Vakevelela mo Jelusalei

OVANTHU ava uluete apa ovalongwa va Yesu. Vetavela Yesu iya avakala mo Jelusalei. Puetyi aveho kumue ankho vekahi nokukevelela, omutitimo umue omunene weyula ondyuo aiho. Ankho ngoti omutitimo womphepo imue onene. Iya pomutue wa kese mulongwa pahimbika okumoneka omalaka otupia. Uluete omutemo wotupia pomitue viavo? Otyo ankho tyihangununa tyi?

Ankho ehuviso. Yesu wakondoka keulu ku Tate yae, iya anengulila ospilitu sandu kovalanduli vae. Utyii oityi ospilitu oyo yevelunda okulinga? Aveho vahimbika okupopia omalaka elikalaila.

Ovanthu ovanyingi mo Jelusalei veiva omutitimo oo ulinga ngoti omphepo onene, iya aveya okutala oityi tyikahi nokupita. Ovanthu ovakuavo ankho ovo kovilongo ovikuavo. Ankho veile vala kotyipito tyova Isilayeli tyo Pendekoste. Ovaenda ovo avakala nokuahuva, etyi veiva ovalongwa vapopia melaka liavo kombinga yovipuka oviwa Huku alinga.

Ovaenda avapopi okuti: ‘Ovanthu ava aveho ovoko Galileia. Oñgeni vekahi nokupopia momalaka aa elikalaila okovilongo oku tuatunda?’

Petulu pahe akatuka pala okuvehangununina. Wakatula ondaka yae iya atolela ovanthu oñgeni Yesu alekwa netyi Yehova emututilisa. Petulu apopi okuti: ‘Pahe Yesu ukahi keulu, kokulio kwa Huku. Iya wetunengulila ospilitu sandu ngetyi alaele. Mokonda yotyo, otyo mueetele nokuiva omahuviso aa.’

Etyi Petulu apopia ovipuka ovio, ovanthu ovanyingi vakala nokuanumana netyi tyalingwa Yesu. Avapulu okuti: ‘Oityi tuesukisa okulinga?’ Petulu evetolela okuti: ‘Muna yokupilulula onkhalelo yomuenyo wenyi iya amumbatisalwa.’ Moluotyo, monthiki yatyo oyo, 3.000 ovanthu vambatisalwa iya avakala ovalongwa va Yesu.