Ehipululo lya Ricardo na Andres

Onondonga mbutunda mo Mbimbiliya mbuna epondolo liokupilulula omuenyo wovanthu. Tala etyi tyaendele na Ricardo na Andres.

RICARDO: Etyi ankho ndyina omanima 15, andyinyingila motyikundyi tyo nongangala. Ame ankho nesuka vala nokuhambukiswa omapanga ange. Otyipuka ankho ndyihanda katyitavela okutyisoka, ankho nahanda ñgeno ndyikala mokaleya omanima ekwi! Otyo ankho ndyihanda mokonda potyilongo ankho ndyikala, ovanthu ankho vena onthilo nomunthu ngoo. Iya na ame ankho nahanda ovanthu vakale nonthilo na ame.

Motyikundyi otyo, nalingile ovipuka ovinyingi ovivi, ngetyi okusipa epangwe, nokuveta ovanthu, nokulala novahikuena. Nthiki imwe kounthiki, atuhimbika okuliloya notyikundyi otyikuavo. Ankho ndyisoka okuti mandyiipawa, mahi andyitundupo vala nawa. Konyima yotyo, andyihimbika okusoka nawa konthele yomuenyo wange, netyi ankho ndyihanda okulinga. Pahe ankho ndyihanda okupiluluka. Mahi oñgeni ankho mandyipiluluka? Opi ankho mandyihimbikila?

Ovanyingi mombunga yange, ankho vetupu ehambu iya ankho vena ovitateka ovinyingi. Mahi ombunga ya titiyu ankho yelikalela unene. Ankho ovanthu vekahi nawa mokonda ankho vaendela monondonga mbo Mbimbiliya. Alo umwe onthiki imwe vandongesile okuti enyina lya Huku o Siovaa. Konyima yotyinthiki tyina tueliloyele notyikundyi otyikuavo, andyipopi enyina lya Huku melikuambelo okumuita opo ankhuateseko. Iya monthiki onkhuavo, omulume umwe Ombangi ya Siovaa, atotola pepito liange. Omukuatate oo, akala omulongesi wange wo Mbimbiliya.

Mahi apamoneka otyitateka otyikuavo. Omapanga ange ankho andikalela ko telefone okunkhonga opo tukaende-ende navo. Ankho katyapepukile okuvepopila okuti hihande. Mahi ankho natokola okutualako okulilongesa Ombimbiliya. Hono, hilivele etyi neveanyene. Omuenyo wange aupiluluka unene iya pahe ndyina ehambu liotyotyili.

Andyilikuambela ku Siovaa konthele yehando ankho ndyina liokukala mokaleya omanima ekwi opo ovanthu vakale nonthilo na ame. Mokonda ehando liange ankho liapiluluka, pahe andyimuiti opo ankhuateseko okukala omanima ekwi nokulongesa ovanthu Ombimbiliya. Ankho ndyihanda okukuatesako ovanthu, ngetyi na ame nakuatesilueko. Huku akumbulula elikuambelo liange. Pahe ndyiundapesa omuvo wange mokulongesa ovanthu Ombimbiliya mokueenda kuomanima 17! Tupu, nalumwe napakelwe mokaleya.

Ovanyingi pomapanga ange vekahi mokaleya omanima omanyingi. Ovakuavo vankhia-le. Tyina ndyisoka ku etyi tyaendele momuenyo wange, ndyipandula unene ombunga ya titiyu yange. Ankho valinga atyiho opo vakale novituwa vielikalela no viovanthu ovanyingi mokuendela monondonga mbo Mbimbiliya. Ankho ndyina vali onthilo navo tyipona novanthu votyikundyi tyange. Mahi haunene ndyipandula Huku etyi ankhuatesako okunoñgonoka onkhalelo ongwa yokutyinda omuenyo.

ANDRES: Motyilongo nekulila ovanyingi vahepa iya mokonda yotyo, okusipa epangwe, nokuvaka, nokuliipaa, noukunga ankho tyakaka unene. Tate ankho onkholwa iya ankho usipa epangwe. Tate na me ankho vakalela vala okuyaya, nokulwa.

Nahimbika okunwa nokusipa epangwe etyi ankho ndyimututu. Ankho ndyikala vala momatapalo nokuvaka, nokulandesa ovipuka navaka. Etyi nekula, tate ehimbika okukala vali epanga liange, mahi naina ankho uhanda okunthyongiliya okulinga ovipuka viapenga. Wandongesa okupola epangwe kovilongo ovikuavo opo tulandese motyilongo tyetu. Tupu ankho tulandesa ovipuka ovikuavo viailikwa novatumini. Pomuvo opo ankho ndyina onombongo ononyingi! Mahi onthiki imwe opulisa aiya meumbo liange. Avanthendeleya okuti pena omunthu ankho ndyihanda okuipaa. Avamphake mokaleya iya andyikala-mo omanima etano.

Onthiki imwe komuhuka, avapopila ononkhuatwa okuti vakongwa opo vakatehelele elongomona malilingwa no Nonombangi mba Siovaa. Na ame andyiende. Ovipuka neiva ankho oviwa, iya mokonda yotyo, andyihimbika okulilongesa Ombimbiliya Nonombangi mba Siovaa. Ankho kavamphopila vala etyi ankho nahanda okutehelela, mahi tupu ankho vandekesa mo Mbimbiliya ovituwa vihambukiswa Huku.

Andyiimbuka okuti ame andyike himetyivili okulinga omapiluluko ankho nesukisa. Tupu, vakuetu ankho kavahande ndyitualeko okulilongesa. Ngotyo, andyilikuambela ku Siovaa opo amphe ononkhono, nounongo. Iya Siovaa ankhuatesako umwe. Anehesuku unene novipuka ovivi ankho vapopia iya alo umwe andyihimbika okuvelongesa Ombimbiliya.

Monthiki nayovoka, ankho nasukalala unene. Ankho hahandele okutunda mokaleya! Etyi ankho ndyikahi nokulupuka, ovanyingi pononkhuatwa avandekela nomankhanya. Alo umwe vamwe avapopi okuti: “Enda-po nawa kalombe ketu.”

Pamwe ndyiwela owoma tyina ndyisoka oñgeni omuenyo wange ñgeno ukahi inkha hetavelele okulongeswa na Huku. Ndyipandula unene Huku mokonda yohole ena na ame, netyi ahayekele-po okunkhuatesako.a