Evela Tyihakuluminyua

ONONDONGA MBO MBIMBILIYA: “Tualeiko . . . okulievela kese umwe na mukuavo tyihakuluminyua, inkha umwe ena ehunga liokunumana na mukuavo. Ngetyi Jeova emuevela tyihakuluminyua, tupu nonwe lievelei.”—Colossenses 3:13.

Otyo tyihangununa-tyi? Mo Mbimbiliya onkhali ikahi ngatyina ongele, iya okueevela, tyikahi ngatyina hekulu yongele ati ihafetwe vali. (Lucas 11:4) Omukanda umwe wapopia okuti Movihonekwa, ondaka yo Gregu yapitiyua “okuevela,” ilekesa “okuyeka ongele ihafetwe vali.” Moluotyo tyina tutokola okuevela una wetulinga otyivi, tuna okuyeka-po okusoka kuetyi alinga. Ehando lietu liokumuevela kalilekesa okuti tuapanda otyivi etulinga ine katuesukile nomuihamo tyetuetela. Mahi, tutokola okuyeka-po okukala nonkhongo, namphila ankho tuna ehunga ‘liokunumana.’

Okuti onondonga ombo hono mbakolela?Mokonda tuvakuankhali, atuho tulinga ononkhali. (Romanos 3:23) Moluotyo, okuevela vakuetu ounongo, mokonda nonthue matusukisa okuevelwa na vakuetu. Tupu, tyina tutokola okuevela vakuetu, nonthue muene tyituetela ouwa. Ñgeni ngotyo?

Tyina tunumana unene, atukala nonkhongo, iya atuhetavela okuevela, onthue muene tulietela omuihamo. Iya okukala ngotyo, tyitupola ehambu, tyitukalesa tyeliunga unene, nokututyika kovipuka tuesukisa okulinga. Tupu, tyipondola okutuetela omauvela omanene. Ondotolo Yoichi Chida Nomulongesi Andrew Steptoe, vapopia mo Journal of the American College okuti: “Omaovolo alingwa hono, alekesa okuti okukala omukalavi, nokuna ononyengo, [nouvela womutima] DCs, tyilinga unene omapita.”

Moluotyo, okuevela kueta ouwa omunene. Tyina tueevela vakuetu tyihakuluminyua, tyitukalesa nombembwa nokulikuata okapandi, nokuyakulila oupanga wetu. Haunene, tulekesa okuti tukahi nokuhetekela Huku, una weevela tyihakuluminyua ononkhali mba vana velivela, iya uhanda nonthue tueevele vakuetu.—Marcos 11:25; Efésios 4:32; 5:1.