Siovaa Waavelele Sasau Ononkhono

Ova Isilayeli ovanyingi avahimbika vali okufenda ovika-huku, Siovaa eveyeke vamoneswe ononkhumbi nova Filisitiya. Mahi ankho pena ova Isilayeli vamwe vehole Siovaa. Umwe puvo omulume umwe utiwa o Manowaa. Manowaa nomukai wae ankho vetupu ovana. Onthiki imwe Siovaa atumu oandyu komukai wa Manowaa. Oandyu aimupopila okuti: ‘Mokala nomona. Omona oo mayovola ova Isilayeli kova Filisitiya. Makala omu Nasileu.’ Ove utyii ovanthu patyi vatiwa ova Nasileu? Ovanthu valinga ovilinga vielikalela vya Siovaa. Ova Nasileu ankho kavapondola okukeywa onohuki.

Etyi pakala, o Manowaa avakutula omona avemuluku okuti o Sasau. Etyi Sasau ekula, Siovaa emwavela ononkhono ononene. Sasau wali nononkhono ononene, wetyivilile okwiipaa onkhulika nomankhanya. Onthiki imwe Sasau aipaa ova Filisitiya 30 aike vala. Ova Filisitiya ankho vemuyele, vakalela vala okumuyeva opo vemwiipae. Onthiki imwe Sasau aende ko Ngasa ngako akalala, ova Filisitiya aveliyombeleka konombundi mbepunda-umbo opo komuhuka vemwipae. Mahi Sasau apinduka-po mokati kovinthiki, atukula-po epito liepunda-umbo. Elityindi potyipepe atee pokatanga-tanga komphunda imwe ikala popepi no Hemboloo!

Etyi pakala, ova Filisitiya avaende ku Ndalila omuhikwena wa Sasau, avemuti: ‘Inkha utupopila apa patuka ononkhono mba Sasau, matukwaavela onombongo ononyingi. Twahanda okumukwata tumupake mokaleya.’ Ndalila wahandele onombongo ombo, etavela. Tete Sasau ehemupopila opi apola ononkhono. Mahi Ndalila emukengelela opo apopie opi patuka ononkhono mbae, ngwe apopi. Emuti: ‘Onohuki mbange nkhele natyitilwe hinembukululwe mokonda ndyimu Nasileu.’ ‘Ine ndyimbukululwa, himamono vali ononkhono.’ Sasau walingile nawa etyi apopila Ndalila otyipuka tyina?

Ndalila popilwee vala, eketyitolela ova Filisitiya ati: ‘Ndyii apa patunda ononkhono mbae!’ Alangeka Sasau kovikalo viae, ati endywei mumukulule onohuki. Etyi vemukulula, aulula ati: “Sasau ova Filisitiya veya!” Sasau apinduka-po, mahi tyina akatehela utupu vali ononkhono. Avemukwate, avemukutu, avemutiula omaiho, avemupake mokaleya.

Onthiki imwe, ova Filisitiya avalingi otyipito tyimwe otyinene pala okufenda huku yavo Ndangoo, avakwililila avati: ‘Huku yetu wetwavela Sasau! Kapolei Sasau tunyanene kwe.’ Avemupakela pokati konomphandyi onombali, otyo vemukwela. Onohuki mba Sasau ankho mbukahi nokukula vali. Sasau apopila peulu ati: ‘Mbambavo Siovaa mphevo vali ononkhono.’ Sasau atahula-po onomphandyi mbondywo. Ondywo aiwila kovanthu, aveho avankhi, Sasau nae ankhi.