Ekaka Pala Efendelo

OVE utyii oityi etyi polutalatu apa? Ekaka liakolela pala okufenda Yehova. Tupu litiwa ondyuo ikola (tabernáculo). Ovanthu vatunga ekaka eli etyi papita enima tunde puetyi vatunda mo Egitu. Ove utyii olie wasoka okutunga ekaka eli?

O Yehova. Puetyi Moisesi ankho ekahi Komphunda yo Sinai, Yehova wemutolela oñgeni ekaka lina okutungwa. Huku watola okuti lina okutungwa monkhalelo imue itavela okulipanguyula. Okuti tyina vehika pomphangu onkhuavo avelipangiya vali. Ngotyo, tyina ova Isilayeli ankho vailukila pomphangu onkhuavo mehoko, ekaka olio velityinda.

Tala mokati mokandyuo okatutu kekaka, muna otyikasa. Otyikasa otyo tyitiwa otyikasa tyomphango. Kese nthele yotyikasa otyo, kuna oandyu ike ine o kerubin yalingwa no olu. Huku wahoneka vali Ovitumino Ekwi komamanya evali omanthanda, mokonda ana otete Moisesi weetyatyula. Omamanya oo, apakwa mokati kotyikasa tyomphango. Tupu mokati kotyikasa otyo ankho muna oneka imue yokuna omaná. Uhinangela oityi omaná?

Yehova waholovona Arau omukulu wa Moisesi pala okukala osaserdote. Arau wahongolela ovanthu mefendelo lia Yehova. Ovana vae ankho tupu ono saserdote.

Pahe tala mondyuo onene yekaka. Onene vali tyipona ondyuo onthutu. Uluete otyikasa otyo tyitunda omuihi? O altar omu ono saserdote mbuyokela otyipuka tyimue tyokunika nawa tyitiwa oisensu. Tupu mokati kondyuo oyo muna okandiyelo kena ononthele epanduvali mbatema. Iya otyipuka tyatatu tyikahimo omesa. Komesa kuna onombolo 12.

Pepata ankho pena ombasia imue ononene yeyula omaande, ankho mulikohela ono saserdote. Tupu pena o altar onene. Omu, ankho muyokelwa ovinyama vioviawa pala Yehova. Ekaka liokufendela ankho likala pokati komakaka ova Isilayeli.