Okuti Onondaka Onongwa Omba Huku Umwe Tyili?

1. Olie Hekulu Yombimbiliya?

Onondaka onongwa mbokuti ovanthu mavakakala apeho nomuenyo pano pohi, mbahonekwa Mombimbiliya. (Salmo 37:29) Ombimbiliya ina omikanda 66 omitutu. Huku watuma ovanthu vekolelo 40 veihoneke. Omikanda vitano viotete, viahonekwa na Moisesi omanima 3.500 konyima. Omukanda wahulililako, wahonekua no apostolu João, omanima 1.900 konyima. Ovahoneki Vombimbiliya vahoneka omalusoke alie? Huku waundapesa ospilitu sandu yae pala okupopia novahoneki Vombimbiliya. (2 Samuel 23:2) Vahoneka omalusoke a Huku, kavahonekele omalusoke avo. Moluotyo, Jeova oe Hekulu Yombimbiliya.​—Tanga 2 Timóteo 3:16; 2 Pedro 1:20, 21.

Tala ovidiu yati Olie Hekulu Yombimbiliya?

2. Oñgeni matukala nonthumbi yokuti Ombimbiliya o yotyotyili?

Onthue tutyii okuti Ombimbiliya o ya Huku, mokonda ipopia nawa konthele yetyi matyikeya komutwe. Petupu omunthu upondola okulinga ngotyo. (Josué 23:14) O Huku vala Wepondolo aliho uvila okutala etyi ovanthu vakevelela komutwe.​—Tanga Isaías 42:9; 46:10.

Onthue tukevelela okuti Omukanda wa Huku, welikalela, iya Ombimbiliya otyo ikahi. Ombimbiliya ikahi nokuyandyanekwa unene momalaka omanyingi. Tunde kohale, Ombimbiliya yelikuata nounongo wovanthu. Tupu, ovahoneki vayo 40, nawike wapatana mukuavo.a Ombimbiliya ipopia nawa konthele yoluembia lwa Huku, tupu ina epondolo liokupilulula onkhalelo yomienyo viovanthu. Ovipuka ovio aviho viavela ovanthu onthumbi yokuti Ombimbiliya Ondaka ya Huku.​—Tanga 1 Tessalonicenses 2:13.

Tala ovidiu yati Oñgeni Matukala Nonthumbi Yokuti Ombimbiliya oyo Tyotyili?

3. Ombimbiliya ipopia konthele yatyi?

Ombimbiliya ipopia onondaka onongwa mbokuti Huku una elivangelo lioluembia pala ovanthu. Ovihonekwa vihangununa oñgeni elao liokukala momphangu yombembwa liavombeswa, no ñgeni omphangu yombembwa maikapinduluapo.​—Tanga Revelação [Apocalipse] 21:4, 5.

Ondaka ya Huku tupu ina ovitumino, nonondonga, nomalondolo. Tupu Ombimbiliya ina onongeleka mbulekesa oñgeni Huku atekula ovanthu. Iya onongeleka ombo mbutulongesa oñgeni Huku atuwa. Ngotyo, Ombimbiliya ipondola okutukuatesako okunoñgonoka Huku. Ihangununa oñgeni ove upondola okukala epanga liae.​—Tanga Salmo 19:7, 11; Tiago 2:23; 4:8.

4. Oñgeni monoñgonoka Ombimbiliya?

Ombrochula ei, maikukuatesako okunoñgonoka Ombimbiliya, mokulinga ngetyi Jesus alingile. Jesus ankho upopia otestu ike-ike, otyo ahangununa ‘Ovihonekwa.’​—Tanga Lucas 24:27, 45.

Kavihi ovipuka vihuvisa ngo nondaka onongwa mba Huku. Anthi, ovanthu vamwe kavesukile nambo, iya ovakuavo alo umwe mbuvenumanesa. Uhasoye. Wesukisa okunoñgonoka Huku opo ukamone omuenyo uhapu.​—Tanga João 17:3.