Elongeso 11
Omatavelo Novityiliyo Vihahambukiswa Huku
Oepi Omatavelo novityiliyo vihavyukile? (1) Ovakristau vena okutavela okuti Huku oe Outatu ukola? (2) Omokonda yatyi Ovakristau votyili kavalingila ovipito vyo Natale, Opasikwa, novipito vyomanima? (3, 4) Vokwankhia vapondola okulinga omapita vana vokuna omwenyo? (5) Yesu wankhila mekulusu? (6) Omokonda yatyi otyokwakolela okuhambukiswa Huku? (7)
1. Haehoko omatavelo novityiliyo ovivi. Anthi Huku keetavela inkha atunda monongeleya mbomatutu ine elityindamena nomalongeso Ombimbiliya. — Mateus 15:6.
2. Outatu ukola: Yehova oe Outatu ukola — ovanthu vetatu mu Huku wike? Ahau! Yehova, Tate, oe “vala Huku yotyili.” (João 17:3; Marcos 12:29) Yesu Omona Wae wotyiveli, ya oe utavela ku Huku. (1 Coríntios 11:3) He, omunene tyipona Omona. (João 14:28) Espilitu sandu hamunthuko; anthi ononkhono mba Huku mbuundapa. — Gênesis 1:2; Atos. 2:18.
3. Onatale Nopasikwa: Yesu kakutulilwe monthiki yo 25 ya Kayovo. Oe wakutulwa kuna kohanyi ya Kulindi Konthiki ya 1, pomuvo wenima pana okuti ovanthita vayunga ovipako vyavo omaunthiki, konohambo. (Lucas 2:8-12) Yesu nalumwe atumine Ovakristau okulinga otyipito tyonthiki yokukutulwa kwae. Anthi, oe watolela ovalongwa vae vahinangele ononkhia mbae. (Lucas 22:19, 20) Onatale novityiliyo vyayo vyatuka konongeleya mbomatutu mbokohale. Haityo tyipita novityiliyo vyo Pasikwa, ngo kuundapesa omayiyi novindimba. Ovakristau votete inkha kavalingi ovipito vyo Natale ine Opasikwa, ni Ovakristau votyili vomuhono kavevilingi.
4. Ovipito vyomanima: Ovipito vala vivali vyomanima vyapopiwa Mombimbiliya ankho ovyo vanthu vana vahafendela Yehova. (Gênesis 40:20-22; Marcos 6:21, 22, 24-27) Ovakristau votete ankho kavalingi ovipito vyomanima. Otyityiliyo tyokulinga ovipito vyomanima tyatuka konongeleya mbomatutu mbokohale. Ovakristau votyili veliavela ovyawa nokutalukilwa kumwe momivo ovikwavo mokwenda kwenima.
5. Owoma waava Vokwankhia: Vokwankhia kaveivite natyike ni kavapondola okulinga natyike. Onthwe katupondola okuvekwatesako, ya ovo kavapondola okutulinga omapita. (Salmo 146:4; Eclesiastes 9:5, 10) Ohande inkhia; oyo kaikala nomwenyo putyino yankhia. (Ezequiel 18:4) Anthi omivo vimwe onoandyu onombi, mbutiwa ovindemoniu, mbulikembesa okukala onohande mbavana vokwankhia. Kese vityiliyo vikahi kumwe nowoma ine nefendelo lyaava vokwankhia, vyapenga. — Isaías 8:19.
6. Ekulusu: Yesu kankhilile mekulusu. Oe wankhila momuti. Ondaka yo Gregu yapitiywa “ekulusu” mono Mbimbiliya ononyingi ihangununa evaya. Elekeso lyekulusu lyatuka konongeleya mbomatutu mbokohale. Ekulusu ankho kalyundapeswa ine okufendelwa Novakristau votete. Ngotyo, ove usoka okuti tyikahi nawa okuundapesa ekulusu mefendelo? — Deuteronômio 7:26; 1 Coríntios 10:14.
7. Tyipondola okukala tyatena unene okusapo amwe omatavelo novityiliyo evi. Ombunga nomapanga vapondola okwovola okukukengelela opo uhayekepo etavelo lyove. Anthi okuhambukiswa Huku tyakolela vali tyipona okuhambukiswa ovanthu. — Provérbios 29:25; Mateus 10:36, 37.
[Elitalatu kemẽla 22]
Huku Hautatuko ukola
[Elitalatu kemẽla 23]
Onatale Nopasikwa vyatuka konongeleya mbomatutu mbokohale
[Elitalatu kemẽla 23]
Petupu ehunga lyokufendela vana vokwankhia ine okukala nowoma navo