OUYE UNO KAUKAHI NAWA

1 | Yakulila Ekongoko Liove

OITYI TYESUKISILA?

Tyina wamatumbukilwa novitateka ngovio, ove wesukisa okulinga tyimwe opo wahapeseke kovipuka viove. Vimwe puovio, ovanthu uhole, ekongoko liove, novipuka ovikuavo unavio viokulitekula, nehambu liove. Oviponga vipondola okutumonekela mononkhalelo mbelikalaila.

Ovitateka vipondola okutupola ononkhono iya tyina tuamakala ehimbwe tyasoya, pamwe tyipondola okutuvelesa.
Oviponga atee vipondola okutuvelesa, nokutusa tyehena onombongo mbokulihakulisa.
Oviponga vipondola okusa ovanthu moluhepo, avahakala nonombongo mbokulanda ovipuka vesukisa ngetyi okulia novihemba.

Etyi Wesukisa Okunoñgonoka

Ovitateka vipondola okukulingisisa okulinga ovipuka viehena oku viapilukila. Okukala novitateka tyipondola okukulingisisa okalela vala okuvela.
Ine kutale nawa oñgeni ekongoko liove likahi, upondola okupeselelapo omuenyo wove.
Tyina tuna ekongoko likahi nawa, matutyivili okulinga ovipuka vikahi nawa mouye uno weyula ovitateka.
Namphila wehena onombongo ononyingi, nongotyo pena etyi upondola okulinga opo uyakulile ekongoko liove.

Oityi Upondola Okulinga?

Tyina tyitavela omunthu omunongo usoka kovitateka hamwe vipondola okumonekapo, iya alingi etyi evila opo elityilike-vio. Nekongoko ongotyo. Okukala ovanthu ononthate, tyipondola okutuyakulila komauvela omanyingi. Hahe vali okukala ovanthu valunguka.

Umwe utiwa o Andreas,a wapopia okuti: “Okukala ovanthu ononthate, tyitukuatesako okukuata nawa onombongo ankho tupondola okumanena mokulanda ovihemba.”

a Omanyina amwe momukanda ou apilululwa.

OITYI OVE UNA OKULINGA—Ovipuka Vimwe Vikuatesako

Pomuvo wovitateka, yakulila ekongoko liove, mokulinga ovipuka evi:

KALA OMUNTHU ONTHATE

Kala Omunthu Onthate

Ombimbiliya yati: “Omunthu wokualunguka umona otyivi, eheliyumbumo.” (Provérbios 22:3) Kala omunthu walunguka, olityilika ovipuka vipondola okupaka ekongoko liove motyiponga.

Apeho likoha peke nondyapau, haunene tyina wehenekuate ovikulia, na tyina waile kohika.
Apeho komba meumbo liove, nokukoha ovipuka vikuatwa unene.
Ine tyitavela wahakale popepi yovanthu vayambula ouvela.

LIAA OVIKULIA VIKAHI NAWA

Liaa Ovikulia Vikahi Nawa

Ombimbiliya yati: “Kutupu omunthu uyele olutu lwae muene, mahi ulutekula nokululinga nawa.” (Ova Efesu 5:29) Onthwe tulekesa okuti tuhole olutu luetu tyina tutala nawa ovipuka tulia nevi tunwa.

Nwa omaande apeho.
Liaa ovinyango vielikalaila, nonombi.
Wahatyiliye okulia ovipuka vina unene omulela, nevi viapakwa unene omongwa, noviokuaoholola unene.
Wahasipe, tupu wahanwe unene.

Umwe utiwa o Carlos, wati: “Opo tuahavele, tulinga ononkhono mbokulia ovipuka vikahi nawa, mokonda ine katulingi ngotyo, matumanena onombongo mbetu mokulanda ovihemba. Hahe vali okumanena onombongo mokulanda ovikulia vikahi nawa.”

LINANA MONONGOLO TUPU PULULUKUAPO UMWE NAWA

Pululukuapo Umwe Nawa

Ombimbiliya yati: “Hahe vali okupululukwa-po nawa, tyipona okututumba vala novilinga, mokonda otyo okutaata omphepo.” (Eclesiastes 4:6) Tyili tuna umwe okuundapa, mahi tupu otyiwa okupululukwa-po.

Wahayeke olutu luove luvototele. Otyiwa okulinana monongolo, nokuhataika. Okulinga ngotyo matyikukuatesako okukala nekongoko likahi nawa, atee umwe nankho wakulupa, utyilema oo hamwe una ouvela wahaveluka.
Linana Monongolo

Ovola okupululukwa-po nawa. Okuahalala nawa katyikaleka nawa olutu, iya omunthu kalingi nawa ovipuka. Atee umwe omunthu upondola okuvela ine kalala nawa.
Kala noola ike yokukalangalapo iya ngatyo umwe ulinga ononthiki ambuho. Tupu kala umwe noola ike yokupinduka-po.
Wahatale otelevisau, notelefone tyina uli moula.
Tyina wehenelangale-po, wahalie unene, wahanwe okafe, novikunwa vikoleswa.

Umwe utiwa o Justin wati: “Ame ndyisoka okuti okupululukuapo nawa tyikalesa nawa ekongoko liange. Tyina nahalala nawa ndyihama omutwe iya nolutu lwatyo luihama vala. Mahi tyina namalala umwe nawa, ndyilitehelela umwe nawa, iya andyilingi umwe nawa ovipuka, tupu tyinkhuatesako okuahavele.”