4 Okulievela

OTYO OTYITYI?

Okuevela mukwenyi, okuehesuku unene netyi ekulinga. Mahi hakuti ngotyo mokala ngoti kekulingile natyike, muene okutyilimbwa umwe vala.

ONONDUNGE MBO MBIMBILIYA: “Tualeiko okukoleleya ovipuka vakwenyi vemulinga nokulievela nomutima auho alo umwe inkha pena ou wemulinga otyipuka tyinumanesa.” — Ova Kolosu 3:13.

“Meumbo tyina uhole umwe mukwenyi, kusuku unene nevi apengesa. Utala umwe vala kononkhono eli nokulinga mbokulinga oviwa.” — Aaron.

OITYI OTYIPUKA OTYO TYESUKISILA?

Ine upaka onkhongo, tyati umwe ove vala molietela onombela, ove monyono otyinepo tyenyi.

“Nthiki imwe omulume wange wandingile otyipuka tyendyihama unene. Etyi andyita otyiponyo, anehetyivili umwe okumupolela-po liwa, mahi pahe konyima andyimupolela-po. Etyi nasoka umwe kotyipuka otyo nalinga, andyilivele etyi tuakalele ononthiki mbumwe tyelinumanena mokonda yange napakele onkhongo.” — Julia.

OITYI UPONDOLA OKULINGA?

LITALA NAWA OVE MUENE

Tyina wamanumana unene notyipuka tyimwe mukwenyi apopia, hamwe alinga, nkhele lipula okuti:

• ‘Okuti hame vala ndyinumana liwa, okuti ñgaa tyinumanesa umwe?’

• ‘Okuti ñgaa etyi alinga wesukisa umwe okundyita otyiponyo, ine hahe ndyityilimbwe vala?’

TOMPHOLEI OMAPULO AA NA MUKWENYI

• Okuti tuhole okukala ehimbwe tulievele?

• Oityi tupondola okulinga tulinge ovanthu vokulievela liwa?

LINGEI NGETYI

• Ine mukwenyi ukulinga otyipuka tyekunumanesa, wahasoke okuti wetyilingila tyawina.

• Tyina mukwenyi amekulingi otyipuka wahahandele, hinangela okuti “atuho ovikando ovinyingi tulinga oviponyo.” — Tiaku 3:2.

“Katyipuilisa-le okulievela tyina amuho muapengesa, mahi tyina wike vala, opo tyipondola okupuiya katutu. Omunthu opo etavele umwe tyina mukuavo emuita otyiponyo, wesukisa okulikondola kouna.” — Kimberly.

ONONDUNGE MBO MBIMBILIYA: “Tetulula liwa otyitateka na una wekunumanena.” — Mateusi 5:25.