OUYE UNO KAUKAHI NAWA

2 | Wahanyane Novipuka Viove

OITYI TYESUKISILA?

Ovanthu ovanyingi ononthiki mbatyo ambuho valinga ononkhono opo vamone etyi vesukisa. Mahi mokonda ouye uno kaukahi nawa, otyo tyivepuiya unene. Omokonda yatyi?

Tyina potyilongo tyimwe pamamoneka otyiponga, ovanthu ovanyingi pamwe vakala tyihena onondyuo nokulia.
Mokonda yoviponga ovanthu ovanyingi vatewa movilinga, iya vamwe vafetwa vala onombongo mbehehi.
Oviponga vipondola okuhanya onovenda, nomaumbo, iya ovanthu ovanyingi avesala moluhepo.

Etyi Wesukisa Okunoñgonoka

Otyiwa okukuata nawa onombongo mbove, opo mbukukuateseko tyina pamamoneka otyiponga.
Hinangela okuti olumono unalo kalukala ehimbwe, pamwe lupondola okupwa.
Kuna ovipuka onombongo mbehevili okulanda, ngetyi ehambu mombunga.

Oityi Upondola Okulinga?

Ombimbiliya yati: “Inkha tuna okulia nomuvalo, onthue matuhambukilwa ovipuka ovio.” — 1 Timotiu 6:8.

Okuhambukilwa evi tuna hakukala neevi tuhanda, mahi okuhambukwa tyina tuna vala etyi tuesukisa. Otyipuka otyo tyisukisa umwe haunene tyina tuehena onombongo.

Opo uhambukilwe etyi una, wesukisa okuyekapo ovipuka vimwe uhole. Inkha ulanda ovipuka vilanda onombongo ononyingi moyawisa vala koluhepo luove.

OITYI OVE UNA OKULINGA—Ovipuka Vimwe Vikuatesako

Tyina wamatumbukilwa notyiponga, wahanyane novipuka viove mokulinga ñga:

HONEKA OVIPUKA UHANDA OKULANDA

Hapeho Mosukisa Vala Okulanda

Wahapesele onombongo mbove movipuka wehesukisile. Lipula okuti: ‘Otyipuka etyi nesuka umwe natyo? Okuti ndyipondola okutyilima mepia liange opo neheketyilande vali?’
Tyina uhanda okulanda tyimwe lipula okuti: ‘Tyesukisa umwe? Ndyina umwe onombongo mbokutyilanda?’
Ine motyilongo tyenyi ovatumini vakuatesako ovanthu, tyina vekukuatesako tavela.

Umwe utiwa o Gift, wati: “Onthwe pamwe tumphumphama umwe atuho atutale nawa ovipuka tuesukisa. Tulityilika okulinga ovipuka vimana onombongo mbetu. Tupu pahe tuehimbika okulanda ovikulia viahalande onombongo onyingi.”

HAPEHO MOSUKISA VALA OKULANDA

Honeka Ovipuka Uhanda Okulanda

Ombimbiliya yati: “Omunthu wonondunge utala nawa ovipuka, mahi vana vatumphuluka vala novipuka, velituala vala moluhepo.” (Provérbios 21:5) Okuhoneka ovipuka uhanda okulanda, matyikukuatesako ohalande evii vilamba ponombongo una.

Tete, hononeka otyiñgapi ufetwa mohanyi.
Pahe, ohoneka ovipuka uhole okulanda mohanyi aiho. Tala nawa onombongo uhole okumanena movipuka ulanda mohanyi aiho.
Konyima otale otyiñgapi ufetwa iya otyiñgapi umana mohanyi. Pahe osoko ovipuka wehesukisile vali okulanda.

Umwe utiwa o Carlos, wati: “Monohanyi ambuho onthue tuhoneka onombongo tuamana. Tuna onombongo mbumwe tupaka nawa mambutukuatesako tyina tuna otyitateka. Otyo tyitukuatesako okuahalingi otyiho, mokonda tutyiyale etyi matulingi nonombongo mbetu.”

WAHAKALE NONONGELE / KUATA NAWA ONOMBONGO

Wahakale Nonongele / Kuata Nawa Onombongo

Tepulula konongele mbove. Ine tyitavela wahalevale vali. Okulinga ngotyo matyikukuatesako okupaka nawa onombongo, otyivile okulanda ovipuka wesukisa.
Onohanyi ambuho ovola okupaka nawa onombongo, opo tyina wamatumbungilua notyitateka wahatokote omutwe.

UNDAPA UNENE / KUATA NAWA OVILINGA VIOVE

Ombimbiliya yati: “Okuundapa unene kuna ouwa omunyingi.” — Provérbios 14:23.

Undapa Unene / Kuata Nawa Ovilinga Viove

Ovilinga viove vitala monkhalelo yapola pokati. Namphila hamwe ankho havioko uhanda, mahi ovio vikukuatesako.
Linga ononkhono mbokukala omuundapi uyumbwa onthumbi. Inkha ulinga ngotyo kumatewa movilinga tupu matyikukuatesako okuvasa ovilinga ankho uhanda.

Umwe utiwa o Dmitriy, wati: “Ovilinga viange ndyivilinga umwe nawa namphila havioko ame ankho nahanda tupu kavifete onombongo ononyingi. Ovilinga ndyilinga ndyivilinga umwe nawa ngatyina oviange mwene.”

Inkha ukahi nokuovola ovilinga . . .

Wahamphumphame vala. Pula kovanthu vokuna onovenda namphila vahapopile okuti tuesukisa omunthu utuundapela. Popila omapanga ove nombunga yove okuti ukahi nokuovola ovilinga.
Pola pokati. Tyipondola hamwe movasi umwe ovilinga vikahi nawa mahi havioko ankho uhanda.