Nalumwe naendele tyihena outa wange

OMUENYO WANGE KOHALE:

Natyitilwa ko Roma iya oko nekulila, motyilongo muna ankho muna ovanthu vahepa. Omuenyo ankho wepuiya unene. Me yange ankho himwii tupu ankho ndyitupu oupanga omuwa na tate. Nekula vala nokutyinda omuenyo wepuiya womomatapalo.

Etyi natuukisa omanima ekwi, andyihimbika okuvaka. Etyi ndyina omanima 12 andyitundu meumbo otyikando tyotete. Ovikando ovinyingi, tate apita kopulisa, okukapopia navo vandyete meumbo. Ankho ndyitañguna vala novanthu apeho andyikala omukalavi nokuluisa ovanthu. Etyi natuukisa omanima 14, andyitundu maumbo tyihakondoka vali. Andyihimbika okusipa omapangwe nokukala metapalo. Ankho ndyitupu omphangu yokukala, kounthiki ndyinyingila mekalakasa lietukutuku andyitundumo kombimba. Andyikaovola omaande opo ndyilikohe.

Andyikala otyimphulu otyinene, okuvaka kese etyi ndyivasa mu momaumbo kounthiki. Andyihimbika okukala nomunkhima wokuvaka iya konyima andyikongua opo ndyilipake kumwe no nongangala, muna nakala “nomphitilo” yokutemba onondyuo mbokupaka onombongo. Mokonda ankho ndyimukalavi, ankho vakuetu vena onthilo naame. Nalumwe naendele tyihena outa wange, tyotyili, ankho tyina ndyilangalapo ukala mombuelo yotyinthiamino tyange. Oungangala, nokusipa omapangwe nokuvaka, nokupopia ovipuka viasila nomaundalelapo ankho oyo vala onkhalelo yomuenyo wange. Omapulisa apeho ankho andyovola. Nakuatwa ovikando ovinyingi, nokupakwa mokaleya momanima omanyingi.

OÑGENI OMBIMBILIYA YAPILULULA OMUENYO WANGE:

Nthiki imwe etyi natunda mokaleya, andyikatalelapo me muhikuena. Ame ankho hityii okuti me muhikuena no nondenge mbange vevali, Onombangi mba Jeova. Avati tuende keliongiyo. Nolumbwe, andyitavela okuenda navo. Etyi tuehika Kondyuo Yomaliongiyo, andyiiti ndyipumphame pombundi opo ndyitale inkha pena ou ukahi nokuya. Ankho ndyina outa wange.

Eliongiyo olio liapilulula omuenyo wange. Ame ndyihinangela etyi nasoka okuti ndyikahi mouye welikalela. Nayakulwa nawa nonkhenda, noupanga, nokutala ovanthu vahambukwa. Nkhele ndyihinangela etyi natala Onombangi, andyiimbuka okuti ovanthu ovakuatyili. Tyotyili ovo ankho velikalela unene nouye netyiliya!

Andyihimbika okulilongesa Ombimbiliya no Nombangi. Tyina ndyitualako okulilongesa, ankho tyimoneka nawa okuti omuenyo wange ukahi nokupiluluka. Andyilandula onondaka mbukahi mu Provérbios 13:20 mbati: “Una weenda novanandunge, nae makala no nondunge, mahi una ulinga oupanga nomaova nae makala otyova.” Andyiimbuka okuti nesukisa okukala kokule no nongangala vakuetu. Otyo ankho katyapepukile, mahi Jeova wankhuatesako andyityivili.

Tupu andyisukula olutu luange. Andyilingi ononkhono mbokuyekapo okusipa. Andyikeye onohuki mbange, andyilipolo onombilingu, nokuyekapo omupopio wasila. Tete ankho nesukisa okuliyunga nawa muatyiho ndyilinga.

Ame ankho okutanga nokulilongesa hityihande, ngotyo okunoñgonoka nawa nokuendela muetyi ndyililongesa Mombimbiliya atyimphulisa unene. Mahi, etyi nalinga ononkhono, katutu-katutu andyikala nohole na Jeova, nokupilulula omutima wange, nkhele pamwe ankho ndyinumana. Ankho apeho ndyilitehela omapita, ngoti Jeova nalumwe mandyevela ovivi aviho nalinga. Mahi ankho ndyivasa eungumaneso tyina ndyitanga konthele yetyi Jeova aevela Ohamba David walingile ononkhali ononene.​—2 Samuel 11:1–12:13.

Otyikuavo ankho ndyimphuiya okupopila vakuetu ekolelo liange movilinga viokuivisa umbo na umbo. (Mateus 28:19, 20) Ankho ndyina owoma wokuti mandyivasi vana navetele ine ongangala ngetyi ankho ndyikahi kohale! Mahi katutu-katutu andyityivili okufinda owoma oo. Andyikala nehambu liokukuatesako vakuetu okulilongesa konthele ya Tate yetu wokeulu, omueveli wotyotyili.

OUWA PATYI NAPOLAKO:

Okulilongesa konthele ya Jeova tyahupisa omuenyo wange! Omapanga ange otete vamwe vankhia ovakuavo vekahi mokaleya, mahi ndyina ehambu liotyotyili nokuna ekevelelo komutwe. Ame nelilongesa okukala nomutima weliola nokutavela nokulikondola omutima. Moluotyo, ndyina oupanga omuwa novanthu. Nahambukwa unene etyi nanepa omukai omuwa, Carmen. Kumwe, tuna ehambu enene liokukuatesako vakuetu okulilongesa Ombimbiliya.

Nehambu, pahe ndyilinga ovilinga oviwa, pamwe ndyenda monondyuo mbokupaka onombongo, ha kukavaka, mahi okukakohamo!