Omokonda Yatyi Tumonena Ononkhumbi Nokukulupa Nokunkhia?

Tumona Ononkhumbi Mokonda Yetyi Tyalingile Ovanthu Vevali Votete

“Mokonda yomunthu wike vala onkhali yanyingila mouye, ngotyo ononkhia ambuliyandyana movanthu aveho.” — OVA LOMA 5:12.

Etyi Omutungi wetu atunga ovo tate, ovo Andau na Eva, ankho wevetunga tyihena onkhali. Tupu evepake momphangu imwe ongwa pano pohi ankho itiwa Otyikunino tyo Endene. Ankho muna omiti ovinyingi viovinyango vapondola okulia mahi eveilika vala okulia komuti wike. Mahi ovo Andau na Eva avakoyo umwe okulia kotyinyango tyomuti una vailikilwe, otyo ankho onkhali. (Gênesis 2:15-17; 3:1-19) Mokonda yokuhetavelele ku Huku, ngwe evetaata motyikunino tyo Endene, okutuka opo omuenyo wavo auhimbika okupuiya. Tupu etyi vakala novana navo avahimbika okumona ononkhumbi nokukulupa nokunkhia. (Gênesis 3:23; 5:5) Onthue tuvela nokukulupa nokunkhia mokonda tuatuka mo Andau na Eva.

Tupu Tumona Ononkhumbi Mokonda Yonoandyu Onondingavivi

“Ouye auho utuminwa nondingavivi.” — 1 SUAU 5:19.

“Ondingavivi’ o Satanasi. Oandyu yahamonwa yatyitukilapo Huku. (Suau 8:44; Eholololo 12:9) Konyima onoandyu ononkhuavo ambulihonyeka kumwe na Satanasi. Pahe onoandyu ombo mbuihanwa okuti ovilulu. Ovilulu ovio vikemba ovanthu nokuvehongiliya okuhetavela ku Huku. Tupu vihongilinya ovanthu ovanyingi okulinga ovipuka ovivi. (Salmo 106:35-38; 1 Timotiu 4:1) Satanasi novilulu viae vitumonesa ononkhumbi.

Pamwe Onthue Muene Tulietela Ononkhumbi

“Etyi omunthu akuna tupu otyo makateya.” — OVA GALATAS 6:7.

Tyili tumona ononkhumbi mokonda yokuapiñgana onkhali nokuhongiliyua na Satanasi. Mahi ovanthu vamwe muene ovo vayawisa kononkhumbi mbavo. Ñgeni ngotyo? Tyina mavalingi ovipuka viapenga ine omatokolo ahaviukile, vateya etyi vakuna. Mahi vana valinga ovipuka oviwa, vateya ovipuka oviwa. Mongeleka inkha he umwe utekula nawa ombunga yae, uundapa nombili, uhole ombunga yae, mateye ovipuka oviwa, ombunga yae ikala nehambu. Mahi inkha katekula nawa ombunga yae, nokunwa unene, nokuananga vala, maetela oluhepo ombunga yae. Otyiwa okutavela etyi Omutungi wetu etupopila. Uhanda tuteye ovipuka oviwa, nokukala “nombembwa.” — Salmo 119:165.

Tumona Ononkhumbi Mokonda Tuli “Kononthiki Mbahulililako”

“Kononthiki mbahulililako . . . , ovanthu mavakakala ovanthu velihole ovo muene, vehole onombongo, . . . vokuhetavela kovohe, . . . vokulipakako, ovakalavi, vokuhole evi vivehambukiswa tyipona Huku.” — 2 TIMOTIU 3:1-5.

Hono, ovanthu ovanyingi vetavela okuti ovipuka ovio vikahi umwe nokumoneka. Onkhalelo ovanthu vatyinda omuenyo tyilekesa umwe okuti tuli “kononthiki mbahulililako” mbouye uno. Ombimbiliya yapopia okuti, matunoñgonoka okuti tuli kononthiki mbahulililako tyina tuamamono ovilwa nondyala novinimawe nomikihi. (Mateusi 24:3, 7, 8; Luka 21:10, 11) Ovipuka ovio vitumonesa ononkhumbi, nokutuipaa.