Onombongo

Ovanthu ovanyingi vetupu ovitateka ovinyingi konthele yonombongo mokonda vaendela monondonga mbo Mbimbiliya.

LIPAKELEIMO NAWA

ONONDONGA MBO MBIMBILIYA: “Ovipuka omunongo ahanda okulinga vienda nawa, mahi una utumphuluka vala, tyotyili ulituala moluhepo.” — Provérbios 21:5.

OTYO TYIHANGUNUNA-TYI: Tyihanda okulipakelamo nawa tyina muhenelande tyimwe iya amulingi ononkhono mbokulinga etyi muelipakela-mo. Hinangela okuti hapeho mokala natyiho uhanda. Ngotyo, undapesa onombongo mbove nounongo.

OITYI UNA OKULINGA:

Honeka Ovipuka Molande. Honeka pomukanda ovipuka aviho mamulande iya ngatyo umwe mulinga. Konyima, amutokola otyiñgapi mamusukisa mu kese tyipuka. Inkha umana onombongo ononyingi motyipuka tyimwe, pola onombongo ankho uhanda okulanda tyimwe opo uyawiseko tyilifwe. Mongeleka, inkha wapesela onombongo ononyingi pokualanda omulela wetu-tuku, pola ponombongo uhole okulanda nambo ovipuka vimwe, ngetyi okulia ko kombale, opo ulande etyi tyesukisa vali.
Lityilika Onongele. Linga ononkhono opo uhakale nonongele. Mahi, holeka onombongo opo ulande ovipuka wesukisa. Inkha una otyikalatau tyo mbango, feta ovipuka aviho opo uhakale nonongele. Inkha una ongele, linga ononkhono opo wiifete.

Omaovololo amwe alekesa okuti ovanthu vamana unene onombongo tyina vaundapesa otyikalatau tyo mbango. Ngotyo, inkha una otyikalatau tyo mbango, tyiuundapesa nounongo.

LITYILIKA OVITUWA VIAPENGA

ONONDONGA MBO MBIMBILIYA: “Wokuananga poutalala kakalimisa, mahi pokuteya wenda mepia, tyina muhena natyike.” — Provérbios 20:4.

OTYO TYIHANGUNUNA-TYI: Okunanga tyituala omunthu moluhepo. Ngotyo, uundapa iya opake nawa onombongo pala ovipuka vimwe vipondola okukuuhulukila.

OITYI OVE UPONDOLA OKULINGA:

Uundapa. Inkha ove uundapa iya okala omunthu una onondunge, omuhona wove mekuyumbu onthumbi iya ekuyekela movilinga.
Kala omukuatyili. Uhavake ovipuka viomuhona wove. Okuvaka tyipondola okunyona enyina liove ewa iya atyikupuiya okuvasa vali ovilinga komutwe wandyila.
Lityilika okukala nelungavi. Inkha usoka vala kokukala vali nonombongo, otyo tyipondola okunyona ekongoko liove iya noupanga omuwa wove navakuenyi. Uhalimbueko okuti onombongo, hatyoko otyipuka tyakolela vali momuenyo womunthu.

ONONDONGA ONONKHUAVO MBO MBIMBILIYA

Omulume utanga Ombimbiliya mo internete — Tangela Ombimbiliya mo *Internet*, Uvasiwa mo jw.org momalaka omanyingi

UHAPESELE OMUVO INE ONOMBONGO MOVIPUKA VIHASILIVILA.

“Onkholwa no wokulia unene mavahepe, iya olumphoki aluvekalesa nepene.”— PROVÉRBIOS 23:21.

UHASUKALALE UNENE NO NOMBONGO.

“Yekei-po okukala notyiho nomienyo vienyi konthele yetyi mamuli, netyi mamunu, ine nolutu luenyi konthele yetyi mamuvale.”— MATEUSI 6:25.

LITYILIKA OTYIPULULU.

“Omulume wokuna otyilulu uhatekela konyima yomalumono, tyihei okuti oluhepo lukahi nokuya nokombanda yae.”— PROVÉRBIOS 28:22.