Ovanyingi Vemumuene Etyi O Pendekosite Ihenehike-po

Etyi Sesusi atutiliswa, apopila ono apositolu mbae 11 opo vekelivase nae komphunda yo Ngalileya. Ovalongwa ovakuavo, valamba po 500, navo avaende, vamwe puvo ankho nkhele kavetavela okuti Sesusi watutiliswa. (Mateusi 28:17; 1 Ova Kolindu 15:6) Mahi etyi Sesusi apopia atyivekalesa nonthumbi yokuti tyotyili watutiliswa.

Sesusi ahangununa okuti wapeua outumini na Huku, keulu na pano pohi. Sesusi evepopila okuti: “Ngotyo, endei, kalongesei ovanthu vomalongo aeho opo vakale ovalongwa, amuvembatisala menyina lya Tate no Liomona no liononkhono mba Huku. Velongesei okuendela movipuka aviho nemutuma.” (Mateusi 28:18-20) Etyi Sesusi atutiliswa ankho nkhele uhanda onondaka onongwa mbutualeko okuiviswa.

Ovalanduli aveho va Sesusi, ovalume, novakai, novana, vapewa otyilinga tyokulongesa ovanthu vakale ovalongwa. Iya mokonda onondyale mbavo ankho mavaovola okutalameka ovilinga viavo viokuivisa nokulongesa, Sesusi evepopila okuti: “Huku wampha outumini wovipuka viatyo aviho, keulu no pohi.” Otyo ankho tyilekesa-tyi kovalanduli vae? Sesusi wevepopila okuti: “Ame ndyikahi no onwe ononthiki ambuho alo konthyulilo youye ou.” Sesusi ankho kekahi nokuti aveho mavaivisa onondaka onongwa mavetyivili okulinga omahuviso. Mahi no ngotyo, mavakuateswako nononkhono mba Huku.

Etyi Sesusi atutiliswa, amonekela ovalongwa vae “mokueenda kuononthiki 40.” Sesusi ankho uti akala nolutu olu, akala nolutu olukuavo, “elilekesa kuvo opo vetyinoñgonoke umwe nawa okuti una omuenyo” iya evelongesa “konthele Youhamba wa Huku.” — Ovilinga 1:3; 1 Ova Kolindu 15:7.

Pu etyi nkhele ankho ono apositolu vekahi mo Ngalileya, Sesusi evepopila vakondoke ko Selusalei. Etyi Sesusi evevasa mepunda-umbo, evepopila okuti: “Muhatundei mo Selusalei, tualeiko okukevela etyi Tate alaa, konthele yetyi mueiva ku ame; mokonda Suau wambatisala nomaande, mahi kamapakala ononthiki ononyingi onwe mamumbatisalwa nononkhono mba Huku.” — Ovilinga 1:4, 5.

Konyima, Sesusi elivasi vali nono apositolu. Evetuala “kondye, avai alo ko Betania,” Komphunda Yomindyambi. (Luka 24:50) amphila Sesusi evepopile-ale okuti maende keulu, mahi no ngotyo ankho vasoka okuti Ouhamba wae maukala pano pohi. — Luka 22:16, 18, 30; Suau 14:2, 3.

Ono apositolu avapulu Sesusi okuti: “Tatekulu, okuti o momuvo uno mopindula-po ouhamba wo Isilayeli?” Sesusi evekumbulula okuti: “Hatyenyi-ko tyokunoñgonoka omivo ine ononthiki mbanakwa, mbuna Tate apaka mepondolo liae.” Apopi vali otyilinga ankho vena okulinga, ati: “Tyina ononkhono mba Huku mbamemulaukila, onwe mamutambula epondolo amukala onombangi mbange mo Selusalei nomo Sundeia no mo Samaliya, alo kononthele mbokokule-kule mbohi.” — Ovilinga 1:6-8.

Ono apositolu ankho vekahi na Sesusi Komphunda Yomindyambi, avemumono tyina aya no keulu. Apakala katutu, avehemumono vali mokonda vahikwa nekaka. Sesusi ankho uti akala nolutu olu, akala nolukuavo. Mahi pahe, elipilulula akala nolutu luoandyu, aende keulu. (1 Ova Kolindu 15:44, 50; 1 Petulu 3:18) Pu etyi ono apositolu ankho vekahi nokumutala, ponthele yavo apamoneka “ovalume vevali vavala ovikutu ovinthuelu.” Ankho onoandyu mbelipilulula omalutu ovanthu, ambuvepulu okuti: “Valume vo ko Ngalileya, oityi muatalamena apa otyo mutala peulu? Sesusi ou wapolwa pu onwe okuenda no keulu, meya monkhalelo ngei muamona etyi aya no keulu.” — Ovilinga 1:10, 11.

Etyi Sesusi atunda pano pohi okuenda no keulu kaile nomunkhima omunene, ovalanduli vae vala vemumuene, ovanyingi kavemumuene. Ngotyo, pokukondoka ankho ‘meya monkhalelo ngoyo,’ ovanthu ovanyingi ankho kamavemumono. Ovalanduli va Sesusi vala ovakuatyili, ankho mavaimbuka okuti Sesusi wahimbika-le okutumina.

Ono apositolu avakondoka ko Selusalei. Mononthiki mbalandula-ko, aveliongiya novalongwa vakuavo, okukutikinya-mo “Maliya ina ya Sesusi nonondenge mbae.” (Ovilinga 1:14) Avatualako nokulikuambela. Otyipuka tyimwe ankho valingila omalikuambelo, okuholovona omulongwa mapingi pu Sunda Isikaliote, opo ono apositolu mbukale vali 12. (Mateusi 19:28) Ankho vahanda omulongwa wamuene ovilinga vya Sesusi, netutilo liae. Otyo otyikando tyahulilila Ombimbiliya ipopia okuti vayumba owela opo vatale etyi Huku ahanda. (Salmo 109:8; Provérbios 16:33) Mokonda Matiya wakalele povalongwa 70 Sesusi atumine, ngae vakoya-po “avalulilwa kumwe nono apositolu 11.” — Ovilinga 1:26.

Etyi palamba ononthiki ekwi tunde etyi Sesusi apita keulu, ova Sundeu avakala Notyipito tyo Pendekosite yenima 33 P.K. Ovalongwa 120 ankho veliongiya mondyuo imwe mo Selusalei. Liwa-liwa akuivala otyipuka tyayuela ngomphepo onene mondyuo aiho. Avamono omalaka ekahi ngotupia komutwe wa kese mulongwa. Ovalongwa aveho avahimbika okupopia omalaka elikalaila. Ankho vapewa ononkhono mba Huku, Sesusi evelaele. — Suau 14:26.