Oityi Sesusi Atilwa Okuti Omona wa Huku?

Ekumbululo lyo Mbimbiliya

Ombimbiliya ipopia okuti Sesusi ‘Omona wa Huku.’ (Suau 1:49) Onondaka ombo mbuhanda vala okupopia okuti Huku oe watunga Sesusi, ngetyi atunga ovipuka aviho vina omwenyo. (Salmo 36:9; Eholololo 4:11) Ombimbiliya kaipopi okuti Huku watyita Sesusi ngetyi tyityitwa ovanthu.

Ombimbiliya tupu ipopia okuti onoandyu “ovana va Huku yotyotyili.” (Jó 1:6) Nkhele ipopia vali okuti Andau, omunthu wo tete Huku atunga, “omona wa Huku.” (Luka 3:38) Mahi Ombimbiliya ipopia umwe nawa okuti omona Huku ehole vali, o Sesusi. Umuhole umwe unene mokonda oe atetekela okutunga, emutungu umwe vala aike.

• Okuti etyi Sesusi eheneye pano pohi ankho ukala keulu?

• Oityi Sesusi ankho alinga etyi eheneye pano pohi?

Okuti etyi Sesusi eheneye pano pohi ankho ukala keulu?

Yoo. Etyi Sesusi eheneye pano pohi, ankho oandyu keulu. Nae muene wetyipopile ati: “Ame natunda keulu.” — Suau 6:38; 8:23.

Tete Huku watetekela okutunga Sesusi, pahe atungu ovipuka ovikwavo. Tala etyi Ombimbiliya yapopia Sesusi:

• “Otyiveli kovipuka aviho atunga.” — Ova Kolosu 1:15.

• “Onthyimbi yovipuka viatungwa na Huku.” — Eholololo 3:14.

Etyi eheneye pano pohi, Sesusi ankho oko ‘ekahi-ale kohale’ ngetyi tyapopia omukanda wa Miquéias 5:2. — Mateusi 2:4-6.

Oityi Sesusi ankho alinga etyi eheneye pano pohi?

Ankho una otyilinga tyimwe otyinene keulu. Tupopia ngotyo mokonda nthiki imwe welikuambelele ku Huku ati: “Tate, pahe nkhimanekele ponthele yove, nomunkhima nali nao, etyi ankho kuhenekale ouye.” — Suau 17:5.

Vaundapele na Tate yae mokutunga ovipuka aviho. Sesusi vaundapele na Tate yae, ngwe ankho uundapa umwe nawa. (Provérbios 8:30) Ombimbiliya yapopia Sesusi okuti: “Mokonda ovipuka aviho ovikuavo, ovipuka keulu no kombanda yohi, viatungwa menyina liae.” — Ova Kolosu 1:16.

Mokutala, Huku watumine Sesusi atunge ovipuka, ngetyi onoandyu keulu, nouye. (Eholololo 5:11) Huku ankho usoka oñgeni mavalingi otyipuka tyimwe, apopila Sesusi etyi asoka, Sesusi etyilingi ngo omu etyipopilwa.

Ankho Ondaka. Ombimbiliya ipopia okuti etyi Sesusi eheneye pano pohi, ankho “Ondaka.” (Suau 1:1) Mokutala enyina olio lihanda vala okupopia okuti tyina Huku ena etyi ahanda okupopila onoandyu, ankho utuma-ko vala Omona wae Sesusi.

Huku tupu ankho tyina ena etyi ahanda okupopila ovanthu utuma-ko Sesusi. Tyina ankho ena ondaka ahanda okupopila ovo Andau na Eva, mokutala ankho utuma-ko Sesusi. (Gênesis 2:16, 17) Tupu mokutala oandyu yakuatesileko ova Isilayeli etyi ankho veli moluhandya, aivepopila etyi vena okulinga, o Sesusi. — Êxodo 23:20-23.a