Okupitiya Omalongomona Otyonge tyo 2020, tyati: “Hambukwei Apeho!”

Mohanyi ya Julho na Agosto yo 2020, otyikando tyotete, ovakuatate ouye auho vatalela kumwe otyonge tyononthiki ononthatu mono simanu mbumwe. Opo ovakuatate vetyitale, ankho tyesukisa okupitiyua nokungalavalwa momalaka alamba po 500. Otyilinga otyo opo tyipwe, ankho tyipondola okulingwa enima ine okulamba-po. Mahi mokonda yovitateka viatuka komukihi coronavirus, omalongomona otyonge tyo 2020 tyati: “Hambukwei Apeho!” apitiyua vala momuvo wahalambe monohanyi ononkhuana.

Oseketa Yovilinga Viokupitiya no Yokulanda Ovipuka Vieongano Kombala Yonombangi mba Siovaa, mbakuatesako unene ovilinga ovio. Ovakuatate Voseketa Yokupitiya avetyimono okuti ovakuatate vokupitiya vesukisa vali oviti, haunene ono mikolofone mbukahi nawa opo vetyivile okulinga liwa otyilinga otyo. Moluotyo, Oseketa Yokulanda Ovipuka Vieongano, ailande onomikolofone 1.000 aimbutumu kovilongo vilamba po 200.

Opo vahamane onombongo, Oseketa Yokulanda Ovipuka Vieongano yalanda onomikolofone ononyingi motyikando tyike vala ambupakwa vala pomphangu ike, konyima ambutumwa kovapitiyi movilongo ovinyingi. Mokonda valanda onomikolofone ononyingi, ike yalanda onondolale 170 okukutikinya-mo onombongo mbokuatuma. Otyo tyatepulula vali konombongo tyipona okulanda omikolofone ike-ike.

Oseketa Yokulanda Ovipuka Vieongano yalanda aitumu onomikolofone ombo mohanyi ya Abril na Maio yo 2020 — omuvo ankho onondando ononyingi mbailikwa novatumini mokonda yomukihi. Mahi, tyina ohanyi ya Maio ihenepwe, onoseketa ononyingi mbokupitiya, nono filiyale, nonomphangu ononkhuavo kuna ovapitiyi, ankho vatambulale onomikolofone ombo.

Omukuatate Jay Swinney, omukulu wakalela komutwe o Seketa Yokulanda Ovipuka Vieongano, wati: “Ono Seketa mbo Mbetele mbaundapela nawa kumwe novanthu vokulandesa. Opo tutyivile okulanda ovitele ovio, nokuhapesela unene onombongo, nokuvituma ko vakuatate, tuetyivila vala mokonda yo nonkhono mba Siovaa.”

Omukuatate Nicholas Ahladis, undapa Movilinga Viokupitiya wati: “Ovapitiyi ankho vahapondola okutunda momaumbo avo mokonda yomukihi, vapandula unene etyi vatambula oviti ovio. Namphila veheli kumwe novapitiyi ovakuavo, mahi vetyivila okuundapa nawa motyilinga tyokupitiya omalongomona nokungalavala Onondalama, noviimbo momalaka alamba po 500.”

Etyi otyimwe vala povipuka ovinyingi tualinga opo tulingile ovakuatate vetu ouye auho otyonge tyo 2020, tyati: “Hambukwei Apeho!”. Oviawa vienyi mualingila mo site donate.jw.org no mononkhalelo ononkuavo viakuatesako unene opo tulande oviti ovio.