Oandyu ya Siovaa Yaamena Isekiya

Ova Asilia ankho vatumina-le omihoko 10 vyo Isilayeli. Pahe Senakelimbe, ohamba yo Asilia, ankho uhanda vali okutumina omihoko vivali vyo Sundaa. Ahimbika okuhanya omapunda-umbo o Sundaa like-like. Mahi epunda-umbo ankho ahanda vali unene o Selusalei. Senakelimbe ankho ketyii okuti Siovaa ukahi nokwaamena o Selusalei.

Isekiya, ohamba yo Sundaa, aavela Senakelimbe onombongo ononyingi opo eheye okulwisa o Selusalei. Senakelimbe atambula onombongo, mahi no ngootyo atumu ovita viae opo vihanye-po o Selusalei. Ovanthu mepunda-umbo, avatili unene owoma, mokonda ova Asilia ankho veli unene popepi. Isekiya atolela ovanthu okuti: ‘Mwahatilei owoma. Ova Asilia vapama unene, mahi Siovaa metukwatesako atupame vali kuvo.’

Senakelimbe atumu omuundapi wae Lambisakee, ko Selusalei opo akaleve ovanthu. Etyi Lambisakee ehika ko Selusalei, atalama kondye yepunda-umbo ahimbika okuyolela peulu otyo ati: ‘Siovaa kememukwatesako. Isekiya ukahi nokumukemba. Petupu huku nawike upondola okumuyakulila kwoonthwe.’

Isekiya apulu ku Siovaa oityi vena okulinga. Siovaa emuti: ‘Wahatile owoma etyi Lambisakee ekupopila. Senakelimbe kamanyingila mo Selusalei.’ Isekiya atambula omukanda watunda ku Senakelimbe. Omukanda wapopia okuti: ‘Wehelipwilise vala, Siovaa kemekuyovola.’ Isekiya elikwambela ati: ‘Mbambavo, Siovaa, tuyovole opo aveho vetyinoñgonoke okuti ove vala Huku yotyotyili.’ Siovaa emupopila okuti: ‘Ohamba yoko Asilia kamainyingila mo Selusalei. Ame mandyiamena epunda-umbo liange.’

Senakelimbe ankho wati hamwe mavetyivili okunyingila mo Selusalei. Nthiki imwe kounthiki, Siovaa atumu oandyu pana palalela ovakwa-vita va Senakelimbe. Oandyu aiipaa ovakwa-vita 185.000! Ovakwa-vita aveho Vohamba Senakelimbe avaipawa. Senakelimbe utupu vali etyi alingile, akondoka keumbo liae. Siovaa waamenene Isekiya no Selusalei ngeetyi apopile. Ine noove wali mo Selusalei, ñgeno wayumbile onthumbi mu Siovaa?