesikulu ei itulongesa ovipuka vivali:

1. 1. Huku matalameka umwe nawa ovanthu vokunyona ohi, vokwihanya.

2. 2. Huku metyilingi apa katutu. Ñgeni ngootyo? Nkhele kouye kwakalele ovanthu, petupu omanima kouye kwakalele ovanthu vahanya ohi ngovo pehepano.

Oityi Huku makalinga amaneko otyipuka otyo? Meketyimana-ko noutumini wae uli keulu, Ouhamba wae, mautumina eheke aliho. (Mateusi 6:10) Outumini oo, maukaetela ondongeso ovanthu aveho vokutavela, okuvelongesa umwe etyi vena okulinga opo vayakulile omwenyo wovinyama viohika, avevihupisa. — Isaiya 11:9.