Ovanthu Vekahi Nokutunga Ondyuo Imue Onene

PAPITA omanima omanyingi. Ovana va Noe, vatyita ovana ovanyingi. Etyi ovana ovo vekula, navo avatyiti ovana. Iya ovanthu avalingi ovanyingi kombanda yoohi.

Umue povanthu ovo, ankho omphokole ya Noe, utiwa o Nirode. Nirode ankho wali omulume umue ondingavivi. Ankho uyeva nokuipaa ovinyama novanthu. Tupu Nirode welipakele kouhamba opo atumine vakuavo. Huku ankho kehole Nirode.

Pomuvo watyo oo, ovanthu aveho ankho vapopia vala elaka like. Nirode ahande okuongiya ovanthu aveho pomphangu ike, opo apondole okuvetumina. Utyii oityi alinga? Watuma ovanthu vatunge epundaumbo liokuna ondyuo imue onene yokuaya peulu. Uveete polutalatu olu, vekahi nokulinga omatisolo.

Yehova Huku ankho kahambukilwe novilinga ovio. Mokonda Huku wahandele ovanthu veliyandyane kombanda yoohi aiho. Mahi ovanthu vati: ‘Tuendei! Tukatungei epundumbo, nondyuo imue onene ihika alo peulu. Opo tunkhimane!’ Ovanthu ankho vahandele enkhimano liavo muene. Ankho kavahandele okunkhimaneka Huku.

Moluotyo, Huku watalameka ovi-​linga viovanthu ovo viokutunga. Utyii oityi alinga? Wapilulula elaka liavo, avahimbika okupopia omalaka elikalaila. Iya vokutunga ankho pahe kaveliivite vali. Otyo epundaumbo olio lialukilwa okuti o Mbabele, ine Ombambilonia, tyihangununa okuti “Enkhiliñginya.”

Okuhulako, ovanthu ava-himbika okuliyapauka okutu-​nda mo Mbabele. Vana ankho vapopia elaka like, avakakala kumue kononthele ononkhuavo mboohi.