Ova Gibionita Ovanongo

OMAPUNDAUMBO omanyingi mo Kanaa ankho elipongiya pala okulwa nova Isilayeli. Ankho vasoka okuti vapondola okufinda. Mahi ovanthu vomepundaumbo lio Gibeau ankho kavasoko ngotyo. Ankho vatavela okuti Huku ukahi nokukuatesako ova Isilayeli, iya ovo ankho kavahande okulwa na Huku. Ove utyii oityi ovanthu voko Gibeau valinga?

Velilingisa ngovanthu vakala kokule unene. Ngotyo, ovalume vamwe vavala ovikutu viatandauka, no nonkhaku mbatimbauka. Avalondo kovimbulu viavo no nosako mbatimbauka, iya avapakemo onombolo mbakukuta. Aveya ku Josue, avati: ‘Tuatunda kotyilongo tyimue tyikala kokule unene. Mokonda tueiva kombinga ya Huku yenyi, Yehova. Tueiva ovipuka aviho alinga pala onue mo Egitu. Moluotyo, ononkhalamutue mbetu vetutolela tupongiye okulia pala oungendi nokuiya okumupopila okuti: “Tuvaundapi venyi. Pahe tulaei okuti kamamutulwisa.” Talei ovikutu vietu viatandauka mokonda youngendi omunene, iya onombolo mbetu mbakulupa nokuakukuta.’

Josue no nonkhalamutue ononkhuavo vetavela kova Gibionita. Ngotyo, valaa okuhevelwisa. Mahi, etyi palamba ononthiki ononthatu, vanoñgonoka okuti ovanthu voko Gibeau vakala popepi navo.

Josue evepulu okuti: ‘Omokonda yatyi muetutolela okuti muatunda kotyilongo kokule?’

Ova Gibionita vakumbulula okuti: ‘Tualinga ngotyo mokonda tueiva okuti Huku yenyi Yehova walaa okumuavela otyilongo etyi atyiho tyo Kanaa. Moluotyo tuatila ouoma wokuti mamutuipaa.’ Anthi, ova Isilayeli vatualako nomulao wavo, iya aveheveipaa. Mahi, valinga ovapika vova Isilayeli.

Ohamba yoko Jelusalei ainumana mokonda ova Gibionita valinga oupanga no Isilayeli. Moluotyo, wapopila onohamba ononkhuavo ononkhuana okuti: ‘Endyuei munkhuateseko okuluisa Gibeau.’ Iya onohamba ombo ononthano ambuiya. Okuti etyi ova Gibionita valinga ounongo, okulinga oupanga no Isilayeli? Mokonda yotyo, pahe onohamba ombo mbeya okuveluisa. Tutalei.