Omulume Wononkhono Ononene

OVE wii enyina liomulume ou ankho wokuna ono-​nkhono ononene? Ankho omukoyesi utiwa o Sansau. O Yehova wapele Sansau ononkhono. Puetyi nkhele Sansau ehenetyitwe, Yehova watolela me yae okuti: ‘Apa katutu mokala nomona. Oe, makala onkhalamutue pala okuyovola o Isilayeli kova Filisteu.’

Ova Filisteu ankho ovanthu vamue onondingavivi vakala mo Kanaa. Ankho vena omafualali omanyingi, iya ankho vamonesa ononkhumbi ova Isilayeli. Onthiki imue, Sansau etyi ankho ekahi nokukatala opi pakala ova Filisteu, wahonya nonkheyama imue onene. Mahi Sansau aipaa onkheyama oyo tyihena natyike pomaoko. Tupu waipaa ova Filisteu ovanyingi.

Konyima, Sansau ahande omukai umue ankho utiwa o Dalila. Ononkhalamutue mbova Filisteu avalae kese umue okuavela Dalila 1.100 yonombongo mbo palata, inkha evetolela oityi tyiavela Sansau ononkhono ononene. Dalila ankho uhanda onombongo ombo. Dalila ankho hepangako liotyotyili lia Sansau, ni liovanthu va Huku. Moluotyo, Dalila atualeko okupula Sansau oityi tyimukalesa nononkhono ononene.

Okuhulako, Sansau atolela Dalila kombinga yononkhono mbae, ati: ‘Onohuki mbange kambunetetwe, tunde apa natyitwa.’ Etyi natyitwa, Huku wanthyolovona opo ndyikale omuumbili wae wakolela, ngo Nazireu. Inkha onohuki mbange mbutetwa, himakala vali nononkhono.

Etyi Dalila etyiiva, wayeka Sansau alalele kovikalo viae. Konyima, waihena omulume umue, emutete onohuki mbae. Etyi Sansau apahukapo, ankho utupu vali ononkhono. Ova Filisteu avanyingila iya avemukuate. Vemupola omaiho, iya avemulingi omupika wavo.

Onthiki imue, ova Filisteu valinga otyipito tyimue otyinene pala okufenda huku yavo Dagon. Avakapola Sansau mokaleya opo vemulinge otyitalukilo tyavo. Mahi, onohuki mba Sansau ankho mbekula vali. Sansau apopila okamukuendye ankho kemuhongolela okuti: ‘Nthuale alo ponomphandyi mbo ondyuo.’ Iya Sansau elikuambela ku Yehova opo emuavele ononkhono, iya akuatelela monomphandyi. Eliyavela okuti: ‘Ndyinkhile kumue nova Filisteu.’ Motyipito otyo ankho muna 3.000 yova Filisteu. Etyi Sansau akunyuna nononkhono onomphandyi mbondyuo, iya ondyuo aitoko aiipaa ovanthu aveho onondingavivi.