Omapulo Ovatangi

Omokonda yatyi omukanda wa 2 Samuel 21:7-9 upopila okuti Daviti “wakalele nokankhenda na Mefibosete” mahi konyima Daviti ayeke vali Mefibosete aipawe?

Vamwe vatanga ehipululo eli avahatalamapo katutu vasoke, velilinga-le epulo eli. Mahi mehipululo olio muapopiwa ovanthu vevali vatiwa ovo Mefibosete. Mahi nkhele matunoñgonoka etyi tyaendelepo.

Ohamba Saulu ankho una ovana etyive, ovakuendye epanduvali, ovahikuena vevali. Omona wotyiveli o Sonataa. Konyima Saulu pahe akala nomona utiwa Mefibosete vatyitile nombalehi yae utiwa o Rispa. Ya tyilinga ovipuka Sonataa nae ankho una omona utiwa o Mefibosete. Ngotyo, pahe ankho Saulu una omona utiwa o Mefimbosete, tupu ankho una omutekula utiwa o Mefibosete.

Pomuvo umwe Ohamba Saulu yatyitukilile-po ova Sibionita ankho vakala nova Isilayeli, aipapo vamwe. Otyipuka otyo alinga ankho katyikahi nawa. Omokonda yatyi? Mokonda pononthiki mba Sosuwe ova Isilayeli valingile omphango yombembwa nova Sibionita. — Jos. 9:3-27.

Omphango oyo ankho nkhele itualako atee pononthiki mbo Hamba Saulu. Mahi Ohamba Saulu, ahalandula omphango oyo, ahande okuhanyako ova Sibionita. Otyipuka otyo atyietela “ovitateka Saulu kumwe novo meumbo liae.” (2 Sam. 21:1) Pahe konyima Daviti akala ohamba. Ova Sibionita vokuahupile kuvana Saulu aipale, avakapopila Daviti otyipuka otyo otyivi Saulu alingile. Daviti evepulu oityi ngwe vahanda alinge opo otyitateka otyo tyitetululwe, opo Siovaa atualeko nokuyamba ova Isilayeli. Ova Sibionita avahaiti onombongo, mahi avaiti ovana epanduvali va Saulu, vaipawe. (Num. 35:30, 31) Daviti etavela etyi vapopia. — 2 Sam. 21:2-6.

Pomuvo opo, Saulu nomona wae Sonataa ankho vankhila-le movilwa. Mahi Mefibosete, omona wa Sonataa nkhele ankho una omuenyo. Mefibosete wakala otyilema etyi omona, ngotyo etyi tate mbuale yae akaluisa ova Sibionita, ngwe ankho kepo mokonda otyilema. Daviti walingile omphango na Sonataa yokuti apeho mavatualako okukala omapanga, iya omphango oyo ankho maikuatesako vomeumbo lya Sonataa, kumwe na Mefibosete, omona wa Sonataa. (1 Sam. 18:1; 20:42) Ombimbiliya yati: “Ohamba [Daviti] aikala nokankhenda na Mefibosete, omona wa Sonataa, Sonataa omona wa Saulu, mokonda yomphango Daviti na Sonataa, omona wa Saulu valingile otyo Siovaa atala.” — 2 Sam. 21:7.

Mahi nongotyo, Daviti etavela etyi ova Sibionita vemuita. Eveavela ovana vevali va Saulu, iya umwe puvo ankho o Mefibosete, novatekula vetano va Saulu. (2 Sam. 21:8, 9) Etyi tyalingile Daviti atyitetulula ovitateka motyilongo.

Otyipuka otyo hehipululo vala. Ovitumino vya Huku ankho viayandyuluka umwe nawa. Ombimbiliya yati: “Ovana kavapondola okunkhia mokonda yeevi vialingwa no vohe.” (Deu. 24:16) Inkha ovana ovo vevali va Saulu, novatekula vae vetano vetupu etyi ankho valinga otyivi, Siovaa ñgeno kayekele vaipawe. Otyitumino otyo tupu tyipopia okuti: “Omunthu una vala okuiipawa mokonda yonkhali yae.” Tyipondola hamwe ovana ovo vevali, no vatekula vetano va Saulu, vaipelwe tupu, omokonda hamwe vakuatesileko Saulu okuipaa ova Sibionita. Naina, ovana ovo epandu vali vaipaelwe mokonda yovipengi viavo.

Otyipuka otyo tyilekesa okuti, tyina omunthu amalingi etyi tyapenga, wapengesa umwe, kapondola vali okuovola apa atatehila. Ondaka ya Huku itulondola okuti: “Tala nawa apa onomphai mbove mbuliata, iya ondyila yove mayeende nawa.” — Pro. 4:24-27; Efe. 5:15.