Omokonda Yatyi Onombangi mba Siovaa Vahalingila o Pasikwa?
Ovipuka vimwe viahaviukile ovanthu vasoka
Omatutu: Onombangi mba Siovaa kavalingi o Pasikwa mokonda havakwa-Kilisitu-ko.
Otyili: Tutavela okuti Sesusi Kilisitu omuyovoli wetu, ya tulikwatesila umwe “tulandulile popepi onomphai mbae.” — 1 Petulu 2:21; Luka 2:11.
Omatutu: Onwe kamutavela okuti Sesusi watutiliswa.
Otyili: Onthwe tutyii okuti Sesusi watutila; otyo tyalinga umwe otyiso tyeyumba-nthumbi lietu, tutyipopia umwe unene no movilinga viokwiivisa. — 1 Ova Kolindu 15:3, 4, 12-15.
Omatutu: Ovana venyi okupumbwa okunyana-po potyipito tyo Pasikwa, onwe kamwesukile natyo.
Otyili: Onthwe tuhole ovana vetu — tututumba umwe tuvelongese, nokuvekwatesako vakale nehambu. — Titu 2:4.
Omokonda Yatyi Onombangi mba Siovaa Vahalingila o Pasikwa?
O Pasikwa ilingwa hono kayelikwatele neetyi tyipopia Ombimbiliya.
Sesusi wetutuma tuhinangele vala ononkhia mbae, ketutumine tuhinangele onthiki atutila. Omanima aeho tuhinangela ononkhia mbae okulava monthiki ilikwata no kalendaliu kova Sundaa. — Luka 22:19, 20.
Onthwe tutyii okuti oviso vilingwa po Pasikwa yo pehepano, viatuka Koviso ankho vilingwa kohale viahahambukiswa Huku. Siovaa etyi ahanda, “okufendwa vala aike,” mahi pahe ankho tuti oku otyo tumufenda, oku mefendelo latyo tunkhinga-mo evi ahahande tyimunumanesa. — Okutunda 20:5; 1 Onohamba 18:21.
Onthwe etyi tulinga tyokwahalingi o Pasikwa tyelikwata umwe neetyi Ombimbiliya ipopia, ya angwe itutuma tuundape “nawa nounongo nekungunyiko” tyipona okulandula vala oviso viovanthu. (Omihe 3:21; Mateusi 15:3.) Mbili tyina ovanthu vetupula etyi onthwe twahalingila o Pasikwa tuvepopila umwe, mahi munthu na munthu ulinga etyi akoya. — 1 Petulu 3:15.