Ovipuka Ulinga Mono Telefone Nomo tambeleti Nomo Komputatole Vikalesa Ñgeni Otyinepo Tyove?
Ono telefone nono tambeleti nono komputatole, mbupondola okukuatesako ovalinepi okupameka otyinepo tyavo. Mongeleka vapondola okulilikalela otyo vatomphola, otyipuka otyo atyivekuatesako okukala noupanga wapama.
Mahi ovalinepi vamwe vayeka ovipuka valinga mono telefone no mono tambeleti nomo komputatole vivelingisise . . .
okuhatomphola na mukuavo.
okulingila meumbo ovilinga vyo kovilinga.
okulinga ovipuka ovivi, okueenda mukuavo konyima.
ETYI WESUKISA OKUNOÑGONOKA
OKUKALA KUMWE
Omulume umwe utiwa o Michael wati: “Pamwe ame nomukai wange tuli umwe peke, mahi ngwe watalukua vala notelefone yae, atukala vala ngatyina tueheli-ale kumwe. Ndyikati vala ñga ukahi nokulipopila okuti: ‘Otyipuka etyi ame nkhele hinetyitale.’” Omulume omukuavo tupu nae wanepa utiwa o Jonathan wati, movipuka ngovio, “ovalinepi veli kumwe mahi avakala vala ngoti veli ponomphangu mbelikalela.”
SOKA KUETYI: Tuñgapi omesasi nokulikalelwa, tyatyopola etompho liange na mukuetu? — OVA EFESU 5:33.
OVILINGA
Ovanthu vamwe mokonda yovilinga valinga, atee umwe kounthiki vapondola okutumwa onomesasi nokulikalelwa. Mahi ovakuavo namphila vehesukisile okuundapa kounthiki mahi no ngotyo tyina vamehiki meumbo vatualako nokuundapa. Omulume umwe wanepa utiwa o Lee wati: “Atee umwe momuvo napanga okukala nomukai wange tyimphuiya okuhatale motelefone ankho natumwa omesasi yovilinga.” Omukai umwe wanepua utiwa o Joy wati: “Ame ndyiundapela peumbo, apeho ndyina ovilinga. Mahi no ngotyo nesukisa okupola pokati.”
SOKA KUETYI: Okuti tyina mukuenyi apopia no ove umutehelela umwe nawa? — LUKA 8:18.
OKUHAENDE KONYIMA MUKUENYI
Eovololo limwe lialingwa lialekesa okuti, ovalinepi ovinyingi vayaya mokonda yovipuka vapaka mo internete. Ovalinepi ovanyingi vokuapulwa vapopia okuti, vapaka mo internete ovipuka vahahande ñgeno mukuavo uvinoñgonoka.
Ovanthu ovinyingi vapopia okuti, mo internete ovanthu vapondola okulinga ovipuka ovivi, atee nokuhika kokulinga oumbalehi. Ovanthu vamwe vokuamena ovanthu (advogado) vapopia okuti, ovanthu ovanyingi velihenga umwe mokonda yovipuka valinga mo internete.
SOKA KUETYI: Okuti tyina wamapopi nomukuendye ine nomuhikuena mo internete, kutyipopila mukuenyi? — PROVÉRBIOS 4:23.
ETYI UPONDOLA OKULINGA
TALA ETYI TYESUKISA VALI
Tyina omunthu ahali, upondola okuvela. Tupu, tyina ovanthu vokuelinepa vahaovola omuvo wokutomphola, tyivepuiya okutualako notyinepo tyavo. — Ova Efesu 5:28, 29.
OMBIMBILIYA YATI: ‘Talei nawa ovipuka viesukisa vali.’ — OVA FILIPU 1:10.
Nthinda povipuka vimwe upondola okulinga, ankho umona okuti pena ovikuavo upondola okulinga opo ono telefone nono komputatole mbahatyopole otyinepo tyove tyihoneka pombuelo.
Okulia na mukuetu, ñgeno like monthiki.
Okunyima pamwe ono telefone mbetu.
Okuovola onthiki tukale vala vevali.
Okunyima ono telefone mbetu kounthiki, atumbupakela kokule na apa tulala.
Okutomphola ono minutu 15 kanda nthiki, tyanyima ono telefone mbetu.
Okusoka omuvo patyi tuhapondola vali okukala mo internete.