Ovipuka Ulinga Mono Telefone Nomo Tambeleti Nomo Komputatole Vikalesa Ñgeni Omalusoko Ove?
Ovanthu velilongesa ovipuka ovinyingi, vivekuateseko kosikola, no kovilinga no kovipuka ovikuavo vali. Ono telefone nono komputatole mbuvekuatesako unene. Momanima ano, mokonda yono komputatole nono telefone, omunthu upondola okunoñgonoka ovipuka ovinyingi tyili vala peumbo.
Mahi ovanthu vokukalela vala okumanga ono telefone nono komputatole, kavasete . . .
okutalukwa tyina vatanga.
okuyekapo otyilinga vekahi nokulinga.
okukala nounye.
ETYI WESUKISA OKUNOÑGONOKA
OKUTANGA
Ovanthu vokukalela vala okumanga ono telefone nono komputatole, kavetyivili okutanga omukanda umwe atee veumana.
Vahanda vala okutanga okapuka kehehi. Okutanga vala liwa-liwa otyiwa tyina uhanda okuvasa ekumbululo liepulo limwe. Mahi inkha uhanda okunoñgonoka nawa otyipuka tyimwe, okutanga ngotyo katyikukuatesako.
SOKA KUETYI: Okuti utyivila okutanga omukanda oumane? Okuti ankho utanga tyelipulukwa matyikukuatesako? — PROVÉRBIOS 18:15.
OKUTALUKWA
Ovanthu vamwe vapopia okuti, ono telefone nono komputatole mbuvekuatesako okutyinda omankhipa evali. Mongeleka, pamwe vati, oku velituma onomesasi, oku vatanga. Otyipuka otyo katyikahi nawa, matyikulingisisa, pahe ovombo kuaviho.
Namphila tyipuiya okuhatalukwa, mahi otyo vala matyikukuatesako okunoñgonoka etyi ukahi nokulilongesa. Grace una omanima 14 wati: “Tyina wahatalukilwe kulingi oviponyo ovinyingi, tupu kunumana vala. Nelilongesa okuti hahe vali okulinga vala otyipuka tyike.”
SOKA KUETYI: Okulinga ovipuka ovinyingi momuvo wike tyikutalula ohanoñgonoka nokuhinangela etyi welilongesa? — PROVÉRBIOS 17:24.
OUNYE
Ovanthu vamwe kavahande okukala aveke, mokonda yotyo tyina veke vamanga-manga vala ono telefone nono komputatole, vahaliwe nounye. Olivia wapopia okuti: “Ame hityivili okukala ono minutu 15, anahakuate o telefone yange, o tambeleti, nokutala o televisau.”
Tyina wike, oo omuvo ukahi nawa wokusoka. Okusoka tyikuatesako ovakuendye novakulu okunoñgonoka ovipuka.
SOKA KUETYI: Okuti tyina wike woovola omuvo wokusokolola? — 1 TIMOTIU 4:15.
ETYI UPONDOLA OKULINGA
TALA NAWA OMUVO UKALA MO TELEFONE NOMO KOMPUTATOLE
Oityi upondola okulinga opo o telefone ikukuateseko? Okuti o telefone ikutalula ohelilongesa nawa?
OMBIMBILIYA YATI: “Yunga vali nawa enoñgonoko liove nonondunge mbove.” — PROVÉRBIOS 3:21.