Yesu Ukahi Novalongwa Vae Mondyuo Imue Onene

PAPITA ononthiki onombali, etyi tyehika mukuana kounthiki Yesu nono apostolu mbae 12 vaya kondyuo ei onene pala otyipito tyo Pasikwa. Omulume ou ukahi nokutundamo o Judas Iskaliote. Oe, ukahi nokukatolela ono saserdote oñgeni vapondola okukuata Yesu.

Tete, Judas nkhele waileko okukapopia navo apulu okuti: ‘Oityi mamumphe inkha ndyimukuatesako okukuata Yesu?’ Avati: ‘Matukupe omakwi etatu onombongo mbo palata.’ Ngotyo, Judas ankho pahe ukelivasa novalume ovo opo evetuale ku Yesu. Otyo hatyipukako otyivi?

Konyima yo Pasikwa oyo, Yesu wahimbika ondalelo onkhuavo yokuakolela. Waavela ono apostolu mbae ombolo, apopi okuti: ‘Liei, mokonda etyi tyihangununa olutu luange maluavua pala onue.’ Iya eveavela okopo yovinyu, apopi okuti: ‘Nuei, mokonda etyi tyihangununa ohonde yange mainengulwa pala onue.’ Mo Mbimbiliya otyo tyiihanwa okuti: ‘Ehinangelo liononkhia mba Tatekulu,’ ine o ‘ondalelo ya Tatekulu.’

Ovaisilayeli ankho valia Opasikwa pala vahinangele etyi oandyu ya Huku yalamba onondyuo mbavo mo Egitu. Mahi aikaipaa ovana aveho voviveli monodyuo mbova Egitu. Anthi pahe Yesu wahandele ovalongwa vae vemuhinangele, no ñgeni aava omuenyo wae pala okuveyovola. Otyo Yesu atumina onthiki oyo yokuakolela ihinangelue kese enima.

Konyima yotyipito Tyehinangeleso Liononkhia mba Tatekulu, Yesu apopila ono apostolu mbae vakole omutima nokupama mekolelo. Konthyulo, avaimbi oviimbo pala Huku iya avatundumo. Ankho pahe kuanthikovela. Tutalei opi vaya nako.