Ondalelo Yahulilila ya Sesusi

Ova Sundaa ankho valinga otyipito tyo Pasikwa omanima aeho monthiki 14 yohanyi ya Nisaa. Otyipito otyo tyivehinangelesa onthiki Siovaa eveyovola koupika ko Isitu evetwala Kotyilongo Valaelwe. Menima 33 Pomuvo wa Kilisitu, Sesusi novatumwa vae avalingi o Pasikwa mondywo imwe mo Selusalei. Etyi veli opo nokulia, Sesusi ati: ‘Umwe pwoonwe mamphakula.’ Ovatumwa avehetyihande avapulu Sesusi okuti: ‘Olie mekupakula?’ Sesusi ati: ‘Oyou mandyipe otyimbembu tyombolo.’ Sesusi aavela Sunda Isikaliyote otyimbembu tyombolo. Sunda Isikaliyote akatuka-po liwa aende.

Pahe Sesusi alingi elikwambelo, avembula ombolo aavela ovatumwa. Ati: ‘Liei ombolo ei. Ilekesa olutu lwange, mandyiave mokonda yenyi.’ Pahe elikwambela vali eveavela ovinyu. Ati: ‘Nwei ovinyu ei. Ilekesa ohonde yange mandyiave opo ononkhali mbenyi mbwevelwe. Ame ndyimupopila okuti, mamukakala onohamba amukatumina naame keulu. Omanima atyo aeho tyilingei-lingei munthyinangele.’ Okutuka opo, ovalanduli va Sesusi omanima aeho veliongiya vahinangele otyipuka otyo Sesusi alingile. Eliongiyo olio, litiwa Ehinangelo Liononkhia mba Sesusi.

Etyi vamana okulia, povatumwa apakala onondyaya, okulipomba kounene. Mahi Sesusi evepopila okuti: ‘Omunene poonwe oyo una ulitala ngatyina omututu vali.

‘Onwe mumapanga ange. Ame ndyimupopila ovipuka aviho Tate yange ahanda ndyimupopile. Apa katutu mandyiende ku Tate yange keulu. Onwe mamusala, ovanthu mavetyimono okuti muvalongwa vange tyina mulihole na vakwenyi. Onwe lihumbei na vakwenyi ngeetyi ame ndyimuhole.’

Pahe Sesusi elikwambela, aiti ku Siovaa opo akwateseko ovalongwa vae aveho. Aiti opo Siovaa evekwateseko okuundapa nombembwa. Waitile opo enyina lya Siovaa lisukukiswe. Sesusi novatumwa, avaimbila Siovaa oviimbo avaende. Omuvo Sesusi makwatwa ankho ukahi nokuhika-po.