Huku Ukuatesako Ohamba Ezekia

UTYII omokonda yatyi omulume ou ekahi nokulikuambela ku Yehova? Omokonda yatyi apakela omikanda evi komutue wo altar ya Yehova? Omulume ou o Ezekia. Ezekia ankho ohamba yomihoko vivali vio Isilayeli. Ankho ukahi movitateka ovinene. Omokonda yatyi?

Omokonda omafualali oko Asiria ankho ahanyaunale omihoko 10 vio Isilayeli. Yehova wayeka vaha-​nyaunuepo mokonda ovanthu ovo ankho onondingavivi unene. Iya pahe ankho omafualali o Asiria ekahi nokuiya okuluisa ouhamba womihoko vivali.

Ohamba yo Asiria yatumikisa omikanda ko hamba Ezekia. Omikanda ovio, ovievi Ezekia apaka komutue wo altar ya Huku. Omikanda evi vilinga omukuele Yehova. Tupu vipopila Ezekia ayekepo okukolela mu Yehova. Otyo Ezekia ekahi nokulikuambelela ku Yehova okuti: ‘Mbambavo Yehova, tuyovole pomaoko ohamba yo Asiria. Opo ovanthu aveho vetyinoñgonoke okuti ove vala Huku.’ Okuti Yehova matehelela umue Ezekia?

Ezekia ankho ohamba imue ongwa. Ankho kekahi ngo nohamba onondingavivi mbomihoko 10 vio Isilayeli. Tupu ankho kekahi nga tate yae ohamba Akas. Ezekia ankho utavela nawa ovitumino aviho via Yehova. Moluotyo, etyi Ezekia amana okulikuambela, omuuli Isaia watuma okumupopila onondaka mbatunda ku Yehova okuti: ‘Ohamba, yo Asiria kamainyingila mo Jelusalei. Nawike pomafualali ae mehiki popepi no Jelusalei. Kamavayumbu omuhongo nawike mepundaumbo.’

Tala olutalatu olu peefo eli. Ove utyii oapi omafualali aa ankhia? Omafualali o Asiria. Yehova watuma oandyu yae, aiipaa 185.000 yomafualali, motyinthiki tyike vala. Ngotyo, ohamba yo Asiria yafindwa, iya aikondoka keumbo.

Ngotyo, Ouhamba womihoko vivali wayovolwa. Iya ovanthu avakala nombembwa. Etyi Ezekia ankhia, omona wae Manases alingi ohamba. Mahi, Manases nomona wae Amom, ankho ono hamba onondingavivi unene. Moluotyo, otyilongo ankho tyeyula vali oungangala. Ohamba Amom waipaua novaundapi vae. Iya omona wae Josia akala ohamba youhamba oo womihoko vivali.