Okutavela kovo tate yove tyikahi ngokufeta ongele. Ine ufeta liwa, onthiki onkhuavo tyina wamaende-ko vali ukaundile, mavekuundika-ko
OVAKUENDYE NOVAHIKUENA
10 Linga Omunthu Uyumbwa Onthumbi
OTYO OTYITYI?
Omunthu uyumbwa onthumbi, oyo una ulinga etyi atumwa; nga apopia okuti malingi tyimwe utyilinga umwe; apeho upopia otyili. Ovanthu ngo ovo, vayumbwa onthumbi novo tate yavo, nomapanga avo, na ava vaundapela.
OITYI OTYIPUKA OTYO TYESUKISILA?
Opo ovanthu vekuyumbe onthumbi avekuyeke ulinge ovipuka vimwe ko ha lwove, una okulinga ovipuka nonondunge.
“Opo ovo tate yove vekuyumbe onthumbi, vena okutyimona okuti pahe wekula umwe, una onondunge. Mahi kupondola vala okulinga ovipuka nonondunge tyina uli ponthele yavo.” — Sara.
ONONDUNGE MBO MBIMBILIYA: “Tualeiko okulitala oñgeni tyili-tyili onwe muene mukahi.” — 2 Ova Kolindu 13:5.
OITYI UPONDOLA OKULINGA?
Apa pena ovipuka vimwe upondola okulinga opo ovanthu vekuyumbe onthumbi.
Popia otyili. Ine wahanda umwe ovanthu vehekuyumbe onthumbi, linga vala omunthu womatutu. Mahi ine apeho upopia otyili, na tyina wamapengesa opopi umwe nawa etyi wapengesa, opo ovanthu mavekuyumbu onthumbi.
“Tyina wamalingi otyipuka tyimwe otyiwa, opo nokupopia otyili katyipuiya-le. Mahi tyina wamalingi otyipuka tyimwe utyii umwe okuti ine utyipopia ovanthu mavanumana, mahi no ngotyo otyipopi umwe, opo ovanthu vekuyumba onthumbi.” — Caiman.
ONONDUNGE MBO MBIMBILIYA: “Tuhanda okukala ovakuatyili movipuka aviho.” — Ova Hebeleu 13:18.
Linga nawa ovipuka. Ko Estados Unidos vapulile ovanthu vamwe oityi vaovola komunthu uya okuveita ovilinga. Ngwe avakumbulula avati vahanda omunthu uyumbwa onthumbi, ulinga nawa ovipuka. Ine ulikuatehila pahetyino ulinge omunthu uyumbwa onthumbi, haa tyina wamekulu moti umwe nalingile.
“Ovo tate vetyihole tyina ame ndyipinduka-po nokukwata ovilinga, avehesuku nokumphopila okuti kalinge tyo ngandi no tyo ngandi. Tyina ndyilikuatehila ndyilinge nawa ovilinga vyo meumbo, ovo tate navo vandyumba vali onthumbi.” — Sara.
ONONDUNGE MBO MBIMBILIYA: “Ame ndyina onthumbi yokuti ove motavela, . . . ndyityii okuti molingi vali unene tyipona etyi napopia.”— Filemo 21.
Pwa-elundo. Ovanthu vetyimona liwa tyina omona ekula, akala omulale. Mahi pahe opo vetyimone okuti omunthu ou pahe una onondunge, pamwe pakala ehimbwe.
“Hakuti molingi vala otyipuka tyike tyikahi nawa, pahe okutuka opo ovo tate yove novanthu ovakuavo avekuyumbu onthumbi. Mahi ine ulikuatehila ulinge ovipuka nonondunge, katutu-katutu motyivili.” — Brandon.
ONONDUNGE MBO MBIMBILIYA: ‘Livalekei oumphua-lundo.’ — Ova Kolosu 3:12.