Ehuviso Lya Vali Alingila Ko Kanaa

Etyi akala ononthiki onombali mo Samaliya, Sesusi aende kotyilongo tyae. Alingi ovilinga viokuivisa mo Sundeya, ahakondoka ko Ngalileya opo akapululukwe-po. Mahi, ahimbika ovilinga ovinene motyilongo ekulila. Tyipondola ankho kakevelela okutambulwa nawa, mokonda ngetyi Sesusi apopia “omuuli kahumbwa potyilongo tyae.” (Suau 4:44) Ovalongwa vae avahakala nae, avaende konombunga mbavo no kovilinga viavo.

Oityi Sesusi ahimbika okuivisa? Ankho wivisa okuti: “Ouhamba wa Huku ukahi popepi. Livelei, amukala nekolelo monondaka onongwa.” (Maluku 1:15) Oityi ovanthu valingile etyi vetyiiva? Tyotyili, ovanthu ovanyingi mo Ngalileya vatambulile nawa Sesusi, avemunkhimaneka. Mahi ha mokonda vala yetyi veiva onondaka mba Sesusi. Vamwe ankho vatunda ko Ngalileya, aveya potyipito tyo Pasikwa ko Selusalei monohanyi mbokualamba iya vamuene omahuviso omanene Sesusi alingile. — Suau 2:23.

Opi Sesusi ahimbikila ovilinga viae ovinene mo Ngalileya? Tyimoneka nawa okuti wahimbikila ko Kanaa, oku alingilile ehuviso motyipito tyotyinepo etyi apilulula omaande, aakala ovinyu. Etyi aileko motyikando tya vali, Sesusi eivi okuti kuna omona omukuendye wavela unene, ankho uhungi kononkhia. Ankho omona womuundapi wa Helode Antipa, ohamba ina konyima yatetele omutwe Suau Batisita. Omuundapi ankho weiva okuti Sesusi watunda ko Ngalileya, weya ko Kanaa. Moluotyo, atundu meumbo liae ko Kafalanau, aende ko Kanaa, akaovole Sesusi. Mokonda ankho weihamenwa unene, akuluminya Sesusi okuti: “Tatekulu, tuende atuho opo omona wange ahankhie.” — Suau 4:49.

Sesusi akumbulula nonondaka mbumwe mbahuvisile omulume oo, etyi ati: “Enda keumbo, omona wove waveluka.” (Suau 4:50) Omuundapi wa Helode etavela etyi Sesusi emupopila, ahimbika okuenda, akondoka no keumbo. Etyi ekahi mondyila, avelihonyenena novapika vae, ankho veya okumupopila onondaka mbuhambukiswa. Omona wae ankho una omuenyo, waveluka! Omuundapi, apulu okuti: ‘Onalupi akala nawa?’ Ankho uhanda okutyinoñgonoka nawa.

Ngwe avemupopila okuti: “Ouvela wae wemutunda mongulo tyina tyati koola 13.” — Suau 4:52.

Omuundapi ahinangela okuti oyo ankho oola ina Sesusi emupopila okuti: “Omona wove waveluka.” Pahe, atyiti nomuundapi oo, una olumono lutuuka okukala novapika vae, novanthu aveho vo meumbo liae avakala ovalongwa va Kilisitu.

Mo Kanaa omo Sesusi alingila omahuviso ae evali, limwe wapilulula omaande aakala ovinyu, ekuavo wahakula omona omukuendye otyo ekahi kokule nae onokilometulu 26. Omahuviso oo, tyotyili haoko vala Sesusi alingile. Mahi ehuviso liokuahakula omona, ankho liankhimanene unene etyi akondoka ko Ngalileya. Ovanthu avetyinoñgonoka nawa okuti Sesusi oe omuuli wapandwa na Huku, mahi okuti ‘omuuli oo mahumbwa tyina ekahi potyilongo tyae muene’?

Otyo ankho matyimoneka putyina Sesusi amaende kotyilongo tyae ko Nasalee. Oityi ankho matyimumonekela?