Otyikunino Tyimue Otyiwa

TALA etyi oohi ikahi. Ovipuka aviho viefiwa. Tala vala eholi, nomiti, no nofololi, novinyama aviho. Upondola okulekesa apa ondyamba no nonkheyama?

Oñgeni otyikunino etyi otyiwa tyeya okukalako? Tutalei oñgeni Huku apongiya oohi pala onthue.

Tete, Huku wamenesa eholi kombanda yoohi aiho. Iya alingi omiti omitutu, no vinkhondo, nomiti ominene. Ovipuka ovio aviho vifiwisa oohi. Mahi, ovio vilinga vali unene tyipona vala okufiwisa oohi. Omiti ominyingi tupu vituavela okulia.

Tupu, Huku walinga onohi pala okukala momeva, noviila opo vinthanane. Walinga ovimbwa, novimbisi, no nonkhambe. Walinga ovinyama ovinene, novinyama ovitutu. Ovinyama patyi vikala popepi neumbo liove? Katuhambukwa okutala ovipuka ovio aviho Huku alinga pala onthue?

Konyima, Huku walinga omphangu imue yakolela unene. Omphangu oyo eihana okuti otyikunino tyo Endene. Ankho omphangu imue yokuafuapo nokuefiwa unene. Iya Huku wahandele oohi aiho ikale yefiwa ngo tyikunino etyi.

Mahi, nkhele tala vali polutalatu olu lwo tyikunino. Ove utyii oityi Huku amona tyakambamo? Tutalei.