9 Noñgonoka Ove-lie

OTYO OTYITYI?

Apa tyina tuti noñgonoka ove-lie, katuli vala nokupopia enyina liove, nolupe lwove tyapwa. Tuli nokupopia umwe atyiho, onondunge mbove, etyi utavela, netyi watuwa mokati.

OITYI OTYIPUKA OTYO TYESUKISILA?

Ove tyina ulii umwe ove-lie, etyi utavela, netyi ukahi, kutavela tyina omakula ove ekuhongiliya ulinge tyimwe tyapenga.

“Ovanthu vamwe vekahi vala ngovimbuneka ­vivalekwa. Vakevelela vala ku vakuavo vevepopile etyi vena okulinga.” — Adrian.

“Ame nelilongesa okukakatela mu etyi ndyii okuti otyo tyaviuka, naapa umwe tyalema. Ame opo ndyitale ine omunthu umwe epanga lina onondunge, ndyilinga ñgaa: Ndyitala oñgeni ngwe alinga ovipuka, pahe andyitale oñgeni ame ndyikala tyina tuna-e.” — Courtney.

ONONDUNGE MBO MBIMBILIYA: “Yekei-po okukala novituwa viouye uno, mahi pilululei omalusoke enyi aakala omape.” — Ova Loma 12:2.

OITYI OTYIPUKA OTYO TYESUKISILA?

Ovola okunoñgonoka evi uvila okulinga nawa, nevi wehevili nawa, netyi utavela. Opo, opo vala motyivili okutala umunthu patyi, tupu motale ine komutwe wandyila mokala omunthu ukahi ñgeni. Upondola okulipula ngetyi:

Evi uvila okulinga nawa: Ovipuka patyi ndyivila umwe okulinga nawa? Okuti tyokuundapa ndyityihole? Okuti ndyityivila okulikondola omutima? Okuti tyina tulilaa tyimwe na vakuetu, ndyiseta ine ndyihika umwe oola tuelilaa? Ovipuka patyi oviwa ndyilinga?

LINGA NGETYI: Okuti tyekupona okuhinangela oviwa ulinga? Opo enda kovo tate yove oo kepanga liove, ovepulu oviwa vehole okumona ku ove.

ONONDUNGE MBO MBIMBILIYA: “Kese munthu atale nawa ovilinga viae, iya ngotyo makala nehunga liokuhambukilwa etyi alinga, ehelieleka na ­vakuavo.” — Ova Galata 6:4.

Evi wehevili nawa: O movipuka patyi ndyina okulikuatehila vali? Haunene onalupi ndyisoka okulinga etyi tyapenga? O movipuka patyi ndyina okulikuatehila vali ndyityivile okulikondola omutima?

ONONDUNGE MBO MBIMBILIYA: “Inkha tupopia okuti: ‘Tutupu onkhali,’ tukahi nokulikemba onthue muene iya mu onthue mutupu otyili.” — 1 Suau 1:8.

Evi utavela: Oityi ame ndyiti umwe etyi tyaviuka? Oityi ame ndyiti umwe etyi tyapenga? Oityi ndyisokela ngotyo? Ndyitavela okuti kouye kuna Huku? Oityi ndyitila umwe, kouye kuna Huku? Oityi ndyikevelela okukamona komutwe wandyila?

ONONDUNGE MBO MBIMBILIYA: “Onondunge mambukuyungu, ekungunyiko alikuyakulila.” — Provérbios 2:11.